[1] Ñoqa Pabloqa, qespichiqninchis Diospa, hinallataq suyakusqanchis Señor Jesucristoq kamachikuyninkuwanmi, Jesucristoq apostolnin kani.
[2] Iñiypi cheqaq waway Timoteo, qanmanmi qelqamuyki. Dios Yayanchispa, hinallataq Señorninchis Cristo Jesuspa allinpaq qokuyninpas, yanapaykuyninpas, thak kayninpas qanwanpuni kachun.
[3] Masedonia probinsiaman puririshaspaymi, Éfeso llaqtapi qhepakunaykipaq balikurqayki. Hinaspa chaypi, wakinkunata huk niray yachachikuykunata amaña yachachishanankupaq kamachinaykipaqmi balikurqaykiqa.
[4] Amallataq kuentokunatapas, hinallataq mana tukurikuy atiq runa-miraymanta willakuykunatapas uyarichunkuchu. Chaykunaqa, manan Diospa wiñachiwasqanchis iñiypiqa wiñachiwasunchu, aswanpas huchatariykunallamanmi chayachiwasunchis.
[5] Kay kamachikuytaqa ch'uya sonqowan, allin konsiensiawan, cheqaq iñiypi munanakuy kananraykun kamachikuni.
[6] Chaykunamanta t'aqakuspankun, wakinkunaqa yanqa rimaykunaman pantaykapunku.
[7] Kamachikuy simita yachachiqkunaqa chaytan munanku. Ichaqa, nisqankutapas, hinallataq allintapuni willakusqankutapas manataqmi yuyayninkupiqa hap'inkuchu.
[8] Ichaqa, sichus pipas Kamachikuy Simita allintapuni yachachin chayqa, Kamachikuy Simi paypaq allin kasqantaqa yachanchismi.
[9] Kaytaqa yachanchistaqmi: Kamachikuy Simiqa, manan chanin runapaqchu churasqa karqan. Aswanpas, mana kamachikuy simiwanchu kaqkunapaqmi churasqa karqan. Hinallataq mana kasukuqkunapaqwan, Diosta mana manchakuqkunapaqwan, huchasapakunapaqwan, mana ch'uya kaqkunapaqwan, Diospaq t'aqasqa kaqta pisichaqkunapaqwan, taytanku wañuchiqkunapaqwan, mamanku wañuchiqkunapaqwan, runa wañuchiqkunapaqwanmi churasqa karqan.
[10] Hinallataq qhellipi puriqkunapaqwan, qharipura t'inkinakuqkunapaqwan, runa suwaqkunapaqwan, llullakunapaqwan, yanqa qasi huraqkunapaqwan, hinallataq allin yachachikuypa kontranpi kaqkunapaqwanmi churasqaqa karqan.
[11] Chay allin yachachikuytaqa, saminchasqa Diospa k'ancharishaq allin willakuyninman hinan, Diosqa ñoqaman hap'ichiwarqan.
[12] Kallpanchawaqniy Señorninchis Cristo Jesusmanmi grasiasta qoni. Payqa, Diospaq hunt'aq sonqopuni kasqayta qhawariwaspanmi, llank'ananman churaykuwarqan.
[13] Ñawpaqqa, Diosta k'arakta k'amiq, qatiykachaq, hinallataq millay k'amikuq runan karqani. Chay tukuywanpas, mana yachaq, hinallataq mana iñiq kashaspaymi, Diospa yanapakuynintaqa chaskikurqanipuni.
[14] Ichaqa, Señorninchispa allinpaq qokuyninmi, Cristo Jesuspi iñiywan, munakuypiwan, ñoqapaq ancha askhallaña karqan.
[15] Cristo Jesusqa, huchasapakunata qespichinanpaqmi kay pachaman hamurqan. Chay huchasapakunamantapas, aswan huchasaparaqmi ñoqaqa kani. Kay simiqa, hunt'aqpuni, hinallataq llapa runaq chaskiykunankupaq hinapunin kanpas.
[16] Ichaqa, huchasapakunamantapas, aswan huchasaparaqmi ñoqaqa kani. Hinan paypi chayllaraq kreeqkuna wiñay kawsayniyoq kanankupaq, Jesucristoqa tukuy llamp'u kayninta ñoqapi rikuchirqan. Chayraykun Diospa yanapakuyninta chaskikurqani.
[17] Chay hinaqa, wiñay-wiñaypaq qhapaq suyu Kamachikuqman, hinallataq mana wañuq, mana rikuna, sapallan yachaysapa Diosman yupaychaypas, hatunchaypas, wiñay wiñaypaqpuni kachun. Ahinapuni kachun.
[18] Kay kamachikuytan, waway Timoteo, saqeyki. Ñawpaqmantapacha qanmanta profetisasqankuman hina, chay maqanakuypi allinta maqanakunki.
[19] Iñiyllapipuni, hinallataq allin konsiensiallayoqpuni kashay. Chaykunata saqepuspankun wakinkunaqa, iñiymanta waqlliykapurqanku.
[20] Chay waqllikuqkuna ukhumantan Himeneopiwan, Alejandropiwan kanku. Paykuna manaña Diosta k'arak k'amiyta yachanankupaqtaqmi, Satanasman hap'ichirqani.