[1] Ñoqa Pabloqa, Diospa munayninwanmi, Diospa Cristo Jesuspi kawsayta prometisqanman hina Jesucristoq apostolnin kani.
[2] Munakusqay wawallay Timoteo, Dios Yayanchispiwan, Señorninchis Cristo Jesuspiwanmi, allinpaq qokuyninta, yanapayninta, thak kayninta ima qosunkiku.
[3] Mana sayk'uywanmi tuta-p'unchay mañakuyniypi qanmanta yuyarini. Hinallataq machulaykunamantapacha ch'uya konsiensiawan Diosta serbikusqaymantawanmi Diosmanqa grasiasta qoni.
[4] Waqasqaykita yuyarispaymi, qanwan ancha kusisqa kanaypaq rikuytapuni munashayki.
[5] Cheqaq iñiyniyoq kasqaykitan yuyarini. Chay iñiyqa, hatun-mamayki Loidapipas, hinallataq mamitayki Eunicepipas karqanpunin. Qanpas chay hina iñiyniyoq kasqaykimantaqa, manapunin iskayanichu.
[6] Chaymi makiykunata qan pataman churaykushaqtiyqa, chay qanpi kashaq Diospaq ruwana qosqanta kawsarichinaykipaq yuyarichimuyki.
[7] Diosqa, manan manchapakuq espiritutachu qowarqanchis. Aswanpas atiyta, munakuyta, hinallataq kikinchista qhawakunanchispaq espiritutan qowarqanchis.
[8] Chay hinaqa, Señorninchismanta rimariytapas, hinallataq Señorhawa preso kasqaymantapas amapunin p'enqakunkichu. Aswanpas ñoqawan kuska Diospa atiyninman hina, allin willakuyrayku ñak'ariysiqmasiymi kanki.
[9] Paymi qespichiwarqanchis, hinallataq ch'uya waqyakuywan waqyawarqanchis. Manan ruwasqanchisman hinachu, aswanpas pay kikinpa munasqanman hina, hinallataq allinpaq qokuyninman hinan waqyawarqanchis. Chay allinpaq qokuynintaqa, kay pacha manaraq qallarishaqtinmi Cristo Jesuspi qowarqanchis.
[10] Kunantaqmi ichaqa, qespichiqninchis Cristo Jesuspa rikhurimusqanwan allinpaq qokuyqa rikuchisqa karqan. Paytaqmi wañuytapas yanqayachispa, allin willakuypa chawpinta, kawsaytapas, hinallataq mana hayk'aq wañuytapas k'anchayman horqomurqan.
[11] Chaypaqtaqmi ñoqataqa willaqta, apostolta, hinallataq mana-judío runakunaman yachachiqta payqa churawarqan.
[12] Chaymi kay imaymanakunataqa muchushani. Chaywanpas ichaqa, pipichus iñisqaytaqa yachanin. Hinallataq, haqay p'unchaypaq imatachus hap'ichikusqayta waqaychananpaq atiyniyoq kasqantapas allintapunin yachani. Chayraykun paymantaqa manapuni p'enqakunichu.
[13] Cristo Jesuspi kaq iñiypi, hinallataq munakuypi, ñoqamanta uyarispa yachaqakusqayki ch'uya simikunata hap'ikuy.
[14] Ñoqanchispi tiyakuq Santo Espírituq yanapayninwanyá, allin kaq qosqayta waqaychay.
[15] Asia probinsiapi kaqkuna llapallanku saqerpariwasqankutaqa yachankiñan. Paykuna ukhumantataqmi Figelopiwan, Hermogenespiwan kanku.
[16] Onesiforoqa, may askha kutitapunin kallpachaykuwarqan. Manataqmi kadenasqa preso kasqaymantapas p'enqakurqanchu. Chayrayku paypa wasinpi kaqkunatapas Señorllapuni yanapaykuchun.
[17] Aswanmi Roma llaqtaman chayamuspa, tukuy sonqonwan maskhawarqan, hinaspataq tariwarqan.
[18] Haqay p'unchaypi Señorpa partinmanta yanapaykuyta tarinanpaq Señorllapuni munachun. Éfeso llaqtapi maytapuni yanapawasqanchistaqa, qanmi aswan allinta yachanki.