[1] Chay hinaqa wawqe-panaykuna, ñoqaykupaq Diosman parlapuwankiku. Imaynan qankunapurapi karqan, chay hinata Señorpa simin, usqhaylla mast'arikunanpaq, hinallataq allinpaq hap'isqa kananpaq Diosmanqa parlapuwankiku.
[2] Manan llapa runachu iñinku. Chayrayku sinchi waqllisqa, hinallataq millay runakunamanta qespichisqa kanaykupaq Diosmanqa parlapuwankiku.
[3] Señormi ichaqa, hunt'aqpuni. Payllapunin takyachisunkichis, hinallataq mana allinmantapas waqaychasunkichis.
[4] Qankunaman imachus kamachisqaykuta ruwashasqaykichistapas, hinallataq chayraq ruwanaykichistapas Señorllapin sonqo churayniykuqa kashan.
[5] ¡Señorllapunitaq sonqoykichista Diospa munakuyninmanpas, Cristoq pasiensiakuyninmanpas pusachun!
[6] Ichaqa, wawqe-panaykuna, wakin wawqekunan qellakuspa, hinallataq mana yachachikuyniykuman hinachu purishanku. Chaymi, llapallan chay hina puriqkunamanta t'aqakunaykichispaq Señorninchis Jesucristoq sutinpi kamachimuykiku.
[7] Qankunapurapi ñoqaykuqa, manan qellakuspachu kawsarqayku. Chaymi qankuna kikiykichis, imaynatachus qatichikuwanaykikutaqa yachankichis.
[8] Manataqmi mayqenpa mikhunantapas yanqallanmanta mikhurqaykuchu. Aswanpas mana mayqenniykichistapas gastachiq kanaykupaqmi, tutantin, p'unchaynintin sayk'uywan anchatapuni llank'arqayku.
[9] Manan mana kamachikuyniyoq kasqaykuraykuchu, aswanpas ñoqayku kikiykuta qatichikuwanaykikupaqmi, yachaqakuyta qankunaman qoykiku.
[10] Hinallataq qankunawan kashallaspaykuraqmi kay hinataqa anyaykurqaykiku: ‘Sichus pipas mana llank'ayta munanchu chayqa, amallataq mikhuchunpaschu,’ nispa.
[11] Qankunapurapi wakinniykichis qellakuspa, mana imapi llank'aspa purishasqaykichista, hinallataq hukpa kaqninman challpukuspa, purishasqaykichistan uyariyku.
[12] Chay hina puriqkunatan, sumaqta llank'akuspanku kikinkuq mikhunankuta mikhunankupaq Señor Jesucristopi kamachiyku, hinallataq kallpachayku.
[13] Qankunataq ichaqa wawqe-panaykuna, allin kaqta ruwaspaykichisqa amapuni sayk'uychischu.
[14] Ichaqa, pillapas kay kartaq chawpinta rimaykusqaykuta mana kasukuqqa kanmanmi. Sichus chay hina kanman chayqa, mayqenchus kasqanta allintapuni reqsiykuychis. Hinaspataq p'enqakunanpaq amaña paywan huñukuychischu.
[15] Ichaqa, ama huk awqata hinachu payta qhawariychis. Aswanpas huk wawqeta hina anyaykuychis.
[16] Kikin thak kayniyoq Señortaq, tukuy imaymanapi thak kaynintaqa qosunkichispuni. Señorqa llapallaykichiswan kachun.
[17] Ñoqa Pabloq makiymantapunin kay napaykuyqa. Chay hinatapunitaqmi llapallan kartaykunapipas seq'eni. Chay hinatapunitaqmi qelqanipas.
[18] Señorninchis Jesucristoq allinpaq qokuyninqa, llapallaykichiswanpuni kachun. Ahinapuni kachun.