[1] Edhingngagi! Kabicaksana'an lok-ologan, sowarana hekmat epakaja.
[2] Hekmat jareya manjeng e mo'-gumo' e penggir jalan, ban e rong-lorong parapadan.
[3] E bang-labang saketheng, jalan mon maso'a ka kottha, e jadhiya oreng ngedhing sowarana.
[4] “He, ommat manossa, sengko' aera' ka ba'na; saneyap manossa e bume, edhingngagi tang sowara.
[5] Ba'na se gi' ta' andhi' pangalaman, mara ajar sopaja tajem pekkeranna; ba'na se budhu, mara ajar ngangguy pekkeran.
[6] Edhingngagi tang ca'-oca' reya, sabab kabbi teppa' ban bagus essena.
[7] Se ekoca'agi sengko' kabbi tadha' salana, sabab sengko' baji' ka caca se lecek essena.
[8] Jujur kabbi essena tang oca', tadha' se alet-bulet otaba sala.
[9] Monggu ka oreng penter, tang oca' ekarassa teppa'na, ka oreng se tabukka' pekkerra, tang caca tadha' salana.
[10] Argai tang babala'an alebbiyan dhari salaka asli, parlowagi pangataowan ngalebbi'i emmas morne.
[11] Sengko' reya hekmat, lebbi aji dhari barleyan; ta' ekenneng bandhingngagi bi' apa'a bai se daddi pangaterrona ba'na.
[12] Sengko' reya hekmat, sengko' agandhu' pangarteyan, kabicaksana'an ban pangataowan.
[13] Hormat ka PANGERAN artena baji' ka kajahadan; sengko' ta' lebur ka kasombongan ban kaangkowan. Sengko' baji' ka tengka se jahat, ban ca'-oca' se agandhu' tepowan.
[14] Sengko' se aberri' ilham, ban sengko' keya se awujuddagi ilham jareya. Sengko' penter sarta kowat.
[15] To-rato bi' sengko' ebanto ajalannagi pamarenta'an, para pangobasa etolong ajalannagi kaadilan.
[16] Lantaran tang partolongan, para pangraja ban kaom oreng agung marenta ban ajalannagi kaadilan.
[17] Sengko' taresna ka oreng se lebur ka sengko'; sapa se nyare'e sengko' tanto tatemmo.
[18] E sengko' badha kasogiyan, kama'moran ban kahormadan.
[19] Se ekaolle ba'na dhari sengko' alebbiyan dhari emmas morne, aajiyan dhari salaka asli.
[20] Sengko' lebat e jalan kaadilan, sengko' atengka' e jalan kajujuran.
[21] Oreng se taresna ka sengko' bi' sengko' epasogi, bengkona epossa'e bi' arta.
[22] Sengko' ecepta'agi PANGERAN angadha'an dhari laenna, sengko' hasella karyana se dha'-adha' e jaman lamba'na.
[23] Sengko' ekagabay molae parmola'anna jaman, dha'-adha' kadibi' sabellunna bume ecepta.
[24] Sengko' lahir sabellunna tase' raja ecepta, sabellunna aeng nyomber dhari tana.
[25] Sengko' lahir sabellunna nong-gunong epajaga, sabellunna mo'-gumo' epaddek,
[26] sabellunna Pangeran nyepta'agi bume ban lon-talonna, la'-mala' sabellunna ecepta tana sakeppel se dha'-adha'na.
[27] Sengko' nangale e bakto langnge' eampar, e bakto bang-abang ebarbar e attassa tase' raja,
[28] e bakto Pangeran nyaba' ondhem e langnge', ban mokka' ber-somberra tase' raja,
[29] e bakto Pangeran adhabu ka tase' sopaja ta' sampe'a ngalebadi tes-batessa. Sengko' hadir keya e bakto langganna bume epasang.
[30] Sengko' badha e seddi'na Pangeran akantha ana' emmassa, sabban are sengko' se masenneng panggaliyanna; sengko' ros-terrosan en-maenan e ajunanna.
[31] Sengko' neng-sennengngan e attas bumena, ban senneng apolong ban manossa.
[32] Daddi, edhingngagi sengko', kana' ngodha! Toro' tang petodu, tanto ba'na senneng odhi'na.
[33] Tarema babala'anna sengko', ban pabicaksana, ja' sampe' enthengngagi.
[34] Pojur oreng se ngedhingngagi sengko', se sabban are toju' anante' e labangnga tang bengko, ban aga-jaga e labang sakethengnga tang bengko.
[35] Sapa se nemmo sengko' nemmo kaodhi'an, oreng jareya katarema ka PANGERAN.
[36] Sapa se ta' nemmo sengko' rogi dibi'; oreng se baji' ka sengko' lebur ka pate.”