[1] Areya' babala'anna Agur ana'na Yake dhari Masa: “Abdidalem lesso, Guste Allah, abdidalem ce' lessona! Abdidalem ampon ta' gadhuwan kakowadan!
[2] Abdidalem budhu akadi keban; ta' gadhuwan pangarteyan pa-ponapa.
[3] Abdidalem ta' oneng ajar parkara hekmat, ta' oneng pa-ponapa parkara Allah.
[4] Manossa ka'imma se oneng ongga toron sowarga? Se oneng mergem angen e dhalem tanangnga, otaba mondu' aeng sareng kalambina, sareng neptebbagi tes-batessa dunnya? Pasera oreng gapaneka, ban pasera ana'na? Tanto Junandalem ngagali!
[5] Allah neptebbi saneyap janjina. Allah reya akantha tameng ka sakabbinna oreng se ngaop ka Salerana.
[6] Mon ba'na nambai apa se edhabuwagi Salerana, ba'na tanto epaenga' ban Salerana tanto abukteyagi ja' ba'na reya oreng lecegan.”
[7] “Ya Allah, abdidalem nyo'ona ka Junandalem sabellunnepon abdidalem mate, kasokana Junandalem marenge abdidalem parkara se dhadhuwa' ka'dhinto.
[8] Ja' kantos abdidalem acaca ta' jujur sareng lecek, jugan ja' kantos abdidalem mesken otaba sogi. Parenge abdidalem namong se ekaparlo abdidalem saos.
[9] Sabab, manabi abdidalem sogi, olle daddi abdidalem ngoca' ja' abdidalem ta' buto ka Junandalem. Ban manabi abdidalem mesken, olle daddi abdidalem ngeco' kantos abdidalem macemmer asmaepon Junandalem.”
[10] Ja' metenna bareng ka lorana, dhaggi' ba'na ebasto ban eanggep sala.
[11] Badha oreng se abasto eppa'na ban ta' ngargai ebuna.
[12] Badha oreng se nganggep socce aba'na, mangka sabendherra aba'na ce' kotorra.
[13] Badha oreng se apangrasa aba'na ce' becce'na -- ce' becce'na parana!
[14] Badha oreng se nyare kasap kalaban cara se kejjem; bengnges ban merres oreng mesken se ta' andhi' kakowadan.
[15] Lenta darat andhi' ana' dhadhuwa', se dhadhuwa' nyamana “Kaangguy sengko'!” Badha empa' parkara se ta' tao badha tobugga:
[16] dunnyana oreng mate, babine' se ta' tao andhi' ana', tana kerreng se ngarep ojan ros-terrosan, ban apoy se ngolap ka man-dhimman.
[17] Oreng se ngethessagi eppa'na otaba ebuna se la towa, sapantessa eontallagi kalowar me' olle matana ecocco' dhangdhang ban mayyidda ekakan mano' rajabali.
[18] Badha empa' parkara se sengko' ta' duli ngarte polana malarat:
[19] mano' rajabali se ngabber e bang-abang, olar se agalajar e attassa bato karang, kapal se alajar e tengnga tase' raja, ban sapasang ngangodhadan se teppa'na saleng taresna.
[20] Areya' kasalenterranna babine' se ta' esto ka lakena: Samarena azina laju ngakan pas ngessot colo'na, laju ngoca', “Sengko' ta' alako pa-apa!”
[21] Badha empa' parkara se ta' gampang etarema reng-oreng sadunnya:
[22] bareng se daddi rato, oreng budhu se ngaolle sabarang se ekaterro,
[23] babine' se bisa nemmo lake mangkana babine' jareya ta' ekaleburi oreng, bareng bine' se arampas kennengnganna lora bine'na.
[24] E bume reya badha keban kene' tape ce' penterra, bannya'na pa' macem, iya areya:
[25] Bilis, keban se ta' kowat, tape nyadhiya'agi kakanna e mosem panas.
[26] Kancel, keban se ta' andhi' kakowadan, tape agabay rongkangnga e gumo' bato.
[27] Balang, keban se ta' andhi' rato, tape abaris bagus atoranna.
[28] Cekcek, keban se ekenneng pega' bi' tanang, tape badha e karaton.
[29] Badha empa' parkara se nyarepsep ka ate mon etetene carana ajalan, iya areya:
[30] Macan, keban se kowat e antarana sakabbinna keban ban ta' tako' ka pa-apa;
[31] embi' lake', ajam lake' se sodek pajalanna, ban rato e adha'anna ra'yadda.
[32] Mon lantaran kabudhuwanna ba'na kalaban angko andhi' sajja se jahat, senga'!
[33] Sabab mon ba'na ngocco' susu ba'na tanto olle mantega. Mon ba'na mokol elongnga oreng, tanto kalowar dhara. Mon ba'na mapeggel oreng, tanto ba'na pas atokar.