[1] Areya' babala'anna Sulaiman pottrana Daud, rato Isra'il.
[2] Tojjuwanna kaangguy nolong oreng sopaja taowa baramma carana sopaja daddiya bicaksana, ban taowa tata tartebba odhi' sarta bisa paham ka maksodda ca'-oca'an se dhalem artena.
[3] Babala'an reya ngajarragi baramma oreng bisa odhi' bicaksana, jujur, adil ban bendher.
[4] Oreng se ta' andhi' pangalaman eajari sampe' andhi' pekkeran se tajem, ban ngangodhadan eajari daddi oreng se penter ban bisa apekker sacara dibasa.
[5] Kalaban babala'an reya reng-oreng se bicaksana bakal atamba'a pangataowanna, ban oreng se la narema pandhidhikan bakal olleya petodu.
[6] Kalaban cara se kantha jareya oreng bisa tao ka arte se kaalengan e dhalem babala'an ban paham ka cap-ocabanna reng-oreng se bicaksana sarta ra-parkara se eajuwagi reng-oreng jareya.
[7] Mon terro andhi'a elmo pangataowan, oreng kodu andhi' kaadha' parasa'an hormat ban tako' ka PANGERAN. Oreng budhu ta' ngargai hekmat ban ta' endha' eajari.
[8] Gateyagi apa se ekoca'agi rama ebuna ba'na, na',
[9] sabab pangajaranna se kadhuwa jareya nambai kabecce'anna ba'na akantha surban ban kalong se nambai bagussa robana ba'na.
[10] Mon ba'na egudha oreng dusa, na', ja' torodi gudha'an jareya.
[11] Mon oreng jareya ngoca', “Mara nyare oreng pas karoyo' kambuli'i. Kaangguy seng-iseng, mara nyerrang oreng se ta' sala.
[12] Sateya reng-oreng jareya odhi' senneng ban baras, tape dhaggi' tanto daddi akantha oreng se satengnga mate.
[13] Rang-barangnga se aji mara kala', me' olle bengkona sengko' ban ba'na possa' ban barang rampasan.
[14] Mara noro'! Dhaggi' barang keco'anna bagi kambuli'i!”
[15] Ja' norodi reng-oreng se kantha jareya, na'! Jauwi reng-oreng jareya.
[16] Reng-oreng jareya ta' nyaman neng-enneng mon gi' ta' alako jahat; terro duliya mate'e oreng.
[17] Mano' bai ta' kera maso' ka dhalem jaring se eampar e adha'na matana,
[18] tape reng-oreng jareya la'-mala' masang jira' kaangguy aba'na dibi' - jira' se macalaka'a aba'na dibi'.
[19] Pajat, oreng se nyare kasap kalaban ngangguy kakerrasan bakal majara ban nyabana dibi'.
[20] Edhingngagi! Hekmat lok-ologan e rong-lorong ban ra'-era'an e lon-alon!
[21] Rat-tharadan e bang-labang saketheng ban e kennengngan-kennengngan se ramme:
[22] “He, reng-oreng budhu! Sampe' bila ba'na pagguna kantha jareya? Bila ba'na se ambuwa ngenthengngagi pangataowan ban nolak pangajaran?
[23] Edhingngagi mon sengko' maenga' ba'na, bi' sengko' ba'na pas ebala'ana essena tang ate sarta eajarana tang pangataowan.
[24] Ba'na la eolok bi' sengko', tape ba'na ta' endha' ngedhingngagi.
[25] Tang babala'an bi' ba'na eenthengngagi kabbi ban mon sengko' maenga' ba'na ta' endha' narema.
[26] Daddi mon ba'na calaka', bi' sengko' ekala'-gella'a. Mon ba'na katako'en, bi' sengko' eco-kocowa.
[27] Onggu, bi' sengko' ba'na eco-kocowa mon ba'na kobater ban nanggung kasossa'an polana nemmo balai se padhatengnga akantha kaleng busbus.
[28] E bakto jareya ba'na bakal ngologa sengko', tape sengko' ta' nyaoda. Ba'na bakal nyareya sengko' san-kassannagi, tape sengko' ta' kera etemmo.
[29] Ba'na akantha oreng se ta' tao endha' narema pangataowan, ban sengka se ta'ada ka PANGERAN.
[30] Ba'na ta' tao endha' narema tang babala'an otabana agateyagi mon sengko' maenga'.
[31] Daddi ba'na bakal ngarassa'agiya ollena lalakonna ban ja-sajjana se juba'.
[32] Oreng se ta' andhi' pangalaman bakal mateya polana ngenthengngagi sengko', ban oreng se budhu bakal ancora polana ta' parduli ka sengko'.
[33] Tape oreng se ngedhingngagi sengko' bakal salamedda. Odhi'na bakal amana ban ta' parlo tako'.”