[1] Tarema pa-apa se eajarragi sengko' reya, na', ban kaenga'e terros tang babala'an ka ba'na.
[2] Tetene apa se bicaksana ban ehteyarragi sopaja ba'na pahama ka maksodda.
[3] Onggu na', ehteyarragi sopaja ba'na andhi'a pekkeran se tajem ban nyo'on sopaja ba'na eparenge pangarteyan.
[4] Sare jareya pakantha se nyare emmas, serser pakantha se nyerser arta se tabendhem.
[5] Kalaban cara se kantha jareya ba'na bakal taowa apa artena tako' ka PANGERAN ban ba'na bakal olleya pangataowan parkara Allah.
[6] PANGERAN se apareng hekmat ban dhari Salerana manossa narema pangataowan ban pangarteyan.
[7] Oreng se atena berse ban tadha' calena eparenge partolongan ban pangaoban.
[8] Pangeran ajaga reng-oreng se adil, sarta ngaobi reng-oreng se taresna ka Salerana.
[9] Mon ba'na norodi sengko', na', ba'na tanto tao apa se adil, jujur ban bagus. Ba'na bakal taowa keya baramma carana ba'na kodu odhi'.
[10] Ba'na bakal daddiya bicaksana, ban pangataowanna ba'na bakal masennengnga atena ba'na.
[11] Pangarteyan ban kapenterranna ba'na bakal ngaobana ba'na,
[12] sarta lang-ngalange ba'na atoro' cara odhi' se ta' becce', bariya keya majau ba'na dhari reng-oreng se juba' colo'na.
[13] Reng-oreng jareya ta' endha' atoro' jalan se becce' e dhalem odhi'na; se epele jalan se petteng ban possa' dusana.
[14] Reng-oreng jareya nemmo kasennengngan dhari lalakonna se jahat.
[15] Reng-oreng jareya roce ban odhi'na ta' teppa'.
[16] Ba'na, na', tanto bisa nolak mon ecacae babine' se nakal se aehteyar ngangguy ca'-oca' se manes sopaja ba'na kapencoda.
[17] Babine' jareya ta' esto ka lakena sarta loppa ka janjina ka Allah.
[18] Mon ba'na entar ka bengkona, ba'na padha ban se ajalan ngamba'a pate. Entar ka jadhiya padha ban oreng se entar ka dunnyana oreng mate.
[19] Oreng se entar ka babine' jareya tadha' se abali ka jalan se nojju ka kaodhi'an.
[20] Daddi, na', toro' contona oreng se becce', ban mara ba'na odhi' menorot kasokanna Allah.
[21] Sabab oreng se odhi'na atoro' ka kasokanna Allah, iya areya reng-oreng se berse atena, jareya se ngennengngana nagara se ejanjiyagi Pangeran.
[22] Tape oreng se jahat ban dusa bakal ebuwanga kalowar dhari nagara jareya bi' Allah, akantha rebba se edabu' dhari tana.