[1] Ja' kaloppae apa se la eajarragi sengko' ka ba'na, na'. Kaenga'e terros tang parenta,
[2] sopaja ba'na lanjang omorra ban nyaman odhi'na.
[3] Ba'na papaggun parcaja sarta esto ka Allah ban sasamana. Kaenga'e jareya ban sempen e dhalem atena,
[4] sopaja ba'na ekaleburi ban eargai bi' Allah sarta manossa.
[5] Paparcaja ka PANGERAN kalaban gu-onggu ate, ban ja' ngandellagi pangarteyanna ba'na dibi'.
[6] Kaenga'e PANGERAN e dhalem ba'na alako apa'a bai, tanto Pangeran noduwagi ka ba'na carana odhi' se becce'.
[7] Ja' sampe' ba'na nganggep aba'na apenterran dhari se sabendherra; toro' dhabuna PANGERAN ban jauwi sabarang se jahat.
[8] Lalakon se kantha jareya bakal daddiya akantha obat ka ba'na se mabaras badanna ban masegger atena.
[9] Hormadi PANGERAN kalaban cara ngatorragi ka Salerana dhi'-andhi'na ba'na ban hasel bumena se paleng bagus,
[10] tanto bung-lombungnga ba'na pas possa' ban gandum, ban aeng anggurra ba'na bakal bannya'a sampe' baddhana ta' kabuwa'.
[11] Mon PANGERAN ngajar ba'na, na', tarema jareya menangka parengeddan, ban ja' sampe' ba'na arassa caremmet e dhalem atena lantaran pangajaran jareya.
[12] PANGERAN ngajar oreng se ekataresnae akantha oreng towa lake' se ngajar ana'na se ekaneserre.
[13] Ontong oreng se daddi bicaksana ban olle pangarteyan.
[14] Kaontonganna alebbiyan dhari se ekaolle dhari salaka, ban lebbi aji dhari emmas.
[15] Hekmat lebbi aji dhari mamatan; sabarang se ekaterro ba'na ta' ekenneng bandhingngagi ban hekmat jareya.
[16] Hekmat reya malanjang omor, madhateng kasogiyan ban kahormadan.
[17] Hekmat masenneng ban mataremtem odhi'na ba'na.
[18] Oreng se neggu'i hekmat bakal olleya odhi' se saongguna ban se senneng.
[19] Kalaban hekmat PANGERAN nyepta'agi bume; kalaban akkal buddina Salerana ngampar langnge'.
[20] Kalaban pangataowanna Salerana abadhi ber-somberra aeng e babana tana ban magili aengnga, abadhi ondhem e langnge' se magaggar ojan ka bume.
[21] Daddi, teggu'i hekmat ban partembangan se massa', na'. Ja' sampe' ocol,
[22] sopaja odhi'na ba'na bisa'a salamet -- lebur ban senneng.
[23] Ba'na bakal amana mon ajalan, ta' kera dhung-tatandhung.
[24] Mon tedhunga ba'na ta' kera tako', mon tedhung bakal ngeddha'a samalem benteng.
[25] Ba'na ta' osa tako' mon badha balai se dhateng sakaleng adha' akantha kaleng busbus, akantha se nebane oreng jahat.
[26] Sabab ba'na tanto ejaga bi' PANGERAN. Bi' Salerana ba'na ta' kera edina sampe' tabalusok ka jebbak.
[27] Mon ba'na nemmo kasempadan agabaya kabecce'an ka oreng se marlowagi kabecce'an jareya, ba'na ja' nolak kasempadan jareya.
[28] Ja' nyoro sasamana anante' sampe' lagguna mon ba'na bisa nolong sateya keya.
[29] Ja' aneyat apa'a bai marogiya sasamana se badha e seddi'na ba'na ban se parcaja ka ba'na.
[30] Ja' atokar ta' kalaban badha margana ban oreng se ta' tao atengka juba' ka ba'na.
[31] Ja' ere ate ka oreng se ngalakone kakerrasan, ban ja' nero tengkana reng-oreng jareya.
[32] Sabab PANGERAN baji' ka oreng se atengka juba', tape semma' ban oreng se loros odhi'na.
[33] PANGERAN abasto bengkona oreng jahat, tape aberkadi bengkona oreng se ta'at ka Salerana.
[34] Pangeran baji' ka oreng se angko, tape aberkadi oreng se andhap asor.
[35] Oreng bicaksana bakal sajana ro'om nyamana, tape oreng budhu sajan ecale oreng.