[1] Ja' asebbal parkara lagguna, sabab ba'na ta' tao apa se kadaddiyana dhaggi'.
[2] Ja' ngalemman aba' dibi', dina se ngalem me' oreng laen bai, la'-mala' reng-oreng se ba'na gi' ta' kennal.
[3] Bato ban beddhi reya gi' dhammang mon ebandhingngagi ban sake'na ate se esababbagi oreng budhu.
[4] Kapeggellan reya kejjem ban marosagan, tape ta' saapa mon ebandhing ban tamburuwan.
[5] Lebbi becce' malae rang-terrangan etembang kataresna'an se ta' eduduwagi.
[6] Kanca reya mokol kalaban kataresna'an, tape moso agellu' bi' racon.
[7] Mon kennyang, maske maddu etolak; mon lapar, se pae' ekarassa nyaman.
[8] Oreng se adina'agi bengkona, padha ban mano' se ondur dhari lebunna.
[9] Mennya' ro'om ban om-ro'oman laenna masenneng ate, bariya keya kabecce'anna kanca masegger sokma.
[10] Ja' paloppa ka kancana ba'na otabana kancana eppa'na. E dhalem kasossa'an ja' menta tolong ka taretanna; tatangga se semma' lebbi aguna etembang taretan se badha e jauna.
[11] Na', ba'na pabicaksana, sopaja sengko' senneng ban ngenneng nyaot mon badha oreng se nyale sengko' reya.
[12] Oreng bicaksana nyengla mon badha babaja, oreng budhu nyander sampe' calaka'.
[13] Sapa se endha' nanggung otangnga oreng laenna, dhi'-andhi'na kodu ekala' menangka tanggunganna janjina.
[14] Oreng se gu-laggu aberri' salam ka kancana epakaja sowarana, eanggep ngoca'agi la'nat.
[15] Bine se dujan atokaran akantha ojan se saare benteng toron ros-terrosan.
[16] Bine se kantha jareya ta' kera bisa esoro neng-enneng, akantha angen se ta' ekenneng tahan ban mennya' se ta' ekenneng pergem e tanang.
[17] Akantha baja se agangse baja, bariya keya manossa ajar dhari sasamana.
[18] Sapa se meyara bungkana tanto ngakan buwana. Bareng se ajaga lorana tanto eargai oreng laenna.
[19] E dhalem aeng ba'na nangale'e robana, bariya keya atena ba'na noduwagi sapa ba'na reya.
[20] E dunnyana oreng mate terros badha kennengngan; bariya keya pangaterrona manossa tadha' batessa.
[21] Apoy epangoji emmas ban salaka; oreng etemmo dhari pangalem se etarema aba'na.
[22] Oreng budhu maske epokol epace'kajana, ta' kera elang kabudhuwanna.
[23] Peyara pateppa' ebinna ba'na,
[24] sabab kasogiyan reya ta' kera salanjangnga, la'-mala' kakobasa'an kaangguy marenta ta' kera teptep salanjangnga keya.
[25] Rebba e teggal ban e gunong eketthok pas epakompol kaangguy ebinna ba'na jareya, tape sabatara jareya tombu rebba se anyar.
[26] Dhari buluna ba-dumbana ba'na olle kalambi, ban dhari pesse ollena ajuwal sabagiyan dhari embi'na ba'na bisa melle tana.
[27] Dhari embi'na se laen ba'na olle susu se ekenneng enom ba'na sabala sarta ban reng-barengnga ba'na.