[1] Vum Paul, engem Apostel vum Jesus Christus duerch de Wëlle vu Gott, un déi Helleg, déi zu Ephesos sinn a wéinst Christus Jesus trei sinn:
[2] Gnod sief mat iech a Fridde vu Gott, eisem Papp, an dem Här Jesus Christus.
[3] Gelueft sief de Gott a Papp vun eisem Här Jesus Christus, deen eis duerch Christus mat jidder geeschtlechem Segen am Himmel geseent huet.
[4] Hien huet eis och geseent, andeems hien eis duerch Christus auserwielt huet, éier d’Welt erschafe gouf, fir datt mir helleg an ouni Feeler a senger Präsenz kéinte sinn. Aus Léift
[5] huet hien eis duerch de Jesus Christus zur Adoptioun bestëmmt, fir seng Kanner ze ginn, esou wéi säi gudde Pleséier et gewollt huet.
[6] Esou gëtt seng herrlech Gnod gelueft, mat där hien eis duerch deen, deen hie gär huet, geseent huet.
[7] Wéinst senger hu mir duerch säi Blutt Erléisung, d’Verzeiung vun eisen Iwwertriedungen, well hie Gnod am Iwwerfloss huet.
[8] Déi Gnod huet hien eis duerch lauter Wäisheet an Asiicht räichlech geschenkt.
[9] Hien huet eis d’Geheimnis vu sengem Wëlle bekanntgemaach, esou wéi säi gudde Pleséier et gewollt huet, wéi hie sech dat am Viraus duerch Christus virgeholl hat.
[10] Gott verwalt nämlech d’Zäitaltere bis zu hirem vollstännegen Ofschloss, fir alles, wat am Himmel an op der Äerd ass, duerch hien, dat heescht duerch Christus, ënnert seng Leedung zesummenzebréngen.
[11] Duerch hie goufe mir virausbestëmmt, fir Gott ze gehéieren, nom Plang vun deem, deen alles nom Virsaz vu sengem Wëlle realiséiert,
[12] fir datt mir, déi mir scho virdrun op Christus gehofft haten, seng Herrlechkeet luewen.
[13] Nodeems dir d’Botschaft vun der Wourecht, déi d’gutt Noriicht ass an déi iech Rettung bréngt, héieren hat an u Christus gegleeft hutt, gouft och dir mam versprachenen hellege Geescht versigelt,
[14] deen en Akkont vun eiser Ierfschaft ass, bis Gott de Besëtz, deen hie kaf huet, erléist an dee Besëtz seng Herrlechkeet lueft.
[15] Dat ass och de Grond, firwat ech – nodeems ech vun ärem Glawen un den Här Jesus a vun ärer Léift fir all déi Helleg héieren hunn –
[16] net ophalen, Gott fir iech Merci ze soen, wann ech mech a menge Gebieder un iech erënneren.
[17] Ech bieden, datt de Gott vun eisem Här Jesus Christus, de Papp vun der Herrlechkeet, iech geeschtlech Wäisheet an Offenbarung gëtt, fir datt dir hie kennt.
[18] Ech bieden, datt d’Ae vun ärem Verstand erliicht ginn, fir datt dir erkennt, wat d’Hoffnung ass, zu där hien iech beruff huet, wat de Räichtum vu senger herrlecher Ierfschaft ass, déi op déi Helleg waart,
[19] a wéi onbegrenzt grouss seng Muecht ass, déi sech un eis, déi mir gleewen, duerch d’mächtegt Wierke vu senger Kraaft erweist.
[20] Dës Kraaft huet a Christus gewierkt, wéi si hie vun den Doudegen operstoe gelooss huet an hien zu senger Rietser am Himmel sëtze gedoen huet.
[21] Do steet hie wäit iwwert all Gewalt, Autoritéit, Muecht an Herrscher an iwwert jidder Numm, deen ernimmt gëtt, net nëmmen an dësem Zäitalter, mee och an deem, deen nach kënnt.
[22] Dës Kraaft huet him alles ënnerworf an ënnert seng Féiss geluecht, an hien als Kapp iwwert alles gesat fir d’Gemeinschaft,
[23] déi säi Läif ass an déi de vollstännegen Ausdrock vun deem ass, deen alles an allem fëllt.