[1] Ме, Кристослӧн морт, висьтала быльсӧ и менам сьӧлӧмӧ ӧтлаын Вежа Ловкӧт висьталӧ: ме ог бӧбӧт.
[2] Ме ёна тӧждіся да сьӧлӧмӧ дугдывтӧг висьӧ асланым отир понда.
[3] Воннэзӧ понда меным бы аслым лоны ёрдӧмӧн да янсӧтӧмӧн Кристосыс дынісь, отсалас кӧ эта нылӧ.
[4] Нія Израиль отир. Нійӧ Еныс пуктӧм Аслас зоннэзӧ, нылӧ мыччалӧм Ассис югьялӧмсӧ. Ныкӧт Сія керлӧм йитӧттэз. Нылӧ вӧлі сетӧм Туйдӧтыс. Нійӧ сувтӧтӧмась Енлӧн Вежа Керкуын уджавны, нылӧ Еныс и кӧсйӧм вӧлі уна.
[5] Эта увтырлісь айесӧ быдӧнныс тӧдӧны. Ны увтырись морт моз чужис и Кристосыс. Сія ─ быдӧс вылын Ен. Сылӧ пырся-пыр ошкӧм! Аминь.
[6] Он эд висьтав: Енлӧн висьталӧм сьӧрті эз пет. Израиль айсянь чужӧммес абу эд быдӧнныс Израиль отир.
[7] Да и Авраамсянь чужӧммес абу быдӧнныс сылӧн челядь. Еныс тай Авраамыслӧ висьтавлӧм: «Тэнат увтырӧн пондасӧ шуны дзир Исак зоныт вужсянь чужӧммесӧ».
[8] Сідзкӧ, Авраамсянь чужӧммес абу быдӧнныс Енлӧн челядь. Енлӧн челядьӧн лыддьӧны Сы кӧсйӧм сьӧрті чужӧммесӧ.
[9] Еныслӧн кӧсйӧмыс вӧлӧм сэтшӧм: «Мӧдпыр эта жӧ кадӧ локта, сэк Сарраыслӧн чужас зон».
[10] Абу эд дзир ӧтік эта кӧсйӧмыс. Сідз вӧлӧм и Ревеккакӧт. Ӧтік кадӧ миян увтырлӧн Исак айсянь сія сьӧктӧм вӧлі кык зонӧн.
[11] Зонкаэс абу керӧмась бурсӧ, абу керӧмась умӧльсӧ, абу на вӧлі шогмӧмась да. Эшӧ сэк Еныс вӧлі висьталӧм Ревеккаыслӧ: «Ыджытжыкыс лоас учӧтжыкыс кипод увтын». Сідз висьталӧмнас Еныс мыччалӧм: бӧрйӧмыс Сы сайын. Сія мортсӧ оз кор сылӧн керӧммез сьӧрті, корӧ Аслас бӧрйӧм сьӧрті.
[13] Вежа Гижӧтас сідз висьталӧм: «Яковсӧ Ме радейті, а Исавыс син вылӧ эз ков».
[14] Мый сэтчӧ шуам? Еныс мыйкӧ умӧльӧ керис? Огӧ сідз шуӧ.
[15] Моисейлӧ Еныс сідз висьтавлӧм: «Кинкӧ дынӧ Ме лоа небыт сьӧлӧма. Кинӧскӧ Ме жалейта. Кера, кыдз Меным колӧ».
[16] Сідзкӧ, быдӧс керсьӧ Енлӧн небыт сьӧлӧмсянь, оз мортлӧ колӧмсянь да сылӧн вынсьӧтчӧмсянь.
[17] Вежа Гижӧтсис лыддьӧтам: Египетісь фараонлӧ Еныс висьталӧм: «Тэнӧ Ме сувтӧті сы понда, медбы тэ вылын мыччавны Ассим вынӧс. Сысянь Менчим нимӧс пондасӧ тӧдны быдсӧн му пасьта».
[18] Сідзкӧ, Еныс небыт сьӧлӧма Сылӧ колан морт дынӧ. Кинӧс колӧ лӧгӧтны, кольӧ лӧгӧн.
[19] Тэ меным висьталан: «Мый понда нӧ сэк Еныс менӧ пуктӧ умӧль керисьӧ? Кин вермас сувтны паныт Енлӧн висьталӧмлӧ?»
[20] Морт, кин тэ сэтшӧмыс, Еныскӧт кутчисян етшасьны? Керӧмыс вермас разь висьтавны керисьыслӧ: мыля тэ менӧ сэтшӧмӧ керин?
[21] Оз разь вермы гырнич керисьыс сёйсис керны, мый сылӧ колӧ? Ӧтік сёй торсис сія вермӧ керны кык доз: ӧтсӧ ─ бур дона доз, мӧдсӧ ─ пыр видзан доз.
[22] Сідз вермӧ керны и Еныс. Сія мӧдӧ мыччавны Ассис лӧгсӧ да вынсӧ. Но Сія ыджыт мылаӧн видзчисьӧ, эз понды жугдыны Сійӧ лӧгӧтлісь доззэсӧ, кӧдна лӧсьӧтӧмась жугдыны.
[23] Но Ассис вынася-вына югьялӧмсӧ Сія лӧсьӧтчӧм мыччавны нія доззэз вылын, кӧдна дынӧ Сія небыт сьӧлӧма. Нійӧ доззэсӧ Еныс одзжык ни лӧсьӧтчӧм тыртны Аслас югьялӧмӧн.
[24] Этна доззэс ─ мийӧ. Еныс Ачыс миянӧс корис кыдз иудей отирись, сідз и мӧдік отирись.
[25] Осия небӧгын гижӧм тай: ─ Аслам отирӧн шуа отирӧс, кӧдна эзӧ вӧлӧ Менам. Шуа донаэзӧн, кӧдна вылӧ одзжык эг и видзӧт.
[26] Сэтӧн, кытӧн нылӧ вӧлі висьталӧм: «Тійӧ абу Менам отир», сэтчин жӧ пондасӧ шуны: «Тійӧ ловья Енлӧн челядь».
[27] Енсянь юӧртісь Исай сідз висьталӧм Израильыс йылісь: ─ Лоасӧ кӧ Израильыслӧн зоннэс саридзын песӧк мымда, ны коласісь мезмас дзир кытшӧмкӧ тор.
[28] Дӧсвидзисьыс чожа му вылас уджсӧ ештӧтас. Аслас висьталӧм кыв сьӧрті веськыта керас.
[29] Исайыс одзланьсясӧ висьтавлӧм и сідз: ─ Мийӧ пӧртчимӧ бы Содомӧ, лоимӧ Гоморра кодьӧсь, локтімӧ бы разьсьӧмӧдз, Дӧсвидзись Саваофыс эз кӧ коль бы бӧрйӧммесӧ.
[30] Мый сэтчӧ вермам висьтавны? Ентӧдтӧммес тай эзӧ кошшӧ Ен сьӧрті веськыта олӧмсӧ, но адззисӧ. Веритӧмныс понда Еныс керӧ нійӧ веськыта оліссезӧн.
[31] А Израиль отирыс Ен сьӧрті веськыта олӧмсӧ кошшис Туйдӧтсис, да эз адззы.
[32] Мыля нія эзӧ адззӧ? Нія эзӧ веритӧ. Мӧдісӧ асьныс Ен сьӧрті веськыта олӧмсӧ шедтыны Туйдӧт сьӧрті керӧмнаныс. Сійӧн чужйисисӧ «падмӧтан изас».
[33] Эта йылісь Гижӧтас сідз висьталӧм: ─ Сион вылас сувтӧта падмӧтан из. Сэтчӧ унаӧн чужйисясӧ. Сы кузя унаӧн усясӧ. А быд мортлӧ, кин Сылӧ веритӧ, оз понды ковны гӧрдӧтны.