[1] Быд морт ась кывзісьӧ вылынжыка сувтӧтӧммесӧ. Юралӧмсӧ эд Ен лӧсьӧтӧм. Быд юралӧмыс Ен шуӧм сьӧрті сувтӧтӧм.
[2] Сійӧн, кин оз кывзісь юраліссесӧ, сія оз кер Енӧн лӧсьӧтӧм сьӧрті. Сідз кериссес асьнысӧ вайӧтӧны Енлӧн суд вылӧ.
[3] Юраліссезісь полӧны умӧльсӧ керикӧ, озӧ бурсӧ керикӧ. Мӧдан кӧ овны юраліссезісь повтӧг, кер бурсӧ. Сэк нія тэнӧ ошкасӧ.
[4] Юралісьыс ─ Енлӧн кысъялісь. Сія сувтӧтӧм, медбы тэныт вӧлі бур. Умӧльсӧ кӧ керан, пов. Сія эд абу весь сувтӧтӧм отирыс вылын. Сія Енлӧ кысъялӧ, отирыслӧ вештӧ умӧльсӧ керӧммезныс понда.
[5] Сійӧн нійӧ колӧ кывзісьны сьӧлӧмныт висьталӧм сьӧрті, а не дзир мыжйӧмись полӧмсянь.
[6] Юраліссес Енлӧ кысъялӧны. Сетӧм уджсӧ быд кадӧ керӧны. Сійӧн тійӧ и воттэсӧ вештат.
[7] Сідзкӧ, быдыслӧ сетӧ, мый колӧ: кинлӧ вот вештыны ─ вештӧ вотсӧ, кинӧс бурӧ пуктыны ─ бурӧ пуктӧ.
[8] Ӧтамӧдӧс радейтӧмся некинлӧ немӧн эдӧ кольччӧ одзӧсын. Мӧдік мортӧс радейтісьыс эд быдӧс керис Туйдӧтыс сьӧрті.
[9] Тійӧ тӧдат сетӧм тшӧктӧммесӧ: «гозйӧн овтӧн ӧтамӧдныт сайсянь эд ветлӧтӧ», «эн вий», «эн гусясь», «морт вылӧ вӧвлытӧмсӧ эн баит», «мӧдіклісь мыйкӧ босьтны эн ӧзйӧтчы» да и мӧдік тшӧктӧммесӧ. Нія тшӧктӧммес быдӧс петӧны эстісь: «Матісьтӧ радейт асьтӧ моз».
[10] Радейтӧмыс оз кер умӧльсӧ матісьыслӧ. Сійӧн радейтісь мортыслӧн быдӧс петӧ Туйдӧтас висьталӧм сьӧрті.
[11] Сідзкӧ, тійӧ тӧдат, локтіс кад миянлӧ саймыны онісь. Ӧні эд мезмӧмыс матынжык ни, видзӧтны кӧ веритны пондӧмным кадсянь.
[12] Ойыс чулаліс, луныс сибаліс. Сідзкӧ, чапкамӧ ойыслісь умӧль керӧммесӧ да кышалам луныслісь пессян-сайӧвтчаннэсӧ.
[13] Лунӧн моз пондам овны бытшӧма: огӧ пондӧ кодавны, огӧ лэдзчисьӧ, огӧ пондӧ видчыны, огӧ пондӧ кыскасьны, огӧ пондӧ завидуйтны.
[14] Тіян паськӧмӧн ась лоӧ Дӧсвидзись Кристос Исусным. Вывтырныт сьӧрын видзӧтӧм коста эд ӧзйӧтчӧ быдӧс керны сы сьӧрті.