[1] Веритӧмным понда Еныс миянӧс керис веськыта оліссезӧн. Мийӧ Еныскӧт бурасим Дӧсвидзись Кристос Исус пыр.
[2] Сы пыр веритӧмнаным босьтім и бурсетӧмсӧ, кӧдаын ӧні олам. Мийӧ надейтчам локны Енлӧн югьяланінӧ, сійӧн ӧні гажӧтчам.
[3] Мийӧ гажаӧсь и пессьӧм-мырсьӧмным коста. Мийӧ эд тӧдам: сысянь мыланым вынсялӧ.
[4] Бырлытӧм мылаӧн видзсьӧмсянь велалам мунны пессьӧм-мырсьӧм пыр. Сысянь вынсялӧ надеяным.
[5] Мийӧ огӧ видзчисьӧ бурсӧ весись. Еныс эд сетіс миянлӧ Вежа Ловсӧ да Сы пыр кисьтіс миян сьӧлӧммезӧ Ассис радейтӧмсӧ.
[6] Мийӧ асьным нем эгӧ вермӧ. Сэк Енӧн висьталӧм кадӧ Кристосыс куліс Ентӧг оліссез понда.
[7] Ен сьӧрті веськыта олісь понда кулас я кинкӧ отирыс коласісь? Буди, бурсӧ керись понда кинкӧ и вермас кувны.
[8] А Кристосыс эд куліс миян понда, кӧр мийӧ олім умӧльсӧ керӧммезнаным. Сійӧн Еныс мыччаліс миянлӧ Ассис радейтӧмсӧ.
[9] Кристослӧн кисьтӧм вирӧн мийӧ ӧні лоим Ен сьӧрті веськыта оліссезӧн. Мийӧ тӧдам: Сы отсӧтӧн мезмам локтан лӧгсис.
[10] Мийӧ одзжык Еныс вылӧ лэбтісьлім. Но миян понда куліс Сылӧн Зоныс. Сы кулӧм пыр мийӧ Еныскӧт бурасим. Ӧні мийӧ, Еныскӧт бурасьӧм бӧрас, мезмам ни Кристосыс олӧм пыр.
[11] Но эта абу быдӧс. Миян гажным и Енсянь, миян Дӧсвидзись Кристос Исус отсӧтӧн эд мийӧ Сыкӧт бурасим.
[12] Му вылас умӧль керӧмыс локтіс ӧтік мортсянь. Умӧль керӧмыссянь локтіс кулӧм. Сія кулӧмыс вуджис быд морт вылӧ, быдӧнныс эд умӧльсӧ керисӧ.
[13] Му вылас умӧльсӧ керисӧ и Туйдӧтсӧ сеттӧдз. Абу кӧ Туйдӧтыс, сэк он вермы висьтавны, мортыс пӧ умӧльӧ керис.
[14] Адамыс Енсӧ абу кывзісьӧм, умӧльӧ керӧм. А Адамыссянь Моисейӧдз кулан выныс эд вӧлӧм и ны вылын, кин абу керӧм Адамыс моз. Адамыслӧн оланыс мыччалӧ одзланьсясӧ ─ Локтісьсӧ.
[15] Еныслӧн бурсетӧмыс эд абу Адамлӧн умӧль керӧм кодь. Ӧтік мортлӧн умӧльсӧ керӧм кузя ӧддьӧн уна кулісӧ. А Еныслӧн бурсетӧмыс ─ козин. Ӧтік Морт, Кристос Исус, сійӧ лыдтӧг вайис уналӧ.
[16] Ӧтік мортлӧн умӧльсӧ керӧмсянь аркмӧмыс да Енлӧн бурсетӧмсянь аркмӧмыс абу ӧткодьӧсь. Ӧтік умӧль керӧмыс вайис отирлӧ Енлӧн суд вылын мыжйӧм. А бурсетӧмсӧ Еныс козьналӧ. Аслас бурсетӧмӧн Сія проститӧ уна умӧль керӧммез да мортсӧ керӧ веськыта олісьӧн.
[17] Дзир ӧтік мортлӧн лёк керӧмсянь пондӧм юравны кулӧмыс. Сэк мымдаӧн вынажык ӧтік Мортлӧн, Кристос Исуслӧн, бурсетӧмыс! Еныслісь этӧ дона бурсетӧм козинсӧ да Ен сьӧрті веськыта олӧмсӧ босьтіссес пондасӧ овны да юравны Енкӧт.
[18] Сідзкӧ, ӧтік мортлӧн лёк керӧмыс быдӧс отирсӧ вайӧтіс суд вылын мыжйӧмӧдз. А ӧтік мортлӧн веськыта керӧм понда быд морт вермӧ лоны Ен сьӧрті веськыта олісьӧн да босьтны виль олан.
[19] Адамыс эз кывзісь Енсӧ, сы кузя быдӧс отирыс лоисӧ умӧльсӧ кериссезӧн. А Исусыс быдӧс керис Енсӧ кывзісьӧмӧн. Сы кывзісьӧмсянь унаӧн лоасӧ Ен сьӧрті веськыта оліссезӧн.
[20] Туйдӧтыс вӧлі сетӧм мыччавны, кытшӧм уна умӧльсӧ керӧны отирыс. Кытӧн уна умӧль керӧмыс, сэтӧн Еныслӧн бурсетӧмыс унажык.
[21] Умӧльсӧ керӧммес вайӧтлісӧ кулӧмӧдз. Ӧні бурсетӧм вынӧн Ен сьӧрті веськыта олӧмыс вайӧтӧ пырся оланӧ. Сія локтӧ Кристос Исуссянь, миян Дӧсвидзисьсянь.