[1] Тіянӧс тӧдсӧта миян Фива сойнымкӧт. Сія Кенкреяын вичкуись отсасись.
[2] Дӧсвидзись нимӧн босьтӧ сійӧ дынаныт. Сідз эд керсьӧ вежа отир коласын. Тіян дынын олӧм коста сылӧ быдӧсын отсалӧ. Ачыс сія меным да и уналӧ отсаліс.
[3] Пым юӧр висьталӧ Прискиллалӧ Акилыскӧт, мекӧт Кристос Исуслӧ уджаліссезлӧ.
[4] Нія эд вермисӧ ассиныс юрнысӧ пуктыны ме понда. Ме нійӧ буркывта отсӧтыс понда, да и мӧдіклаись вичкуэз буркывтӧны. Пым юӧр ыстам и гортаныс ӧксьывлісь вежа отирлӧ ─ гортісь вичкулӧ.
[5] Юӧр висьталӧ менам дона Епенет ёртӧлӧ. Акаияын сія Кристослӧ медодзза веритісь.
[6] Юӧр висьталӧ Мариамлӧ. Сія уна отсасис миянлӧ.
[7] Пым юӧр висьталӧ Андрониклӧ да Юниялӧ. Мийӧ эд ӧтік отирись, ӧтлаын пукалім Кристосыс понда. Апостоллэс коласын нія бурӧ пуктӧм отир. Нія и Кристослӧ пондісӧ веритны месся одзжык.
[8] Висьталӧ юӧр Амплийлӧ, Дӧсвидзисьсянь менам дона вонлӧ.
[9] Юӧр висьталӧ Урбанлӧ, Кристослӧ миянкӧт уджалісьлӧ. Сідз и менам дона Стакий ёртлӧ.
[10] Пым юӧр висьталӧ Апеллеслӧ. Кристосыс понда сія уна сьӧкыт пыр муніс. Юӧр висьталӧ Аристовул гортын оліссезлӧ.
[11] Юӧр висьталӧ менам увтырись Иродионлӧ. Пым юӧр висьталӧ Наркис гортісь Дӧсвидзиськӧт ӧтлаасьӧммеслӧ.
[12] Юӧр висьталӧ Трифена да Трифоса сойезлӧ, Дӧсвидзисьлӧн уджаліссезлӧ. Пым юӧр дона Персида сойнымлӧ. Сія эд уна вын пуктіс Дӧсвидзисьлӧн уджӧ.
[13] Юӧр висьталӧ Руфослӧ, Дӧсвидзисьлӧн бӧрйӧмлӧ, да сы мамлӧ, кӧда и меным мам туйӧ.
[14] Юӧр висьталӧ Асинкритлӧ, Флегонтлӧ, Ермлӧ, Патровлӧ, Ермийлӧ да ныкӧт уджалісь воннэзнымлӧ.
[15] Пым юӧр висьталӧ Филологлӧ, Юлиялӧ, Нирейлӧ сойыскӧт, Олимпанлӧ да ны дынісь быдӧс вежа отирлӧ.
[16] Воннэзӧ, окыштӧ ӧтамӧднытӧ вежа окалӧмӧн. Пым юӧр тіянлӧ быд Кристос вичкусянь.
[17] Кеймися тіян одзын. Воннэзӧ, видзӧтлӧ вичкусӧ янсӧтліссез, ылӧтліссез сьӧрын. Нія эд отирсӧ кежӧтӧны веритӧмсис. Ны дынсянь видзсьӧ ылынжыка.
[18] Сэтшӧммес озӧ уджалӧ миян Дӧсвидзись Кристос Исуслӧ. Нія уджалӧны асланыс гырклӧ. Басӧка да ылӧтлӧмӧн баитӧмнаныс нія бӧбӧтлӧны кокнита веритіссесӧ.
[19] Тійӧ быдӧс керат Кристослӧн велӧтӧм сьӧрті. Эта йылісь быдыс тӧдӧ. Сійӧн ме гажма тіян йылісь касьтывтӧн. Лоӧ перытӧсь керны бурсӧ, жагӧнӧсь керны умӧльсӧ.
[20] Лӧньсӧ сетісь Еныс чожа уськӧтас сотанасӧ тіян коккез увтӧ. Миян Дӧсвидзись Кристос Исуслӧн бурсетӧмыс тіянкӧт! Аминь.
[21] Тіянлӧ юӧр ыстӧны мекӧт уджалісь Тимофей да менам увтырись Луций, Иасон, Сосипатр.
[22] Пым юӧр тіянлӧ ыста и ме, Тертий, Дӧсвидзисьсянь тіян вон. Этӧ гижӧтсӧ ме гижи Павелыс висьтавлӧм бӧрсянь.
[23] Тіянлӧ юӧр ыстӧ менӧ гортас видзись Гай. Сы ордын ӧксьывлӧ быдӧс вичкуыс. Юӧр тіянлӧ ыстӧны Кварт вон да карись сьӧм видзись Ераст.
[24] Миян Дӧсвидзись Кристос Исуслӧн бурсетӧмыс ась лоас тіянкӧт быдӧнныткӧт! Аминь.