[1] Воннэзӧ, менам этна кыввезӧ Туйдӧтсӧ тӧдіссезлӧ. Тійӧ эд тӧдат: Туйдӧтыслӧн выныс морт вылын сэтчӧдз, кытчӧдз мортыс ловья.
[2] Видзӧтам этӧ: Туйдӧтас висьталӧм сьӧрті инь домалӧм жӧникыс бердӧ. Жӧникыс кӧ кулас, сэк сія Туйдӧтыс сьӧрті ӧтлаасьӧмсис мезмӧ.
[3] Ловья жӧникыс дырни петас кӧ мӧдік сайӧ, сэк сія лоӧ жӧник сайсянь ветлӧтісьӧн. Кулас кӧ жӧникыс, сэк сійӧ Туйдӧтыс оз ни видз. Сэк петас кӧ мӧдік сайӧ, сія оз ло жӧник сайсянь ветлӧтісьӧн.
[4] Воннэзӧ, сідз и тійӧ: Кристослӧн вывтырӧ ӧтлаасит да Сыкӧт куліт. Сійӧн мезмит Туйдӧтыс вын увтісь. Ӧні тійӧ Мӧдіклӧн, кулӧмись Ловзьӧмлӧн, медбы вайны Еныслӧ бур воӧм.
[5] Одзжык мийӧ керим ковтӧмсӧ вывтырным ӧзйӧтчӧм-кыскӧм сьӧрті. Умӧльсӧ керны ӧзйӧтчӧммес керисӧ ассиныс уджнысӧ вывтыраным быдлаын. Туйдӧтыс ызйӧтліс миянӧс керны умӧльсӧ. Миян керӧмным вайӧтліс кулӧмас.
[6] Ӧні мийӧ кулім Туйдӧтыслӧ, мезмим Сы кӧртӧттэзісь. Сія миянӧс оз ни видз. Мийӧ уджалам Еныслӧ вильмоза, Ен Лов сьӧрті, огӧ уджалӧ одззамоз, Туйдӧтас гижӧм сьӧрті.
[7] Мый висьталам? Туйдӧтыс разь умӧль керӧм? Абу эд сідз. Туйдӧтыстӧг ме бы эг и тӧд, мый сія умӧль керӧмыс. Туйдӧтыс тай висьталӧ: «Эн ӧзйӧтчы босьтны мӧдіклісь». Этӧ босьтны ӧзйӧтчӧмсӧ Туйдӧтыстӧг ме эг бы и вежӧрт.
[8] Туйдӧтыс тшӧктӧмись умӧльыс керис мог, медбы ӧзйӧтны меын быдпӧлӧс ковтӧм колӧмсӧ. Туйдӧтыстӧг умӧль керӧмыс вынтӧм да кулӧм.
[9] Одзжык ме олі Туйдӧтыстӧг. Туйдӧтсис тшӧктӧммесӧ тӧдӧм бӧрсянь ме вежӧрті: ме уна кера умӧльсӧ
[10] и муна кулӧмас. Туйдӧтлӧн тшӧктӧммезлӧ коліс вайны миянлӧ олан. Сія тай менӧ вайӧтіс кулӧмӧдз.
[11] Умӧль керӧмыс босьтіс Туйдӧтсис тшӧктӧмсӧ да сійӧн менӧ бӧбӧтіс. Сы отсӧтӧн менӧ вийис.
[12] Сетӧм Туйдӧтыс тшӧктӧммезнас вежа. Тшӧктӧммес висьталӧмась веськыта, нія бурӧсь.
[13] Сідзкӧ, бурыс разь вайӧтіс менӧ кулӧмӧдз? Эз эд. Умӧль керӧмыс босьтіс бурсӧ да сы отсӧтӧн вайӧтіс менӧ кулӧмӧдз. Сідз сія мыччаліс асьсӧ, кытшӧм сія. Сідзкӧ, Туйдӧтісь тшӧктӧммез сьӧрті мийӧ адззам, кытшӧм лёкся-лёк умӧль керӧмыс.
[14] Мийӧ тӧдам, Туйдӧтыс сетӧм Ен Ловсянь. Ме тай дзир вывтыра морт, умӧль керӧмыс видзӧ менӧ аслас кӧртӧттэзын.
[15] Ачым ог вежӧрт, мый кера: мый меным колӧ, ог кер. Ме кера сійӧ, кӧда син вылӧ оз ков.
[16] Кера кӧ сійӧ, мый ог бы кер, сэк ме вежӧрта: Туйдӧтыс бур.
[17] Ме ачым ог ни бы умӧльсӧ кер, менӧ кыскӧ ме пытшкын поздісьӧм умӧль керӧмыс.
[18] Ме эд тӧда: меын, ылалӧм вывтырам, абу бурыс. Бурсӧ ме кера бы, да ог вермы.
[19] Бурсӧ, кӧдӧ кера бы, ог кер, а умӧльсӧ, кӧдӧ ог бы кер, кера.
[20] Кера кӧ сійӧ, мый ог бы кер, сія керӧмыс абу ассяням. Сія петӧ меын поздісьӧм умӧль керӧмсянь.
[21] Ме казялі, менам петӧ сідз: лӧсьӧтча кӧ керны бурсӧ, умӧльыс сэтӧн ни.
[22] Ме адзза: Енлӧн Туйдӧтсянь сьӧлӧм вылам долыт.
[23] А вывтырам тай адзза мӧдік туйдӧт. Сія менам сьӧлӧмлӧ паныт лэбтісьӧ. Менам вывтырын поздісьӧм умӧль керӧмыс видзӧ менӧ домӧттэзын аслас туйдӧтӧн.
[24] Шудтӧм ме морт! Кин менӧ мездас эта кулан вывтырись?
[25] Ошка ассим Енӧс миян Дӧсвидзись Кристос Исус понда, Сія эд этӧ керӧ! Сідзкӧ, ме сэтшӧм морт: Менам сьӧлӧмӧ кывзісьӧ Енлісь Туйдӧтсӧ, а вывтырӧ ─ умӧль керӧмлісь туйдӧтсӧ.