[1] Веритӧмас вынтӧм мортсӧ дынаныт босьтӧ сэтшӧмӧн, кытшӧм сія эм. Сыкӧт эд етшасьӧ мӧдмоза вежӧртӧмыс кузя.
[2] Мукӧдыс тӧдӧ: позьӧ сёйны быдӧс, а веритӧмас вынтӧмыс сёйӧ дзир карч.
[3] Быд сёян сёйисьыс ась оз пукты асьсӧ вылына мортыс одзын, кӧда быд сёянсӧ оз сёй. Бӧрйисьӧмӧн сёйисьыс ась оз осудит быдӧс сёйисьсӧ. Еныс эд и сійӧ босьтӧм Аслас челядьӧн.
[4] Кин тэ сэтшӧмыс, мӧдіклісь рабсӧ осудитісь? Усьӧ сія, сулалӧ я ─ сылӧн Кӧзяиныс сійӧ тӧдӧ. Сія пондас сулавны, Еныслӧн выныс эд эм сійӧ лэбтыны.
[5] Мукӧдыс кытшӧмкӧ луннэз пуктӧны вежалуннэз туйӧ. Мукӧдыслӧ быд лун ӧткодь. Быдӧнныт керӧ вежӧртӧмныт сьӧрті.
[6] Морт кытшӧмкӧ лун пуктӧ кӧ вежалунӧ, Ен сьӧрті керӧм понда пуктӧ. Быд лун ӧткодьӧн лыддись мортыс луннэсӧ Ен сьӧрті керӧм понда ӧткодьсьӧтӧ. Быдкодь сёян сёйись мортыс Ен сьӧрті керӧм понда сёйӧ. Сія эд Енсӧ буркывтӧ. Мортыс оз кӧ сёй кытшӧмкӧ сёян, Ен сьӧрті керӧм понда оз сёй. И сія Енсӧ буркывтӧ.
[7] Миян коласісь эд некин оз ов ас пондасис, некин и оз кув ас понда.
[8] Олам кӧ, Ен понда олам, кулам кӧ, Ен понда кулам. Сідзкӧ, олам я, кулам я ─ мийӧ пыр Еныслӧн.
[9] Кристосыс эд сы понда и куліс да ловзис, медбы юравны кулӧммез да ловьяэз вылын.
[10] Мый тэ вонтӧ осудитан? А тэ, мый вонтӧ абутӧм туйӧ пуктан? Мийӧ эд быдӧнным сувтам Кристосыс одзӧ суд вылас.
[11] Вежа Гижӧтас висьталӧм: ─ Дӧсвидзись шуӧ: кыв сета, Ме одзын пидзӧс вылас сувтас быд мортыс. Быд ӧмись петас Енсӧ ошкӧмыс.
[12] Сідзкӧ, быдыс пондас Еныс одзын ас пондасис кыв видзны.
[13] Сэсся огӧ ни пондӧ ӧтамӧднымӧс осудитны. Буржык видзӧтны ас сьӧраныт, кыдз бы воннытӧ эдӧ вайӧтӧ падмӧмӧдз да ылалӧмӧдз.
[14] Дӧсвидзись Исускӧт ӧтлаасьӧмсянь ме бура тӧда: быд сёян сӧстӧм, абу сэрпӧсь. Мортыс кӧ мыйкӧ шуӧ сэрпӧсьӧн, сэк сія сэрпӧсь дзир сылӧ.
[15] Тэнат сёяныт вонтӧ тӧждісьӧмӧдз кӧ вайӧтӧ, сэк тэнат абу радейтӧмыт. Аслат сёянӧн эн уськӧт сійӧ, кин понда куліс Кристосыс.
[16] Отирыс ась умӧля озӧ баитӧ сы йылісь, мый тійӧ шуат бурӧн.
[17] Енлӧн Юралӧмыс эд абу сёян да юан. Сія эд Вежа Ловсянь Ен сьӧрті веськыта олӧм, лӧнь да гаж.
[18] Кин этадз кысъялӧ Кристосыслӧ, сія мортыс Еныс сьӧрті, да и отирыс сійӧ бурӧ пуктӧны.
[19] Сідзкӧ, пондам кошшыны сійӧ, мый вайӧтӧ ас коласаным лӧсявны да ӧтамӧднымӧс вынсьӧтны.
[20] Сёяныс кузя эн разь Еныслісь уджсӧ. Быдӧс сёяныс сӧстӧм, но умӧль сія мортлӧ, кӧда аслас сёянӧн мӧдікӧс вайӧтӧ усьӧмӧдз.
[21] Буржык лоас, он кӧ понды сёйны яй, юны вина да он понды керны сійӧ, мыйсянь тэнат воныт падмӧ, ылалӧ али вынтӧмсялӧ.
[22] Эта йылісь тӧдӧмтӧ, веритӧмтӧ видз ас пытшкат Ен одзын. Шуда мортыс, асьсӧ оз кӧ вид бӧрйӧм-керӧмыс понда.
[23] Мукӧдыс юрас видзӧ: позьӧ сёйны, поди оз? Сія оз тӧд, мый керны, да сёйӧ. Сійӧн сія мортыс судитӧм ни. Вериттӧг керӧмыс ─ умӧль керӧм.
[24] Тіянӧс вынсьӧтісь Енлӧ ошкӧм! Ме висьтаси тіянлӧ Бур Юӧрсӧ, Кристос Исуслісь велӧтӧмсӧ, осьті тӧдлытӧмсӧ. Эта йылісь одзза каддэзсянь эзӧ баитӧ.
[25] Ӧні сія вӧлі мыччалӧм. Сы йылісь гижӧм Енсянь юӧртіссез гижӧттэзын. Пырся олісь Ен тшӧктӧм сьӧрті ӧні сія юӧртӧм быд отирлӧ, медбы вайӧтны нійӧ кывзісьӧмӧдз да веритӧмӧдз.
[26] Дзир Ӧтіклӧ, ыджыт мывкыда Енлӧ, Кристос Исус пыр ошкӧмыс ась быд кадӧ горалӧ! Аминь.