[1] Миянлӧ, веритӧмас вынаэслӧ, колӧ ыджыт мылаӧн видзсьыны веритӧмас вынтӧммескӧт сорасьӧмныс коста. Оз ков тӧждісьны дзир ас пондасиным.
[2] Миянлӧ быдӧннымлӧ колӧ тӧждісьны матісьным понда, медбы сылӧ вӧлі буржык. Сысянь нылӧн веритӧмныс вынсялӧ.
[3] Кристосыс эд эз тӧждісь Ас йывсис. Вежа Гижӧтас тай висьталӧм: «Тэнӧ видіссеслӧн видӧммезныс усисӧ Ме вылӧ».
[4] Одзза каддэзӧ быдӧс гижӧмыс вӧлі гижӧм, медбы миянӧс велӧтны да бурӧтны. Гижӧтас висьталӧмыс миянӧс вынсьӧтӧ. Сійӧн мийӧ мыла быртӧг надейтчам Ен вылӧ.
[5] Еныс сетӧ мыла да вынсьӧтӧ. Ась сія отсалӧ тіянлӧ лӧсявны ӧтамӧдныткӧт Кристос Исуслӧн велӧтӧм сьӧрті,
[6] медбы тійӧ быд сьӧлӧмсянь ӧтік ӧмись ошкит Енсӧ, миян Дӧсвидзись Кристос Исуслісь Айсӧ.
[7] Кристосыс тіянӧс босьтіс Аслас отирӧн. Сідзкӧ, и тійӧ Енсӧ ошкӧм могись босьтӧ ӧтамӧднытӧ сьӧлӧманыт.
[8] Ме вежӧрта сідз: Кристос Исусыс сувтіс кысъявны иудей отирыслӧ, медбы айезнымлӧ кӧсйӧмсӧ пыртны оланӧ. Сія локтіс мыччавны: Еныс оз веж Ассис кывсӧ.
[9] Сія локтіс и мӧдік отир понда, медбы и нія ошкисӧ Енсӧ нылӧ небыт сьӧлӧмсянь керӧм понда. Эта йылісь Вежа Гижӧтас тай висьталӧм: ─ Понда ошкыны Тэнӧ мӧдік отир коласын. Понда сьылӧтны Тэнчит нимтӧ.
[10] Мӧдіклаын гижӧм: ─ Мӧдік отир, гажӧтчӧ Енлӧн отиркӧт!
[11] Гижӧм и сідз: ─ Отир, ошкӧ Дӧсвидзисьсӧ! Сьылӧтӧ Сійӧ, быд кыв вылын баитісь йӧз!
[12] Исайыс тай сідз висьталӧм: ─ Иессей вужись петӧмыс лэбтісяс. Сувтас босьтны Ас кипод увтас быд кыв вылын баитісь отирсӧ. Отирыс пондасӧ надейтчыны Сы вылӧ.
[13] Надея сетісь Еныс ась тыртас тіянӧс веритӧмныт пыр быдкодь гажнас да лӧньнас. Вежа Лолыс вынӧн Сія ась вынсьӧтӧ тіянлісь надейтчӧмнытӧ.
[14] Воннэзӧ, ме бура тӧда: тіян уна быдкодь бурыс, тійӧ уна тӧдат, асьныт вермат ӧтамӧднытӧ велӧтны.
[15] Тіянлӧ казьмӧтӧм могись ме сё жӧ мукӧдсӧ гижи повтӧг. Сідз кери, Еныс эд Аслас бурсетӧмӧн корис менӧ керны Кристос Исуслісь вежа уджсӧ. Сія сувтӧтіс менӧ висьтасьны Еныслісь Бур Юӧрсӧ быд кыв вылын баитісь отирлӧ, медбы вайӧтны нійӧ Еныс дынӧ езъялан козин туйӧ. Сія Вежа Лолӧн сӧстӧммӧм езъялан козиныс Еныслӧ сьӧлӧмви.
[17] Ме ӧтлааси Кристос Исускӧт ─ сідзкӧ, верма ошшасьны Енсянь босьтӧм уджнам.
[18] Ог лысьт висьтавны мӧдік йылісь. Висьтася дзир Кристослісь ме пыр керӧмсӧ. Ассис вынсӧ Сія мыччаліс баитӧмӧ да керӧммезӧ коста, кӧр ентӧдтӧм отирсӧ вайӧтлі веритӧмӧдз да Енсӧ кывзісьӧмӧдз.
[19] Ен Лов вынӧн Кристосыс ме пыр керліс мыччалан пассэсӧ да адззывлытӧммесӧ. Сійӧн Кристослісь Бур Юӧрсӧ ме верми нуӧтны Ерусалим гӧгӧр муэзсянь Иллирикӧдз.
[20] Ме эг керлы сетӧм уджӧс мӧдіккезӧн увтсӧ пуктӧм вылын. Бур Юӧрсӧ пыр висьтасьлі сэтчин, кытӧн Кристос ним йылісь эзӧ на кывлӧ.
[21] Кери Гижӧтісь кыввез сьӧрті: ─ Кӧдналӧ Сы йылісь абу вӧлі висьтасьӧм, казяласӧ. Кӧдна эзӧ на кывлӧ, нія вежӧртасӧ.
[22] Эта уджӧ унаись падмӧтліс менӧ локны тіян дынӧ.
[23] Этна муэзын ӧні менам уджӧ керсис. А ме важынсянь ни лӧсьӧтча вовлыны тіян дынӧ.
[24] Ме лӧсьӧтча мунны Испанияӧ. Мунікам недыр кежӧ мӧда кежавны тіян дынӧ. Видзчися пантасьӧмным коста тіянкӧт баитӧмнаным бурмӧтны сьӧлӧмӧс. Надейтча, сыбӧрын тійӧ меным отсалат петны туйӧ.
[25] Ӧні ме муна Ерусалимӧ. Колӧ отсавны вежа отирлӧ.
[26] Ны коласісь мукӧдыс эд умӧля олӧны. Македонияись да Акаияись вичкуэс Ерусалимись воннэзнымлӧ ыстісӧ отсӧт.
[27] Нія сьӧлӧмсянь отсасьӧны, да и колӧ нылӧ сідз керны. Енӧжсянь бурсетӧмыс локтіс мӧдік отирлӧ иудейез пыр. Сідзкӧ, мӧдік отирыс ась отсасьӧ иудейеслӧ му вылісьнас.
[28] Ӧктӧм отсӧтсӧ Ерусалимас вайӧмӧ бӧрын тіян дынӧт иньдӧтча Испанияӧ.
[29] Ме тӧда: кӧр локта тіян дынӧ Бур Юӧрнас, Кристосыс бласлӧвитас тіянӧс тырмӧмви.
[30] Воннэзӧ, кора тіянӧс миян Дӧсвидзись Кристос Исус нимӧн да Вежа Ловлӧн радейтӧмӧн: пессьӧмӧ коста ӧтлаын мекӧт кеймӧ Еныслӧ ме понда,
[31] медбы Иудеяас эг сюр Исуссӧ тӧдтӧммез киӧ. А Ерусалимас вежа отирыс ась босьтӧны ыстӧм отсӧтсӧ. Сія отсӧтыс ась лоӧ нылӧ сьӧлӧмви.
[32] Ен кӧ шуас, сэк гаж сьӧлӧмӧн локта тіян дынӧ, шоччисьышта тіянкӧт.
[33] Лӧньсӧ сетісь Еныс ась лоас тіянкӧт быдӧнныткӧт! Аминь.