[1] کْرَمِیَ، کَمْ لَا بِوُ ثْدِ رُوِیَ، ࢽَیِ رُحُ اللَّهیٜیَدْ رُوکُرَ بَوُووَلَࢽْ تِیَ کْلَ جَوَلّٜرُو یَکُّواْ؞ أَمَّ بَرٜ ࢽَیِ یٜ جَرَࢻْتُوِّرُو حَࢽْغَلْ غْࢽَࢽُواْ؞
[2] کُرْوُووُ کَمَࢽْدُویٜ کْلَرُو ࢽغُوࢽُواْ، ࢽغَیْࢽِࢽْ وَدَ أَلْمَسِیوُیٜ غَوِ؞
[3] کَمْ لَا تِ أَوِمَ غْࢽِ دُوُوࢽْ کْلَࢽْجُ أَوُو لَارُو ࢽغُویٜࢽُووَ، کْلَࢽْجُ جَمْبَجْࢽَ؞
[4] أَمَّ وُࢽْدُ یَیٜ کْࢽْدُو کْلَࢽْجُیٜ ثُرُو؞ دَجِ کَمْ غَدٜࢽْ غْࢽِ، کْلَࢽْجُمَࢽْ دَلِلْ أَوُلُو بُویٜ ثُوَࢽْدِ،
[5] وُࢽْدُ یَیٜ کَتْکُࢽّجُ کْلَرُو ࢽغُوجِ ࢽَࢽْغَرُو؞
[6] کَمْ تِرُو مَࢽَدَ أَلَمْجَغَیْدْ أَوُو ࢽغْلَ سَمَّا کَمْ تِیَ أَلَمْجِدَ رُوکُّو دَغَرْجُو؞
[7] بَرٜ جَمْبَدُوِّ، وُࢽْدُمَ رَکْثٜ اللَّهرُو رُدُ غْࢽَجِیوَوُو؞ أَوُووَ أَوُو کَمْ ثْࢽَدْࢽَدْمَا کَلَجِ؞
[8] کَمْ مَࢽْغَرْ تِیࢽْجُیٜلَࢽْ ثْࢽَدِمَدْ تِییٜࢽْ کَرْمُو کَلَجِ، أَمَّ کَمْ رُحُ اللَّهیٜلَࢽْ ثْࢽَدِمَدْ رُحُ اللَّهیٜلَࢽْ رُو سَوِسُویٜ کَلَجِ؞
[9] بَرٜ ࢽغْلَ دِیُورُو یِمْبَرِیٜࢽْدٜ، تْمَ کُولِّیٜࢽْدٜیَ، سَ تْرَاࢽَࢽْ کَلَ دِیٜ؞
[10] أَدْ ࢽَࢽْغَرُو دَمَ ࢻَࢽْدِیٜیَ، وُࢽْدُ یَیٜرُو ࢽغْلَ یِدِّیُو، مَسَمَّࢽُّو کْرَمِیَࢽْدٜ عِیسَىٰ غَوُدْرُو؞
[11] أَرَوُ کُرَ کُرَ أَࢽِیَ رُیْوُو، وُمَ مُکُّوࢽِࢽْ رُوُࢽْغٜىٰرَکُّو!
[12] أَمْ مَࢽْغَرْ تِییٜࢽْ تَیِیَ ࢽغْلَوُرُو ࢽغُوجَیْدْ ࢽَیِیَ دُولٜرُو ࢽجَسَکّٜ کَجَدُوِ، أَمَّ بَرٜ کْسْکَ کَرْمُویٜ أَلْمَسِیوُیٜ ࢽَࢽْغَرُو تَیِیَ بَسَرْجَࢽِّ بَسُّو أَدَ ثَدِ؞
[13] أَمْ کَجَادَدْمَ وَدَ أَتَّوْرَیٜ جَغَیْوَوُو، أَمَّ کْلَ کَجَࢽْدُویٜࢽْ أَوُلُو جَوُورُو کَجَدُوِیَ، ثَرَوُو؞
[14] أَمَّ وُدْ کْلَ کْسْکَ کَرْمُویٜ کْمَࢽْدٜ عِیسَى أَلْمَسِیوُیٜࢽْ غْࢽِیَ، بَرٜ تْمَّرُو أَوُلُو بُکّْࢽِ؞ کْسْکَ أَدْࢽْ دُࢽِیَ یٜ وُرُو کَࢽُو، وُ یٜ دُࢽِیَرُو کَࢽُکُّو؞
[15] کَجَ بِ کَجَࢽَمْبُ أَوِمَ غْࢽِ، سَیْ أَلَکْتُ بْرِࢽُّو وَلْدُ؞
[16] أَمْ وَدَ أَدَ جَغَیْ، وُوتّٜ جَمَ إِسْرَاءِیلَ اللَّهیٜدْ، ࢽَࢽْلٜوَا کَࢽْجِمَرِیَ ثَوَࢽْدُو!
[17] کُوَ أَدْࢽْ ࢻُوُࢽْ بَرٜ وُࢽْدُمَ سُوُولْسْࢽِّ، وُدْ تِیࢽِࢽْ بَلُووَ وُ عِیسَیٜرُو ࢻْلٜجَیْدْ مبٜجِ ࢽَࢽْغَرُو؞
[18] کْرَمِیَ، سٜرْ کْمَࢽْدٜ عِیسَى أَلْمَسِیوُیٜ ࢽَیِلَࢽْ دْغَ! أَمِࢽْ؞