[1] أَوُو وُلّْکِّدْ: وَرَسَمَدْ تَدَ وُرَجْࢽِّ دُوُوࢽْ، تِدْ کْمَ سَمَّیٜ یَیٜ، أَوِمَ تِیَ کَرٜیَا غَیِرْجِوَوُو،
[2] ࢻْرْدُ وَکِّلَّا ثُوُرَمْغُوَیٜࢽْ حَرْ سَ بَوَࢽْجُ کَمْجْࢽَدْ إِسِرُو؞
[3] ࢽغَیْمَ سَ أَࢽْدِ تَدَوَدْ، أَࢽْدِ یٜ کَرٜیَ ࢻْرْدُ کْࢽْدُوُووَ دُࢽِیَ أَدَ ثَࢽُودِیٜࢽْ؞
[4] أَمَّ سَدْ کَلْکَلُّو کِدْࢽِّیَ، اللَّه تَدَࢽْجُ تِ دُوُوࢽْ کَمُیٜࢽْ تَمْبْࢽَ یٜ، ࢻْرْدُ کْࢽْدُوُو أَتَّوْرَیٜࢽْ تَمْبْࢽَ یٜدَ جُوَیٜࢽُو،
[5] أَمْ ࢻْرْدُ أَتَّوْرَیٜࢽْ ࢽَࢻْثَࢽَدَ مٜرُجُورُو، ࢽغَیْࢽِࢽْ أَࢽْدِیَ تَدَوَ اللَّهیٜرُو دَمْسَیْ؞
[6] ࢽَیِ تَدَوَ ࢽَࢽْغَرُو اللَّه رُحُ تَدَࢽْجُیٜ کَرْوُࢽْدٜرُو جُوَجِیٜ ࢽغَیٜ: «أَبَّ، بَوَ!» ثْࢽِ؞
[7] أَدْغَیْࢽِࢽْ ࢽِ غَدٜرُو کَرٜیَ غْࢽِ، تَدَ؞ ࢽِ تَدَ ࢽَࢽْغَرُو، ࢽَ اللَّهیٜࢽْ وَرَسَمَ یٜ؞
[8] ثَلَࢽْ سَ اللَّهَ ࢽُوࢽُوِّدْࢽْ، ࢽَیِ کَرٜیَوَ اللَّهیٜ غْࢽِ، أَلَوَ کَتُّوُیٜ؞
[9] أَمَّ کْرْمَ اللَّهَ ࢽُوࢽُوَّدْ، رَ أَدَ کُوجْࢽَرُو اللَّه ࢽَیِیَ ࢽُوࢽْجَࢽَدْ، ࢽدَیِࢽْ غْلٜ وَلْدُوٜ کْࢽْدُوُووَ لَوُوَ ࢻَیْدَ بَوُووَ دُࢽِیَ أَدْیٜدَ غَوٜ ثَیٜ بَوُورُو کَرٜیَࢽْجَرُو وَلْدُ مَࢽُوِدْ؟
[10] یِمْ سُو، کْࢽْدَوُ سُو، جَمَࢽْ سُو، سَا سُووَ حَࢽْغَلَّیٜࢽْ غَوِ،
[11] حَرْ کِدَ ࢽَࢽْدُوࢽْ دِکّْࢽَدْ بُووُرُو وَلْجِرُو ࢽَیِ ࢽَࢽْغَرُو رِکّْࢽَ؞
[12] کْرَمِیَ، لُواْࢽْجَکِّ، وُ غَیْرُو وَلُّواْ، وُ یٜ ࢽَیِ غَیْرُو وَلّْکّْࢽَدْرُو؞ أَوِمَ دِوِ وُرُو سْدُّوِّ،
[13] کَسُوَ لَا تِییٜ ࢽَࢽْغَرُو ࢽَیِرُو بُرْوُو سَلَّمِّࢽْ مَࢽَ کَوُرِ کْجِیٜ ࢽغٜدّْکُّورُو ࢽُوࢽُوَّ؞
[14] کَسُوَࢽِ ࢽَیِرُو کُرْوُووُ یَیٜ، وَسُوٜ ࢽجُسُوِّ، وُوَ مَلَیْیَ اللَّهیٜ غَیْرُو، عِیسَى أَلْمَسِیوُ کْلَࢽْجُ غَیْرُو سٜمُووُوْ؞
[15] ࢽدَ غْلٜ کَرْوُکْجِࢽْدُودْ؟ ثَ یُوجِیَ، سِمْࢽْدُو کُلَیْࢽُوٜ سِوِرُو شٜدَࢽْجَکِّ؞
[16] ࢽَیِرُو جِرٜ وُلْࢽْجَغَکّْࢽَدْرُو کْلَدُوࢽْدُورُو وَ وَلْیٜکُّو؟
[17] کْوُ أَمْ کَجَادَیٜدْ ࢽَیِ ࢽَࢽْغَرُو رُوࢽْجَ ثَدِیَ جَوْرُو ثَرَاࢽَ، أَمَّ ࢽِیَࢽْجَدْ ࢽغْلَ غْࢽِ؞ أَࢽْدِیَ ࢽَیِیَ ࢻَیْدُ مَجَیْ، ࢽغَیْࢽِࢽْ ࢽَیِ یٜ تَیِ ࢽَࢽْغَرُو رُوࢽْدُو یِوِیَ جَوْرُو رَاوَّ؞
[18] ࢽِیَدْ ࢽغْلَا، رُو ࢽجُو رَوُودْ سَوِ یَیٜ جَوْرُو ࢽغْلَ، سَ دَوُࢽْدُوࢽْ دْغَکّْࢽَ رُࢽْجُࢽْ غْࢽِ؞
[19] تَدَوَࢽِ، بُوࢽٜ کْࢽْجَمْبِیٜ ࢽَیِ ࢽَࢽْغَرُو کُورُو یَیٜ وَلْدْکّٜ یَکِّ، حَرْ حَلْ أَلْمَسِیوُیٜ کَرْوُࢽْدُوࢽْ ࢽَࢻْثِرُو؞
[20] وَیْیُو! وُ کْرْمَ دَوُࢽْدُوࢽْ دْغَکّٜ جَࢽْدٜ جِرِ غَدٜ ࢽجَدّْکِّیَ، رَاکُّو، کْلَࢽْدُوࢽْ حَࢽْغَلْࢽِ ثِجْࢽَدْرُو؞
[21] وُلْسْغْࢽُواْ، ࢽَیِ وَدَ أَتَّوْرَیٜ غَ رَاوَّدْ، أَتَّوْرَدَ أَسُࢽُوَّوُو وَ؟
[22] أَوُووَ ࢽَوِ إِبْرَاهِیمْ تَدَ کُوࢽغوَ یِࢽْدِیَ، ࢻَلْدْ کِرْࢽْجُیٜࢽْ، ࢻَلْدْ یٜ کَمُࢽْجُیٜࢽْ ثُوَࢽْدْࢽَدَ کِتَوُلَࢽْ رُوُوَدَ؞
[23] تَدَ کِرّٜدْ ࢽِیَ کَمْبٜࢽْ کَتَمْبُو، أَمَّ تِ تَدَ کَمُࢽْجُیٜدْ وَدُیٜࢽْ کَتَمْبُو؞
[24] أَدْ مِسَلْ: کَمُوَ أَࢽِ ࢽَࢻْتُ أَمَࢽْ یِࢽْدِیٜ ثَدِ؞ ࢻَلْدْ کَوْ کُرُوُ سِࢽَیْیٜ، کَرٜیَ ࢽجَمْبُومَ؞ تِمَ حَجَرَتُ وُو؞
[25] حَجَرَتُدْ ࢽَࢻْتُ کَوْ کُرُوُ سِࢽَیْیٜ ثِدِ أَرَبِیَیٜࢽْ دْغَࢽَیٜ ثْدِ؞ تِدْ جٜرُجَلٜمْ کْرْمَیٜ، تَدَوَࢽْجُوَ رُوکُّو ࢽَࢽْکَرٜیَلَࢽْ ࢽَࢻْثَیْ؞
[26] أَمَّ جٜرُجَلٜمْ سَمٜىٰدْ کَرٜیَ غْࢽِ، تِمَ یَࢽْدٜ وُو؞
[27] أَوُووَ کِتَوُلَࢽْ رُوُوَدَ: «ࢽِ کَمُ یَمْبْمْبَوُو، کْجِ ࢻَࢽّٜ! ࢽِ ࢽغَلْتٜمَ بُوࢽٜ کْࢽْجَمْبِیٜ ࢻَࢽّْمِّ، وُلْوُرِ یَکّٜ کَرْوُکْجِࢽْمْ ࢻْلٜࢽٜ! دَلِلْࢽْجُدْ تَدَوَ کَمُ کوَا یَیٜرُو کَمُ کُولَّدَیٜمَ ࢽغْوُ وُو؞»
[28] کْرَمِیَ، ࢽَیِ یٜ إِسْحَٰࢼُ غَیْ تَدَوَ وَدُیٜ؞
[29] کُرٜࢽْ کَمْ ࢽِیَ کَمْبٜࢽْ تَمْبْࢽَدْ تِ رُحُیٜࢽْ تَمْبْࢽَدَ بَسَرْجْࢽَدْ غَیْ، کُمَ یٜ ࢽغَیْ؞
[30] أَمَّ أَوِ کِتَوُیٜ وُلْجُو؟ «کِرْدَ تَدَࢽْجُوَ دُࢽٜ، تَدَ کِرّٜدْ تَدَ کَمُ کِرْ غْࢽِیٜدَ رُوکُّو وَرَسَ ثُوَࢽْدِوَوُودْرُو؞»
[31] أَوُو أَࢽِ ࢽَࢽْغَرُو، کْرَمِیَ، أَࢽْدِ تَدَوَ کِرْدْیٜ غْࢽِ، تَدَوَ کَمُ کِرْ غْࢽِدْیٜ؞