[1] وُمَ بُلُسْ رَوُو اللَّهیٜࢽْ کْࢽْغَیَمْ عِیسَى أَلْمَسِیوُیٜدْ مُمِࢽَّ أَمَࢽَّ عِیسَى أَلْمَسِیوُیٜ بْرْࢽِ أَࢻِسَیٜࢽْ دَسَاࢽَدْرُو:
[2] اللَّه بَوَࢽْدٜیَ کْمَ عِیسَى أَلْمَسِیوُوَ ࢽَیِرُو سٜرَّ ࢽَࢽْلٜوَا ࢽجَدُو!
[3] بَرْغَا اللَّه بَوَ کْمَࢽْدٜ عِیسَى أَلْمَسِیوُیٜ، تِ دُوُوࢽْ بَرْغَ سَمٜىٰ جِرِ ࢻِ یَیٜیَ أَلْمَسِیوُ ࢽَࢽْغَرُو أَࢽْدِرُو سَدْࢽَدْ؞
[4] کَوُ دُࢽِیَ أَلَکْتِمَࢽْ تَیِرَّ أَوُو وَادَ بَوُووَالَࢽْ ࢻُوُࢽْجُࢽْ دْغَیْیٜرُو أَلْمَسِیوُلَࢽْ أَࢽْدِیَ کْرٜسٜرَ؞ ثُرُو کْرَوُویٜࢽْ
[5] کْلَ أَرْدِیَ رَوُوࢽْجُیٜࢽْ اللَّه عِیسَى أَلْمَسِیوُیٜࢽْ أَࢽْدِیَ تَدَوَࢽْجُ دَࢻْتُیٜرُو وَلِّیُورُو کَدَرْسٜرَ؞
[6] اللَّه تَدَࢽْجُ ثْرَاࢽَدْیٜࢽْ أَࢽْدِرُو سٜرْࢽْجُ دَرَجَا سَدْࢽَدْرُو تِیَ یُࢽْغُورِیُو!
[7] بُࢽْجُیٜࢽْ، کْلَ سٜرْࢽْجُ دَمَ بَوُویٜࢽْ، مٜرُسَࢽٜ بِوُوَࢽْدٜ غَوُرْیٜࢽُو، سٜرْ دُوُوࢽْ
[8] اللَّه أَࢽْدِرُو ࢽَࢽْرَشِدُࢽْجُوَ حَࢽْغَلْکْجِࢽْجُوَ سَمَّࢽْ ثِ بَوُووَرُو سَدّْࢽَدْ؞
[9] اللَّه أَسْرْ رَوُوࢽْجُیٜ کْلَ کَرْوُکْجِࢽْجُ أَلْمَسِیوُلَࢽْ ࢽِیَجْࢽَدْیٜࢽْ أَࢽْدِرُو إِسَࢽُوسَاࢽَ،
[10] وُوتّٜ ࢻَسَلْ أَوُووَ سَمٜیَ ثِدِیَیٜ سَمَّا سَࢽْجُ ثْدِیَ أَلْمَسِیوُلَࢽْ کْلّْمٜ ثَࢻْتُیٜدْ؞
[11] کُورُو أَلْمَسِیوُلَࢽْ وَرَسَ ࢻَࢽْدِیٜࢽَ، اللَّه تِ دُوُوࢽْ ࢽِیَ رَوُوࢽْجُیٜلَࢽْ أَوُو سَمَّا ثْدِدْ ثَمَࢽْ کْلَ ࢻَسَلْࢽْجُیٜࢽْ أَࢽْدِیَ کَدَرْسَࢽَ ࢽَࢽْغَرُو،
[12] أَࢽْدِ یٜ بُرْوُو سَلَّمِّࢽْ تْمَࢽْدٜیَ أَلْمَسِیوُرُو یَکِّیٜࢽَدْ دَرَجَࢽْجُوَ یُࢽْغُورِیُورُو!
[13] سَ مَࢽَ جِرٜىٰ وُوتّٜ کَوُرِ کْجِ ࢽجْکَّوُوࢽْدُویٜیَ ࢻَࢽُّوٜ أَلْمَسِیوُوَ کَسَدُّوَّدْࢽْ، اللَّه ࢽَیِ یٜرُو تِلَࢽْ رُحُࢽْجُ ࢽجَدِ ثْࢽَّیٜࢽْ تَوَࢽْجُ غْࢽَࢽْغٜىٰرَ؞
[14] رُحُ اللَّهیٜدْ ࢽَࢻْتُ رَࢽْ وَرَسَࢽْدٜىٰ ثْدِ، حَرْ کَوُ ࢽُوَࢽْدٜ مٜرُجِرُو، دَرَجَࢽْجُوَ یُࢽْغُورِیُو!
[15] أَدْمَ ࢽَࢽْغَرُو وُ یٜ تْࢽْ مَࢽَ کْلَ کْمَࢽْدٜ عِیسَىٰ مْرْسَدُࢽْدُووَ مُمِࢽَّ سَمَّا کْرَوُوࢽْدُووَیٜࢽْ ࢻَکّْࢽَدْࢽْ،
[16] ثُرُو مُودُوَࢽِیٜࢽْ ࢽَیِیَ تَࢽّجَکِّیَ، ࢽغَلْتٜمَ ࢽَیِ ࢽَࢽْغَرُو اللَّهَ وُسٜدُ کُولّْکّْࢽِ؞
[17] اللَّه کْمَࢽْدٜ عِیسَى أَلْمَسِیوُیٜ، تِ دُوُوࢽْ بَوَ مَرْتَوَمَدْ، تِیَ ࢽغْلَرُو ࢽُوࢽُواْرُو حَلْ ࢽَࢽْرَشِدُیٜیَ کْلَࢻْرْمْبٜیَ ࢽَیِرُو ࢽجَدُو،
[18] کُورُو سِمْ کَرْوُࢽْدُویٜیَ جَوَلْ ࢽُرْࢽْجُیٜرُو کَجُوُو، تْمَ دُوُوࢽْ تِرُو بُواْࢽْجَࢽَدْ یٜ، أَرْسِیے وَرَسَࢽْجُ دَرَجَا مُمِࢽَّیٜ یٜ،
[19] ࢽَࢽْکُرَ کْࢽْدُوُوࢽْجُیٜ کَࢽْجِ أَࢽْدِ تِیَ مْرْسَࢽِیٜࢽَیٜ یٜدَ ࢽُوࢽُواْرُو؞ کْࢽْدُوُو أَدْ تِمَ دُࢽُو دُوُوࢽْ
[20] أَلْمَسِیوُلَࢽْ سَ تِیَ کَرْمُولَࢽْ ثْسَࢽْغٜ کْمْبُورَمْࢽْجُࢽْ سَمٜلَࢽْ ࢽَࢻْثْࢽَیٜࢽْ ࢻْلٜجْࢽَدْ وُو؞
[21] ࢽَدْࢽْ أَلْمَسِیوُ جَمَࢽْ أَدْ رُࢽْجُࢽْ غْࢽِ، ࢻُوُیٜ یٜࢽْ کْرْمَیْ سُو، کْࢽْدُوُو سُو، دُࢽُو سُو، رَکْتُ سُو سَمَّا ثُ تِࢽَ سَمَّایٜࢽْ سَمٜ کُرُوُࢽْ ࢽَࢻْثِ؞
[22] اللَّه أَوِ یَیٜیَ ثِدِیَ سِ أَلْمَسِیوُیٜرُو ثَکّٜ تِیَ ࢻُوُمَ أَوُو سَمَّیٜرُو غَلَجٜ جَمَࢽْجُرُو کَیْࢽُو،
[23] جَمَ دُوُوࢽْ ࢽَࢻْتُ تِیࢽْجُیٜ ثْدِ، کُورُو ثُرُو تِیے أَدْیٜمَࢽْ أَلْمَسِیوُ دْغَیْ، تِ دُوُوࢽْ أَوِ یَیٜیَ جِرِ ࢻِࢽْ یَیٜ ثْمْبْرِدْ؞