[1] ࢽَیِ غَلَتِیَوُ حَࢽْغَلْ بَوُووَسُو، وُࢽْدُ ࢽَیِیَ جَوَلَّࢽْ ࢽجَتُّلُوُو؟ عِیسَى أَلْمَسِیوُوَ کْسْکَرُو جَجَغَࢽٜ ࢽُࢽَدْرُو ࢻٜدٜرُو ࢻُوُࢽْدُوࢽْ ࢻْلٜࢽْجَاࢽَ، غْࢽَ؟
[2] کُولْسْࢽُواْ ࢽَیِیَ أَوُو ࢻَلُّو ࢽجَوُورْکُّو: وَدَ أَتَّوْرَیٜ غَلَࢽْ رَ کَوُرِ کْجِدَ ࢻَࢽّْمٜ مْرْسَدُلَࢽْ رُحُ اللَّهیٜیَ کِوَࢽْدُوْ؟
[3] ࢽَیِ جَوْمَرُو حَࢽْغَلْ بَوُووَ وَ؟ ࢽغَوُو رُحُ اللَّهیٜࢽْ بَدِࢽُوَّیٜࢽْ، کُواْرِ کْلَࢽْدُویٜࢽْ وَ تُمُوغْوِ؟
[4] بُووُ ࢻَتُّو وَ بُوࢽٜ ࢽغَا کِیَوْ؟ جِرٜمَرُو بُووُرُو وَلْجِوَوُو!
[5] تُو، تِ دُوُوࢽْ رُحُࢽْجُ ࢽجَدٜ دَوُࢽْدُوࢽْ أَوُو أَجَبَّ أَجَبَّ ثْدِدْ أَوُو أَࢽِیَ وَدَ غَوَّ ࢽَࢽْغَرُو وَ ثْدِ، رَ کَوُرِ کْجِدَ ࢻَࢽُّوٜ مْرْسَࢽُوَّ ࢽَࢽْغَرُو ثْدِ؟
[6] جِرِ ࢽَوِ إِبْرَاهِیمْ اللَّهَ مْرْسَجٜ اللَّه یٜ تِیَ جِرٜمَرُو ࢽغُوجْࢽَدْ غَیْ،
[7] ࢽُوࢽُواْ، ࢽغَیْمَ أَمْ کَمْبْرْسٜیَدْ تَیِمَ کَدُوُ ࢽَوِ إِبْرَاهِیمْبٜ وُو؞
[8] اللَّه ࢻُوُࢽْ کْرْدِیَا کَمْبْرْسٜىٰࢽْ جِرٜوُرُو ثْدِدَ ثَمَࢽْ کِتَوُلَࢽْ رُوُوَدَ، کَوُدْرُو کَوُرِ کْجِ أَدَ ࢽَوِ إِبْرَاهِیمْبُو وُلْجْغْࢽَ: «جَمَ دُࢽِیَیٜ سَمَّ ࢽِیٜࢽْ بَرْغَ ثَوَࢽْدِ؞»
[9] أَدْغَیْمَ أَمْ کَمْبْرْسٜیَدْ ࢽَوِ إِبْرَاهِیمْ کَمْبْرْسٜمَدَ رُوکُّو بَرْغَ ثَوَࢽْدِ؞
[10] أَمْ کِدَ أَتَّوْرَیٜرُو دُࢽُو ثَدِ سَمَّ بَسْکُوَدَ، دَلِلْࢽْجُدْ کِتَوُلَࢽْ رُوُوَدَ: «وُࢽْدُ دُوُوࢽْ أَوُو ثُرُو کِتَوُ أَتَّوْرَیٜࢽْ رُوُوَدَ سَمَّا جْغَیْوَوُودْ بَسْکُوَدَ؞»
[11] کَمْ ࢻِمَ وَدَ غَلَࢽْ ࢻُوُ اللَّهیٜࢽْ جِرٜمَرُو وَلْجِوَوُودْ ࢻٜدٜ، أَدْ کِتَوُلَࢽْ رُوُوَدَدْرُو: «کَمْ جِرٜمَدْ کَمْبْرْسٜىٰࢽْ رُووَ دْغَیْ؞»
[12] تِ وَدَدْ أَوُو کَمْبْرْسٜىٰ غْࢽِ، أَدْ یٜ کِتَوُلَࢽْ رُوُوَدَ: «کَمْ أَوُو أَࢽِیَ ثْدِمَدْ تَیِیٜࢽْ رُووَ دْغَیْ؞»
[13] أَلْمَسِیوُ کْلَࢽْجُمَ ثُجُࢽْدٜرُو بَسْکُوَدَرُو وَلْجٜ أَࢽْدِیَ بَسْکُدُ أَتَّوْرَیٜࢽْ مٜرُسٜرَ، أَدْ کِتَوُلَࢽْ رُوُوَدَدْرُو: «وُࢽْدُ دُوُوࢽْ تِیَ کْسْکَرُو رُوجَاࢽَدْ بَسْکُوَدَ؞»
[14] أَدَ دِیُوࢽْجُدْ، بَرْغَ ࢽَوِ إِبْرَاهِیمْبٜدْ عِیسَى أَلْمَسِیوُیٜࢽْ کْرْدِیَ یٜرُو جْࢻْثُوُو، أَࢽْدِ سَمَّ رُحُ اللَّهیٜ دُوُوࢽْ اللَّه وَدُ ࢽغُوجٜ أَࢽْدِرُو سَدِ ثْࢽَّدَ کَمْبْرْسٜىٰࢽْ ࢻَࢽْدِیُورُو؞
[15] کْرَمِیَ، کْلَ مِسَلْ کَمْبٜࢽْ جَࢽْدٜࢽْکِّ: أَمَࢽْ ࢽدْࢻْثَࢽٜ تَبَّثَّغَیْیَ، أَمَࢽْ کَمْبٜ یَیٜ، وُࢽْدُمَ بَوُورُو ثْدِوَوُو بِ ثْرْغَیْوَوُو؞
[16] تُو، اللَّه ࢽَوِ إِبْرَاهِیمْبَ کَدُوُࢽْجُوَرُو وَدُوَدَ ࢽغُویٜىٰࢽُو؞ کِتَوُیٜ کْلَ أَمْ ࢽغْوُیٜࢽْ ‹کَدُوُوَرُو› غْࢽِ، ‹کَدُوُࢽْمْبُو› کْلَ کَمْ ࢻَلّٜࢽْ ثْࢽَّ، کَمْدْ أَلْمَسِیوُدْمَ؞
[17] أَکُّو أَوُو وُلّْکِّدْ: أَمَࢽْ دُوُوࢽْ اللَّه کُرٜࢽْ تَبَّثّْغْࢽَدْ، أَتَّوْرَ سَا یٜرْ دٜوُࢽْ ࢻِیَکُّࢽْ ࢽغَوُوࢽْ إِسْࢽَ تِیَ بَوُورُو ثْدِوَوُو یٜ، وَدُ اللَّهیٜدَ ثِࢽْجِوَوُو یٜ؞
[18] وَرَسَدْ وَدَ أَتَّوْرَیٜࢽْ إِسِیَ، دَجِ وَدُیٜࢽْ إِسِوَوُو، أَمَّ اللَّه وَدُ ࢽغُوجٜ سٜرْࢽْجُࢽْ تِیَ ࢽَوِ إِبْرَاهِیمْبُو کَیْࢽُو؞
[19] أَدْغَیْیَ، أَوِرُو غْلٜ وَدَدْ؟ بِوُوَ ࢻٜدٜرُو ثَلُوُورُو تْرْغَࢽَ، حَرْ کَدُوُ دُوُوࢽْ تِرُو وَدُدَ ࢽغُوجَاࢽَدْ إِسِرُو، کُورُو وَدَدَ مَلَیْیَوَ مُکُّو سُولُومَ لَایٜرُو کٜسَکُّو؞
[20] سُولُومَدْ کَمْ ࢻَلّٜ غْࢽِ، أَمَّ اللَّهدْ ࢻَلْمَ؞
[21] أَتَّوْرَا وَدُ اللَّهیٜیَ دُوُࢽْدَیْ وَ؟ أَعَ، تْمَّرُو ࢽغَیْ غْࢽِ! ثَ وَدَ لَا رَکْثٜ رُو ثِدْ تِࢽَا، دَجِ جِرٜمَرُو وَلْدُدْ وَدَ غَیٜࢽْ تَبَّتُّو إِسْࢽَ؞
[22] أَمَّ کِتَوُدْ ثَکّٜ دُࢽِیَ ࢽغَ کُوسُووُ بِوُیٜرُو وَلْیٜرَ، ࢽغَیْࢽِࢽْ عِیسَى أَلْمَسِیوُوَ مْرْسَدُلَࢽْ أَمْ کَمْبْرْسٜیَدْ وَدُدَ ثَوَࢽْدِ؞
[23] کَوُ جَمَࢽْ کَمْبْرْسٜىٰدْرُو، وَدَ أَتَّوْرَیٜدْ أَࢽْدِیَ کُوسُووُ غَیْ سَدَࢽٜ رُوسَࢽَ، حَرْ کَمْبْرْسٜ إِسِدْ أَمْبُو بَیِࢽْدِیرُو؞
[24] ࢽغَیْمَ حَرْ کْࢽْسِیُو أَلْمَسِیوُیٜرُو أَتَّوْرَدْ سْرِوُومَࢽْدٜ، کَمْبْرْسٜلَࢽْ جِرٜوُرُو وَلِّیُورُو؞
[25] أَمَّ کْرْمَ کَمْبْرْسٜ إِسْࢽَدْ، أَࢽْدِ غَدٜرُو مُکُّو سْرِوُومَیٜࢽْ غْࢽِ؞
[26] ࢽَیِ سَمَّ عِیسَى أَلْمَسِیوُوَ مْرْسَدُیٜࢽْ تَدَوَ اللَّهیٜرُو وَلُّوَّ،
[27] دَلِلْࢽْجُدْ وُࢽْدُࢽْدُو یَیٜرُو کَسَلَ ࢽجَدّٜ أَلْمَسِیوُرُو کْلْࢽْجَاࢽَدْ حَلْ أَلْمَسِیوُیٜ لُجْࢽَ؞
[28] یَوْدِ بِ یَوْدِ غْࢽِ بَوُو، کَرٜیَ بِ کَمْبٜ بَوُو، کُوࢽغوَ بِ کَمُ بَوُو، ࢽَ عِیسَى أَلْمَسِیوُیٜࢽْ ࢽَیِ سَمَّ تِلُو ࢽَࢽْغَرُو؞
[29] کُورُو ࢽَیِدْ أَلْمَسِیوُیٜیَ، دَجِ ࢽَیِ کَدُوُ ࢽَوِ إِبْرَاهِیمْبٜ، کْلَ وَدُدْیٜࢽْ وَرَسَوُ؞