[1] دَجِ ࢽغَوُو سَا مٜوُ دٜرِیٜࢽْ وَلْدْکّٜ جٜرُجَلٜمْبُو بَرْࢽَبَسَّ رُوکُّو لٜىٰکُّو، کُورُو تِتُسْ یٜیَ ࢽغُوکّٜ یَدْکّْࢽَ؞
[2] أَوُو اللَّه وَحَیِلَࢽْ ࢻْلٜسْغْࢽَ ࢽَࢽْغَرُو لٜىٰکُّو، کُورُو تَیِرُو کَوُرِ کْجِ کْرْدِیَرُو وُلْغْکِّدَ بَیِࢽْغٜىٰکُّو، أَمَّ أَمْ دُوُوࢽْ جَمَ تَیِیَ ࢻُوُوُرُو ࢽغُوجَࢽَدْ رُࢽْجَرُو، بَرٜ کِدَ دِکّْࢽَا ࢻُوُࢽْ دِکِّیَ بُووُرُو وَلْجْࢽِّرُو؞
[3] أَمَّ تِتُسْ وُوَ رُوکُّودْ، تِ کَمْ لَرْدُ غْرٜسّٜ یَیٜ، تِیَ ثَسَکّٜ کَجَدْࢽِّ؞
[4] لَمَرْ أَدْ کْرَمِیَ کَتُّوُیٜ أَسْرْلَࢽْ ثَوُدْࢽَ ࢽَࢽْغَرُو ثِیٜࢽُو؞ کْࢽْسِیُوࢽْجَدْ، ࢽَࢽْکَمْ کْلَیٜ ࢽَ عِیسَى أَلْمَسِیوُیٜࢽْ ࢻَࢽْدِیٜࢽَدَ سْرِ ثَدُو أَࢽْدِیَ کَرٜیَرُو سَدُورُو؞
[5] أَمَّ أَمْ أَࢽِرُو سَ غَࢽَمَرُو دَمَ یِیٜࢽْدٜ، جِرٜ کَوُرِ کْجِیٜدْ ࢽَیِ ࢽَࢽْغَرُو دْغَرُو؞
[6] کُورُو ࢻُوُوُدْ، ࢽَࢻْتُࢽْجَرُو لَمْبُوࢽِ بَوُو، اللَّه أَمْبَ غَیِرْجِوَوُو، أَوِمَ کَوُرِࢽِرُو ثَسَرْغَࢽِّ؞
[7] أَیْ، جِرِ اللَّه کِدَ أَمْ کَجَادَرُو کَوُرِ کْجِدَ وُلْدُوُیٜ مُکُّو بِتُرُسّٜرُو ثَکّْࢽَدْ غَیْ، مُکُّوࢽِ یٜرُو کِدَ جْمْبْلْمْبَرُو وُلْدُوُیٜ ثَکّْࢽَدَ کٜرُو؞
[8] أَوُووَ تِ دُوُوࢽْ بِتُرُسُّو کْࢽْدُوُو کِدَ کْࢽْغَیَمْبٜ ࢽَ أَمْ کَجَادَیٜࢽْ دِیُویٜ ثِࢽَدْ وُ یٜرُو ࢽَ جْمْبْلْمْبَیٜࢽْ کْࢽْدُوُو أَدَ سِࢽَ؞
[9] یَعْࢼُوبَا کٜࢻَسَّ یَحْیـَىٰ تَیِ دُوُوࢽْ ࢻُوُوُ جَمَ عِیسَىٰ غَوُیٜلَࢽْ ࢽُووَدَدْ سٜرْ اللَّه سْدّْࢽَدَ أَسُیٜرَࢽِّیَ، وُوَ بَرْࢽَبَسَّا مُکُّو یِࢽْدِࢽْ سَمُویٜ، أَࢽْدِ ࢽَ کْرْدِیَیٜرُو لٜࢽِیُورُو، تَیِ یٜ ࢽَ أَمْ کَجَادَیٜرُو لٜجَرُو کَسَتْکٜرَ؞
[10] أَوُو ࢻَلُّو أَࢽْدِیَ سٜوُورُو: تَلَاوَا تَࢽْغِیُو، أَدْمَ أَوُو جَوْرُو دِیُو رَاکّْࢽَدْ؞
[11] أَمَّ کٜࢻَسْ بْرْࢽِ أَࢽْتَکِیَیٜرُو کَدِࢽِّیَ، جِرٜࢽْجُ بَوُو ࢽَࢽْغَرُو ࢻٜدٜرُو تِرُو کِکَّدْکُّو؞
[12] کَوُ أَمْ لَا ࢽَ یَعْࢼُوبَیٜࢽْ إِسَیْدْرُو، کْرَمِیَ ࢻْرْدُࢽْجَ کْرْدِیَ رُوکُّو جَوُیْ؞ أَمَّ کَدِرَࢽِّیَ، ࢽغَوُورُو وَلْدٜ تَیِیَ ࢻِرْدُ بَدِیٜࢽُو، کْوُ أَمْ کَجَادَیٜدَ رِجْࢽَ ࢽَࢽْغَرُو؞
[13] کْرَمِیَ یَوْدِیَ غَࢻْثَࢽَدْ ثُرُو ࢽَࢽْمْࢽَࢻْکْࢽْجُیٜࢽْ تِرُو کْلَّادَرَ، حَرْ ࢽَࢽْمْࢽَࢻْکْࢽْجَدْ بَرْࢽَبَسْ کْلَࢽْجُمَا لٜىٰࢽُو؞
[14] أَمَّ کْࢽْدُوࢽْجَ کْلَ جِرٜ کَوُرِ کْجِیٜدْیٜࢽْ ثَدِوَوُورُو کِرُکّْࢽِیَ، وُیٜ ࢻُوُ تَیِ سَمَّیٜࢽْ کٜࢻَسُّو: «ࢽِ یَوْدِ دُوُوࢽْ کْࢽْدْغَیْ یَوْدِیَیٜ غْࢽِ کْرْدِیَیٜ دِمِیَ، ࢽدَیِࢽْ غْلٜ کْرْدِیَا یَکّْمٜ کْࢽْدْغَیْ یَوْدِیَیٜ ثَدِ؟» یٜکُّو؞
[15] أَࢽْدِ یَوْدِیَ کَتَمْبِیٜ، بِوُوُ کْرْدِیَ غْࢽِ؞
[16] أَدْ یَیٜ کَمْ وَدَ أَتَّوْرَیٜ غَلَࢽْ غْࢽِ، عِیسَى أَلْمَسِیوُوَ مْرْسَدُلَࢽْ جِرٜمَرُو وَلْجِدَ ࢽُوࢽِیٜࢽَ؞ أَࢽْدِدْ وَدَ غَلَࢽْ غْࢽِ، أَلْمَسِیوُوَ مْرْسَدُلَࢽْ جِرٜوُرُو وَلِّیُورُو تِیَ مْرْسَࢽِیٜࢽَ؞ أَوُووَ وَدَ غَلَࢽْ وُࢽْدُمَ جِرٜمَرُو وَلْجِوَوُو؞
[17] أَدْغَیْمَ أَلْمَسِیوُیٜࢽْ جِرٜوُرُو وَلْدُرُو مَࢽِیٜلَࢽْ أَࢽْدِ یٜ بِوُوُرُو أَسُسٜرَا، أَلْمَسِیوُدْ کِدَمَ بِوُیٜرُو وَلْجِ وَ؟ أَعَ، تْمَّرُو ࢽغَیْ غْࢽِ!
[18] أَوُو وُرْࢽْکّْࢽَدَ وَلْدْکّٜ تَࢽْدْکِّیَ، وُ وَدَا غَࢽَمْبُمَرُو ࢻْلٜدْغْکِّ، دِیٜ؞
[19] أَوُووَ کْلَ وَدَدْیٜࢽْ وَدَدْرُو کَࢽُکُّو، اللَّهرُو دْغَکُّورُو؞ وُوَ أَلْمَسِیوُدَ رُوکُّو کْسْکَرُو جَسَاࢽٜ کَࢽُکُّو،
[20] أَدْࢽْ ࢻُوُࢽْ وُ غْࢽِ دْغَکِّ، أَلْمَسِیوُ وُلَࢽْ دْغَیْ؞ کْرْمَ تِیلَࢽْ دْغَکِّدْ، تَدَ اللَّهیٜ تِ دُوُوࢽْ وُوَ سْرَیٜ وُ ࢽَࢽْغَرُو کْلَࢽْجُ ثِࢽَدَ مْرْسَکّٜ دْغَکِّ؞
[21] سٜرْ اللَّهیٜدَ بُووُرُو کَلَࢽْغْکِّوَوُو؞ ثَ کَمْ وَدَ غَلَࢽْ جِرٜمَرُو وَلْجِیَ، أَلْمَسِیوُدْ بُووُرُو ࢽُࢽَ؞