[1] کَمْبٜرُو وَلِّیُورُو أَلْمَسِیوُ ࢽَࢽْکَمْ کْلَیٜ سٜدُو؞ أَدْ ࢽَࢽْغَرُو دُࢽُووَرُو دَࢽُواْ، بَرٜ کُورُو یَیٜ دُیْ ࢽَࢽْکَرٜیَیٜ ࢽغُوࢽُوِّ!
[2] تُو، ࢻَࢽُّواْ! وُ بُلُسْ ࢽَیِرُو وُلْࢽْجَغَکِّ، کُولُّوٜ کَجَࢽْجَیْیَ، أَلْمَسِیوُ أَوِمَرُو ࢻَیْدَࢽْجَغَیْوَوُو؞
[3] کَمْ کُولْجٜ کَجَجَࢽَ ࢻِ یَیٜرُو ثَیٜ بَوُورُو وُلْغْکِّ، دُولٜࢽْجُرُو وَدَ أَتَّوْرَیٜ سَمَّا غَرُو کْلَرُو ࢽغُوجْࢽَ؞
[4] ࢽَیِ وَدَ غَلَࢽْ جِرٜوُرُو وَلْدُ مَࢽُوِدْ، ࢽَیِیَ أَلْمَسِیوُوَ ࢻَیْدُوَّ، سٜرْ اللَّهیٜ ࢻَࢽْدُویٜ جَوَلْ کُولُّوَّ؞
[5] أَࢽْدِدْ، رُحُ اللَّهیٜ سَسَکّٜ کَمْبْرْسٜلَࢽْ تْمَ جِرٜوُرُو وَلْدُیٜ وَرْࢽِیٜࢽَ؞
[6] أَوُووَ ࢽَ عِیسَى أَلْمَسِیوُیٜࢽْ کَجَ بِ کَجَࢽَمْبُ أَوِمَ غْࢽِ، کَمْبْرْسٜ کْرَوُوࢽْ ࢻْلٜدِ بَسْ ࢻَیْدَا وُو؞
[7] ࢽغْلَرُو ࢻُوُ بُوِ دُوُوࢽْ، وُࢽْدُ ࢽَیِرُو جِرٜ غَ دَمْࢽْجَا؟
[8] جَمْبَ أَدْ تِ ࢽَیِیَ بُواْࢽْجَࢽَدْیٜࢽْ غْࢽِ کَدِیُو؞
[9] یِسْ تْࢽْغْرِ رُࢽْغُو سَمَّا إِسَࢻُجِیے؞
[10] ࢽَیِدْ، کْمَࢽْدٜ ࢽَࢽْغَرُو رَایِ غَدٜ غَوَّوُورُو مْرْسَࢽْجَکّْࢽَ؞ أَمَّ کَمْ حَࢽْغَلْࢽْدُو ثْسَࢽْغِدْ وُࢽْدُرُو وَلْیٜࢽُو یَیٜ أَجَوُ ثَیْ؞
[11] کْرَمِیَ، وُدْ کُورُو یَیٜ کَجَ دِیُو مَوُوࢽْکِّیَ، أَوِرُو غْلٜ کُورُو یَیٜ وُوَ بَسَرْسَیْدْ؟ أَدْغَیْیَ، تَکَّلْ کْسْکَ کَرْمُویٜدْ بَوُورُو وَلْجْࢽَ؞
[12] ثَ أَمْ حَࢽْغَلْࢽْدُو ثَسَࢽْغِدْ تَیِ کْلَࢽْجَ أَدِمْبُو ثَدُو!
[13] کْرَمِیَࢽِ، ࢽَیِیَ ࢽَࢽْکَمْ کْلَیٜ ࢻَࢽْدُورُو بُواْࢽْغٜرَ؞ أَدْ یَیٜ، بَرٜ ࢽَࢽْکَمْ کْلَیٜ أَدْلَࢽْ ࢻَیْدَدُوٜ ࢽِیَدِوِ دِوِّ، أَمَّ وُࢽْدُ یَیٜ کْرَوُو ࢻْلٜجِییَلَࢽْ کَمَࢽْجُرُو ࢽَࢽْوُولُودِ ثْدُّو؞
[14] أَکُّو مَاࢽَ أَتَّوْرَ سَمَّیٜ ثُرُو مَࢽَ ࢻَلّٜࢽْ: «کْمَسْکِࢽْمْ یٜیَ کْلَࢽْمْ غَیْرُو رَیٜ!»
[15] أَمَّ کَتّٜࢽْدُو ثَلُّوٜ ࢽجَࢽْجَࢽْغُوِیَ، حَࢽْغَلْ غْࢽَࢽُواْ، بَرٜ ࢽَیِ کْلَࢽْدُو کْلَࢽْدُووَ سِغْوِّ؞
[16] أَوُو وُلّْکِّدْ تِمَ کُولُّواْ رُحُ اللَّهیٜ سِمُوࢽْجَ، دَجِ مَࢽْغَرْ تِییٜدَ غَلُّوَّوُو؞
[17] مَࢽْغَرْ تِییٜیَ رُحُوَ تَدِوَوُو، کُورُو رُحُوَ مَࢽْغَرْ تِییٜیَ تَدِوَوُو؞ تَیِدْ کَتّٜࢽْجَࢽْ دُوُࢽَّ، أَدْ ࢽَࢽْغَرُو رَࢽْغُوٜ أَوُو رَاوَّدَ دِوَّوُو؞
[18] أَمَّ رُحُدْ ࢽَیِیَ سِمُوࢽْجَیْیَ، ࢽَیِ ࢻْرْدُ وَدَ أَتَّوْرَیٜࢽْ بَوُو؞
[19] کْࢽْدُو تِییٜدْ ࢻَرَکْ، تَیِمَ کْࢽْجْࢽَ سُو، تَیِرْࢽَمْبُ سُو، ࢽَࢽْجَࢽٜ سُو،
[20] سْࢽْمْ غَ سُو، کْمْبَࢻِ سُو، ࢽَࢽْکٜمِ سُو، لَوَلَ سُو، ࢽَࢽْدْرِ سُو، غْرْغَدُ سُو، کْلَ رَوُو سُو، تَاوَࢽَمْبُ سُو، یَکْتُ سُو،
[21] مَࢽْدْࢽَ سُو، سَغَرَࢽْدُ سُو، کْلَرِوُوࢽَمْبُ سُو، أَوُو غَدٜ تَیِیَ ثَمُࢽَّ؞ بُرْوُوࢽْ وُلّْکّْࢽَدْ غَیْ، کُورُو یَیٜ وُلْࢽْجَغَکِّ، أَمْ أَوُو أَࢽِیَ ثَدِدْ ࢽُودُو بَرْغَا اللَّهیٜدَ وَرَسَجَیْوَوُو؞
[22] أَمَّ حَلْ رُحُ اللَّهیٜلَࢽْ تُوَࢽْدِدْ تَیِمَ کْرَوُو سُو، کَرْوُکْجِ سُو، ࢽَࢽْلٜوَ سُو، کَࢽَدِ سُو، ࢽَࢽْجَیْجَ سُو، ࢽَࢽّغْلَ سُو، أَمَࢽْ رُودَ سُو،
[23] رُوکُرَࢽَمْبُ سُو، کْلَرِوُو سُو؞ کْلَ أَوُو أَࢽِیٜࢽْ وَدَ بَوُو؞
[24] أَمْ عِیسَى أَلْمَسِیوُیٜدْ مَࢽْغَرْ سُو، ࢽِیَدِوِ سُو تِییٜدَ کْسْکَرُو جَجَغَࢽٜ رُورُو کٜىٰسُو؞
[25] رُحُ اللَّهیٜ رُو سَدْࢽَدْ، کُولِّیُو رُحُ اللَّهیٜدْمَ أَࢽْدِیَ سِمُوسَ!
[26] بَرٜ رُوکُرَوُرُو وَلِّیٜࢽْدٜ، کُورُو بَرٜ کَتّٜࢽْدٜرُو حَࢽْغَلْسَࢽْغُو سُو، مَࢽْدْࢽَ سُو ࢽغَسَاࢽِّ؞