[1] یَلَّ، کْمَࢽْدٜ ࢽَࢽْغَرُو مَࢽَ بَوَࢽْدُووَ یَࢽْدُووَیٜ غَیْوُو، أَدْمَ کَلْکَلْ وُو؞
[2] «بَوَࢽْمْبَ یَࢽْمْبَرُو دَرَجَ یٜ،» تِمَ وَدَ بُرْوُویٜ وَدُوَدْ وُو:
[3] «کْࢽْدْغَیْࢽْمْ کْلٜوَجُو، کَوُࢽْمْ دُࢽِیَࢽْ کُرُوُرُو وَلْجُورُو؞»
[4] بَوَوَ، بَرٜ حَࢽْغَلْ تَدَوَࢽْدُویٜ سَࢽْغُوٜ غْرْغَجَࢽِّ، تَیِیَ أَلَمْدُوَ سْمُو کَسْتَا کْمَࢽْدٜىٰلَࢽْ إِسَوُرَغْࢽُواْ!
[5] کَرٜیَوَ، رِدُوَ لُولُودُوَࢽْ کَرْوُ تِلُووَࢽْ کْمَوَࢽْدُو دُࢽِیَ أَدْیٜیَ غَیْوُو، أَلْمَسِیوُوَ غَوِدْ غَیْ؞
[6] بَرٜ سَ ࢽجَرُیْ رُࢽْجُࢽْ ࢽَیِیَ ࢽجَرَوُو ࢽَࢽْغَرُو ࢽغَیْ دِوِّ، أَمَّ کَرٜیَوَ أَلْمَسِیوُیٜ غَیْ رَوُو اللَّهیٜیَ کَرْوُࢽْدُو سَمَّࢽْ دٜوُو؞
[7] أَمْبُو غْࢽِ، کْمَࢽْدٜ غَیْرُو کَرْوُ ࢽغْلَࢽْ کِدَ یِدُّواْ؞
[8] ࢽُوࢽُواْ، کَمْ دُوُوࢽْ أَوُو ࢽغْلَ ثْدْࢽَدْ، کَرٜیَ یٜࢽْ کَلْ، کَمْبٜ یٜࢽْ کَلْ، مُکُّو کْمَࢽْدٜىٰࢽْ مُکُووَ ثُوَࢽْدِ؞
[9] کْمَوَ، ࢽَیِ یٜ ࢽغَیْ کَرٜیَوَࢽْدُورُو یِدُّواْ، بَرٜ تَیِیَ وُسَࢽُوِّ؞ ࢽُوࢽُواْ، تِ دُوُوࢽْ کْمَࢽْجَا کَاࢽدُووَدْ سَمٜلَࢽْ دْغَیْ، کُورُو أَمْبَ غَیِرْجِوَوُو؞
[10] دَرْیٜرَمْبُو، کْمَࢽْدٜیَ کْرْمَیْࢽْجُ کُرَالَࢽْ دُࢽُو ࢻَࢽْدُواْ!
[11] کْلَ ࢽَࢽْغَ إِوُلِیسّٜࢽْ دَࢽُواْرُو بَرِمِ اللَّهیٜ سَمَّا ࢽغُوࢽُواْ؞
[12] آدَمْغْࢽَرُو غْࢽِ، ࢻُوُوُ سُو، کْࢽْدُوُووَ سُو، وُرَوَ دُࢽِیَ دُوُوَ أَدْیٜ سُورُو مْلْدِیٜ، کُورُو سٜدَࢽَّ دِوِ دِوِ سَمٜىٰ یٜرُو مْلْدِیٜ؞
[13] أَدْ ࢽَࢽْغَرُو بَرِمِ اللَّهیٜ سَمَّا ࢽغُوࢽُواْ؞ ࢽغَیْࢽِࢽْ یِمْ دِوِدْ إِسٜ أَوُو سَمَّا دِوٜ تُمُوغْوِیَ، رَࢽْغُوٜ دُࢽُووَرُو دَࢽُوِ؞
[14] دُࢽُووَرُو دَࢽُواْ، جِرٜ اللَّهیٜدَ بٜلْ غَیْ ثَࢽْجَࢽْدُورُو یِکّٜرُواْ، ࢽَࢽْجِرٜدْلَࢽْ سُلْوٜ غَیْ جَکْتْࢽُواْ،
[15] دَبَّرْدْࢽُواْ کَوُرِ کْجِ ࢽَࢽْلٜوَیٜدَ سِࢽْدُورُو سُࢽُو غَیْ یَکُّواْ،
[16] أَوِسُو یَیٜࢽْ کَمْبْرْسٜدَ ࢽغَوَ غَیْ ࢽغُوࢽُواْ، تِلَࢽْ رَࢽْغُوٜ کْࢽِوُوَ کَࢽُّوَ کْلَدُودْیٜ سَمَّا کَلُّوِ،
[17] ࢽجْکَّوُودَ جَوَ سُیٜ غَیْ یَکُّواْ، کُورُو کَشَغَرْ رُحُیٜدَ تَیْوُو، تِمَ مَࢽَ اللَّهیٜدْ وُو؞
[18] سَوِ یَیٜ ثُرُو مُودُوَࢽْدُووَ لُواْࢽْدُووَیٜࢽْ اللَّهَ رُحُلَࢽْ کُورُواْ، ࢻَادَرُو دْغَیْوُو، ࢽٜتُّلَࢽْ مُمِࢽَّ سَمَّرُو مُودُوَ یِدُّواْ؞
[19] وُ یٜرُو مُودُوَ سْدُّواْ، اللَّه وُرُو کَلْمَوَ سِیُو، رِدُ بَوُووَرُو مَࢽَ أَسْرْ کَوُرِ کْجِیٜدَ وُلّْکُّورُو،
[20] وُ دُوُوࢽْ وَکِّلْ کَوُرِ کْجِیٜ سَرْغَلَࢽْ سَکّٜرْࢽَدْ؞ کَوُرِدَ رِدُ بَوُووَرُو جِرِ وَجِمْسْغْࢽَدْ غَیْرُو وُلّْکُّورُو اللَّهَ کُورُواْ؞
[21] ࢽَیِ یٜ لَوَرْ وُوَ وُسْࢽَا أَوُو دِکِّیَا ࢽُوࢽُواْرُو، تِکِکُسْ کْرَمِࢽْدٜ تْرَاࢽَ یٜ، کِدَمَ أَمَࢽَّ کْمَࢽْدٜىٰ یٜ أَوُو سَمَّا ࢽَیِرُو وُلْࢽْجَغَیْ؞
[22] ࢽَیِرُو ࢽَࢻْتُࢽْدٜ وُلْࢽْجَا، کَرْوُࢽْدُورُو دُࢽُو ثُورُو تِیَ جُوَࢽْجَغَکّْࢽَ؞
[23] اللَّه بَوَا کْمَࢽْدٜ عِیسَى أَلْمَسِیوُوَدْ کْرَمِیَ سَمَّرُو ࢽَࢽْلٜوَا کْرَوُووَ کَمْبْرْسٜیَ ثَدُو؞
[24] سٜرْ اللَّهیٜ أَمْ کْمَࢽْدٜ عِیسَى أَلْمَسِیوُوَ کْرَوُو ثٜرِوَوُوࢽْ ثَرَاࢽَ سَمَّلَࢽْ دْغَ!