[1] أَࢽْدِمَ بُلُسَّ تِمُوتِیَ وُولُودِیَ عِیسَى أَلْمَسِیوُیٜدْ مُمِࢽَّ عِیسَى أَلْمَسِیوُیٜ بْرْࢽِ ࢻِلِبِیٜࢽْ دَسَاࢽَ سَمَّ ࢻُوُوُوَ بَࢽَوُوَࢽْ کُࢽْدٜࢽُّو:
[2] اللَّه بَوَࢽْدٜیَ کْمَ عِیسَى أَلْمَسِیوُوَ ࢽَیِرُو سٜرَّ ࢽَࢽْلٜوَا ࢽجَدُو!
[3] سَوِ یَیٜ ࢽَیِیَ تَࢽّجَکِّیَ، اللَّهࢽِیَ وُسٜࢽْکِّ؞
[4] کُورُو سَوِ یَیٜ مُودُوَ ࢽَیِ سَمَّرُو ࢽجَدّْکِّیَ، کَرْوُ کْجِیَرُو دِکِّ،
[5] دَلِلْࢽْجُدْ یِمْ بُرْوُویٜࢽْ تَیْ حَرْ کْرْمَرُو کُدٜرُو ثُرُو کِدَ کَوُرِ کْجِدْیٜࢽْ وُوَ رُوکُّو مُکُّوࢽْدُو یَکُّوَّ ࢽَࢽْغَرُو؞
[6] تَبَّتُّو تِ دُوُوࢽْ ࢽَࢽْدُوࢽْ کْࢽْدُو ࢽغْلَ ࢽغْسّْࢽَدْ حَرْ یِمْ عِیسَى أَلْمَسِیوُیٜرُو تُمُوجِیرُو ࢽُوکّْࢽَ؞
[7] ࢽَیِ سَمَّا ࢽغَیْ تَکْتُدْ وُرُو جُسّْࢽَ، ࢽَیِ کَرْوُࢽِلَࢽْ ࢽَࢽْغَرُو؞ أَوُووَ کُوسُولَࢽْ کْرْغَکُّو یٜࢽْ کَلْ، کَوُرِ کْجِدَ سْرِوُوࢽْکّٜ تَبَّتْکْکِّ یٜࢽْ کَلْ، ثُرُو سٜرْ اللَّهیٜࢽْ ࢽَیِ سَمَّ وُوَ رُوکُّو مُکُّوࢽْدُو یَکُّوَّ؞
[8] کْرَوُو عِیسَى أَلْمَسِیوُیٜࢽْ ࢽَیِ سَمَّا ࢽجَرَاکّْࢽَرُو اللَّه شٜدَمَࢽِ؞
[9] ࢽُودُوَ أَسُدُ سَمَّاࢽْ کْرَوُوࢽْدُو ࢽغْوُرُو تْرْغَرُو مُودُوَ دِکِّ،
[10] ࢽغَیْࢽِࢽْ أَوُو ࢽغْلَدَ غَیِرْࢽُوٜ تَیِرَّ بِوُ بَوُووَلَࢽْ حَرْ یِمْ أَلْمَسِیوُیٜرُو دْغَوٜ،
[11] اللَّه یٜ دَرَجَا ࢽجُࢽْغُورُووَ ثُوَࢽْدُورُو ࢽٜمَ ࢽَࢽْجِرٜىٰ دُوُوࢽْ عِیسَى أَلْمَسِیوُیٜࢽْ إِسِدْ دَمَ بَوُورُو کَرْوُࢽْدُوࢽْ ࢽَࢻْثِ؞
[12] کْرَمِیَ، أَدَ ࢽُوࢽُوِیَ، رَاکُّو، أَوُو وُوَ سُوَࢽْدْࢽَدْ ثَکّٜ کَوُرِ کْجِ ࢻُوُ جُوُࢽَ،
[13] حَرْ سُوجِدِ غُومْࢽَیٜ ࢽغَࢽْ کُورُو أَمْ غَࢻْثَࢽَ سَمَّࢽْ وُ أَلْمَسِیوُ ࢽَࢽْغَرُو کُوسُولَࢽْدَ ࢽُوجَࢽَ؞
[14] کُورُو وُوَ کُوسُورُو سَسَکّْࢽَ ࢽَࢽْغَرُو، کْرَمِیَیٜ ࢽغْوُࢽْجَ کْمَلَࢽْ دُࢽُو ثَوَࢽْدٜ رِدُ بَوُووَرُو مَࢽَ اللَّهیٜ وُلْجَیْ؞
[15] لَاࢽجَ مَࢽَ أَلْمَسِیوُیٜیَ ࢽَࢽْدْرِیَ ࢽِیَدِوِیَلَࢽْ ثَدِ، أَمَّ لَا یٜ ࢽِیَ ࢽغْلَاࢽْ ثَدِ؞
[16] تَیِ أَࢽِ کْرَوُویٜࢽْ مَࢽَ ثَدِ، وُ ࢽَ أَدْࢽْ کَوُرِ کْجِدَ سْرِوُوࢽْکِّرُو ࢽُوجَࢽَدْرُو؞
[17] أَمَّ تَیِ تُوࢽِ کُتُّࢽِ کُوسُویٜ ثَسَرْغَیْ ثَࢽٜ ࢽِیَ ࢽغْلَاࢽْ غْࢽِ، ࢽِیَدِوِࢽْ مَࢽَ أَلْمَسِیوُیٜیَ ثَدِ؞
[18] أَوِ غْلٜ؟ جِرِ ࢻِࢽْ یَیٜ ࢽِیَ ࢽغْلَا یٜࢽْ کَلْ، ࢽِیَدِوِ یٜࢽْ کَلْ، أَلْمَسِیوُیٜ مَࢽَ ثَدِ؞ أَدْیٜ کْجِࢽْجُ ࢻَکّٜࢽَ، کُورُو کْجِࢽْجُ ࢻَکِّࢽْ دْغَکِّ؞
[19] مُودُوَࢽْدُووَ بَࢽَ رُحُ عِیسَى أَلْمَسِیوُیٜیَ ࢽَࢽْغَرُو کْلَࢽِ ࢻَࢽْدْکِّرُو ࢽُوکّْࢽَ؞
[20] کْلَ تَبَّتُّوُ تْمَࢽِیٜࢽْ أَوِمَا ࢽَࢽْغُکِّوَوُو، أَمَّ کْرْمَ، سَوِ یَیٜ غَیْ، رُوࢽِ یٜࢽْ کَلْ، کَرْمُوࢽِ یٜࢽْ کَلْ، ࢻٜدٜرُو تِیࢽِࢽْ أَلْمَسِیوُرُو دَرَجَ یِکِّ؞
[21] وُدْ، رُوࢽِیَ دْغَدْ أَلْمَسِیوُ، کَرْمُوࢽِدْ یٜ ࢻَࢽْدِ؞
[22] رُووَ تِیلَࢽْ دْغَکِّرُو وَلْیٜࢽُووَ، کِدَࢽِ ࢻَیْدَارُو وَلْجِ، أَمَّ ࢻِࢽْجَا کْرٜࢽْکِّمَرُو ࢽُوکّْࢽِ؞
[23] وُ کَتّٜ أَوُو یِࢽْدِیٜࢽْ کِمِتْکَدَ؞ سَࢻْتْمٜ ࢽَ أَلْمَسِیوُیٜࢽْ ࢽَࢻْتُلَࢽْ مْرَدُࢽِیَ، تِمَ ࢽغَلْوُو،
[24] أَمَّ رُووَ تِیلَࢽْ دْغَکّْࢽَمَ ࢽَیِ ࢽَࢽْغَرُو ࢻَیْدَا وُو؞
[25] أَدَ تَبَّتُّو مْرْسَࢽْکّْࢽَ ࢽَࢽْغَرُو، کَمْبْرْسٜدْلَࢽْ ࢻُوُ بُیْوُو کَرْوُࢽْدُو یٜ کْجِجُورُو ࢽَمّْکّٜ ࢽَیِ سَمَّا رُوکُّو دْغَیْیٜرُو ࢽُوکّْࢽَ؞
[26] ࢽغَیْمَࢽْ سَ ࢽَࢽْدُورُو وَلْدْکِّیَ، وُ ࢽَࢽْغَرُو دَلِلْ کْلَ عِیسَى أَلْمَسِیوُیٜࢽْ أَوُلُو بُویٜ ثَیٜ بَوُورُو ࢻَࢽْدُوِ؞
[27] أَوُو سَمَّسُورُو ࢽغَلْوُودْ، کْࢽْدْغَیْ کَوُرِ کْجِ أَلْمَسِیوُیٜرُو جُسّْࢽَ دٜوُو، دَجِ إِسْکّٜ ࢽَیِیَ ࢽجَرُکِّ یٜࢽْ کَلْ، إِسْکِّوَوُو یٜࢽْ کَلْ، ࢽِیَ تِلُووَࢽْ دُࢽُووَرُو دَࢽُوِ یٜ، کَرْوُ تِلُووَࢽْ کَلُّو کَمْبْرْسٜ کَوُرِ کْجِیٜرُو ࢽغْࢽْࢻْتُوِ یٜرُو ࢻَکِّ؞
[28] بَرٜ أَوِمَࢽْ کُولُّوٜ وَدُوُࢽْدُو کَرْوُࢽْدُو کَمْجَࢽِّ؞ أَدْمَ تَیِرُو شٜدَ سِدُوُࢽْجَیٜ یٜ، ࢽجْکَّوُوࢽْدُویٜ یٜرُو وَلْجِ، شٜدَ دُوُوࢽْ ࢽَ اللَّهیٜࢽْ إِسِدْ؞
[29] أَلْمَسِیوُ ࢽَࢽْغَرُو سٜرْ تِیَ کَسَتُّیٜ رُࢽْجُ غْࢽِ، تِ ࢽَࢽْغَرُو بُوࢽٜ ࢽجَ یٜ ࢽَیِرُو ࢽجَدْࢽَ؞
[30] ࢽَیِ یٜ ثُرُو مْلْدُیٜࢽْ دْغَوِ، جِرِ مْلْدْکِّ رُوَّدْ غَیْ، کُورُو کْرْمَ مْلْدْکِّ ࢻَࢽُّوِدْ؞