[1] ࢽَیِدْ أَیَوْوَࢽْدُووَ بِوُوَࢽْدُووَ ࢽَࢽْغَرُو ࢽُوَّ،
[2] کُورُو ثَلَࢽْ تَیِلَࢽْ دْغَوٜ جَوَلْ دُࢽِیَ أَدْیٜ یٜ، مَیْ کْࢽْدُوُو کَرُوَیٜ، وُوتّٜ إِوُلِیسْ تِ غَࢽَمْبُوُوَ سِمُوجِ کْرْغَدْ یٜیَ غَوَّ؞
[3] أَࢽْدِ سَمَّ یٜ ثَلَࢽْ دَوُࢽْجَࢽْ مَࢽْغَرْ تِیࢽْدٜىٰࢽْ دْغَیْیٜ أَوُو تِیࢽْدٜیَ حَࢽْغَلْࢽْدٜیَ ثَرَاࢽَا دِیٜ، کُورُو ࢽغَیْࢽِࢽْ أَࢽْدِ أَمْ غَدٜ غَیْ تَدَوَ غْرْغَدُ اللَّهیٜرُو وَلِّیٜࢽَ؞
[4] أَمَّ اللَّه جَوْرُو کَࢽْجِمَرِمَدْ، کْرَوُو کُرَࢽْ أَࢽْدِیَ سَرَاࢽَ ࢽَࢽْغَرُو،
[5] ثُرُو أَیَوْࢽْدٜىٰࢽْ ࢽُیْیٜࢽَ یَیٜ، أَࢽْدِیَ أَلْمَسِیوُوَ رُوکُّو رُووَرُو کَلَࢽْسٜࢽُو؞ سٜرْلَمَࢽْ ࢽجْکَّوُو کِوَࢽْدُوْ!
[6] کُورُو أَࢽْدِیَ أَلْمَسِیوُࢽْ کُࢽْدٜࢽُّو کَرْمُولَࢽْ سَسَࢽْغٜ ࢽَ سَمٜىٰلَࢽْ عِیسَى أَلْمَسِیوُ ࢽَࢽْغَرُو سَسَکّٜ تِیَ رُوکُّو ࢽَمِّیٜࢽَ،
[7] ࢽغَیْࢽِࢽْ جَمَࢽَّ ࢻُوُیٜࢽْ اللَّه ࢽَࢽّغْلَࢽْجُ أَࢽْدِرُو سَدّْࢽَدْیٜࢽْ سٜرْࢽْجُ ثِ بَوُووَ عِیسَى أَلْمَسِیوُلَࢽْ ࢻْلٜجِ؞
[8] أَوُووَ سٜرْلَمَࢽْ کَمْبْرْسٜىٰࢽْ ࢽجْکَّوُو کِوَࢽْدُوْ، کُورُو أَدْ ࢽَیِیٜࢽْ غْࢽِ إِسِ، تِدْ کْࢽْجُو اللَّهیٜ،
[9] کِدَࢽْدُویٜࢽْ غْࢽِ، بَرٜ وُࢽْدُمَ أَوُلُو جُوُࢽِّرُو؞
[10] أَࢽْدِدْ تَࢽْدُو اللَّهیٜ، کْࢽْدُو ࢽغْلَ اللَّه ثَمَࢽْ دَبَّرْجْࢽَدَ دِیُورُو عِیسَى أَلْمَسِیوُلَࢽْ أَلَࢽْسٜرَ؞
[11] أَدْمَ ࢽَࢽْغَرُو، ࢽَیِ تَمْبُویٜࢽْ کْرْدِیَدْ، أَمْ کْلَࢽْجَرُو کَجَادَ ثَࢽِدْ کُرٜࢽْ جْمْبْلْمْلَࢽْ بُواْࢽْجَیْ، تَیِ دُوُوࢽْ کَجَࢽْجَ تِییٜ مُکُّو کَمْبٜࢽْ تْدْࢽَدْ؞ تَࢽْغُواْ، سَدْࢽْ
[12] ࢽَیِ أَلْمَسِیوُ بَوُولَࢽْ دْغَوَّ، ࢽُوَࢽْدُو جَمَ إِسْرَاءِیلَیٜࢽْ بَوُو، ࢽَیِ أَمَࢽْ وَدُ اللَّهیٜرُو کُسُوتُّو، کُورُو دُࢽِیَࢽْ تْمَ یٜ تَوِّ، اللَّه یٜیَ ࢽُوࢽُوِّ؞
[13] أَمَّ کْرْمَ عِیسَى أَلْمَسِیوُ ࢽَࢽْغَرُو، ࢽَیِ ثَلَࢽْ اللَّهࢽْ کُرُوُࢽْ دْغَوَّدَ بُ أَلْمَسِیوُیٜࢽْ کَرْࢽّجُرُو ࢽجَوُدْࢽَ؞
[14] تِ کْلَࢽْجُمَ ࢽَࢽْلٜوَࢽْدٜ وُو، تِمَ جَمَ یِࢽْدِدَ ࢻَلُّو ثْدٜ تِیࢽْجُࢽْ غَرُ دُوُࢽّٜدَ وُرْجُو؞
[15] شَرَ سُو، وَدَ سُو أَتَّوْرَیٜدَ بَوُورُو کِدُو، ثُجُ جَمَ یِࢽْدِ أَࢽِیٜرُو کْلَࢽْجُࢽْ کَمْ بْرِࢽْ ࢻَلْ أَلَکّٜࢽُو؞ ࢽغَیْࢽِࢽْ کَتّٜࢽْجَرُو ࢽَࢽْلٜوَ ثُوُدٜ
[16] تِیے ࢻَلْࢽِࢽْ کْسْکَ کَرْمُویٜدْیٜࢽْ یِࢽْدِدَ اللَّهَ سُولُوجٜ دُوُࢽْدَ بَوُورُو کِدُو؞
[17] سَ أَلْمَسِیوُ إِسْࢽَدْࢽْ، ࢽَیِ اللَّهࢽْ کُرُوُࢽْ دْغَوَّدْرُو کَوُرِ کْجِ ࢽَࢽْلٜوَیٜ ࢽغٜدُّو، کُورُو أَمْ کَرْࢽّٜدْ یٜرُو ࢽغَیْ کِدُّو؞
[18] تِیٜمَࢽْ أَࢽْدِ یِࢽْدِ سَمَّ رُحُ ࢻَلْدْیٜࢽْ ࢽَ بَوَدْیٜرُو ࢽغَوُو کِوَࢽْدِیٜ؞
[19] أَدْ ࢽَࢽْغَرُو ࢽَیِ غَدٜرُو کُسُوتُّووَ بِ سِکُدُووَ غْࢽِ، ࢽَیِ مُمِࢽَّا رُوکُّو جَمَ اللَّهیٜ، أَمْ ࢻَࢽّجُیٜ،
[20] ࢻَدُو دُوُوࢽْ کْلَ ࢻْرْدُ کْࢽْغَیَمْبَدْیٜیَ ࢽَوِیَدْیٜیَیٜࢽْ تْدَࢽْدْࢽَدْ، کُورُو عِیسَى أَلْمَسِیوُ کْلَࢽْجُمَ کَوْ مَسَمَّࢽّٜدْ وُو؞
[21] تِلَࢽْ ࢻَدُودْ ࢽغَ ࢽغْلَرُو کْلْدٜ ࢻَدُو تَیِرْ اللَّهیٜرُو وَلْجِ،
[22] کُورُو تِلَمَࢽْ ࢽَیِ یٜ ࢻَدُو اللَّهیٜرُو وَلُّوِ، ࢽَ دُوُوࢽْ رُحُࢽْجُلَࢽْ دْغَیْدْ؞