[1] أَدْمَ ࢽَࢽْغَرُو وُ کْمَࢽْدٜرُو کُوسُومَدْ، ࢽَیِیَ لُواْࢽْجَکِّ، بُواْدُࢽْجُ مُووُوَّدْرُو کْࢽْدْغَیْ جُسّْࢽَ دٜوُو!
[2] رُوکُرَ بَوُووَ یٜ، ࢽَࢽْلٜوَا یٜ، کَࢽَدِیَ یٜرُو وَلُّواْ، کْرَوُووَلَࢽْ کَمَࢽْدُووَ ࢽٜدُّواْ،
[3] کُواْرِ دٜوُو، کْلَکْلْ رُحُ اللَّهیٜ کْلْجْࢽَدَ ࢽَࢽْلٜوَیٜࢽْ دُࢽُووَرُو تَیْوُو؞
[4] تِیے ࢻَلْمَ دْغَ، کُورُو رُحُ اللَّهیٜ ࢻَلْمَ دْغَ، اللَّه ࢽَیِیَ تْمَ ࢻَلْمَرُو بُواْࢽْجَࢽَدْ غَیْ؞
[5] کْمَࢽْدٜ یٜ ࢻَلْمَ، کَمْبْرْسٜ یٜ ࢻَلْمَ، کَسَلَ یٜ ࢻَلْمَ،
[6] کُورُو اللَّه یٜ ࢻَلْمَ، بَوَ أَمْ سَمَّیٜ، أَوِسُورُو کُرَ وُو، أَوِسُوࢽْ ࢻَیْدَدُمَ، دَوُ أَوِسُویٜࢽْ دْغَࢽَدْ؞
[7] أَمَّ وُࢽْدُࢽْدٜ یَیٜ سٜرْ کْلَ کْࢽْجُو أَلْمَسِیوُ ࢽغَلْجٜ ثِࢽَیٜࢽْ ثُوَࢽْدْࢽَ؞
[8] أَکُّو أَوُو کِتَوُ وُلْجْࢽَدْ: «سَمٜرُو لٜىٰࢽِّیَ، کُوسُووُ کَدَ ثُوُدٜ أَمْبُو کْࢽْجُو جِرِ جِرِ کَیْࢽُو؞»
[9] تُو، سَمٜرُو لٜجْࢽَدْ، أَوِ مَاࢽَࢽْجُ وُو، کْرْیٜیَ کُرُوُ ثِدِیَ ثِدِیٜ یٜرُو جْࢻْثْࢽَ غْࢽِیَ؟
[10] تِ جْࢻْثْࢽَدْ تِمَ سَمٜ کُرُوُ یٜرُو أَوُو سَمَّا ثْمْبْرُورُو لٜجْࢽَدْ؞
[11] تِمَ کْࢽْجُووَ أَمْبُو ثْدّٜ: لَاࢽجَا کْࢽْغَیَمْبَرُو، لَا ࢽَوِیَرُو، لَا کَوُرِ کْجِ مَوُودُوُرُو، لَا سْࢽِیَ جَمَ اللَّهیٜیَ مَلْمْبَارُو کِدُو؞
[12] ࢽغَیْࢽِࢽْ تِیے أَلْمَسِیوُیٜ دُࢽُووَجُورُو، مُمِࢽَّدَ دَبَّرْجَࢽٜ کِدَࢽْجَ ثَدِ،
[13] حَرْ أَࢽْدِ سَمَّ کْلَکْلْ کَمْبْرْسٜىٰیَ تَدَ اللَّهیٜ ࢽُودُیٜیَ سُو، ࢽَࢽْرَشِدُ سُو، حَلْ تْرْمْ أَلْمَسِیوُیٜ سُو ࢽَغْیْیٜ؞
[14] دَجِ أَࢽْدِ غَدٜرُو تَدَوَ غَیْرُو وَلِّیٜوَوُو، تَدَوَ دُوُوࢽْ تْمْبَرِسُو یٜ ثَمْبَلْجَیْ، بُوَسُو أَلَمْدُ جِرِ جِرِیٜ یٜ ثِجَࢽٜ جَوْرُو ࢻُجَیْ، ࢽَࢽْغَسُو یٜ تَیِیَ جَمْبَجَیْدْ؞
[15] ثُجُ أَدْیٜرُو جِرٜ کْرَوُوࢽْ وُلِّیُو، جَوَلْ ࢻِࢽْ یَیٜ وُرَࢽِیُو ثَمُࢽُو ࢻُوُمَࢽْدٜ أَلْمَسِیوُیٜرُو وَلِّیُو!
[16] أَلْمَسِیوُیٜࢽْ تِیے سْرَمْ کَلْکَلُّو کْلْدِ؞ ࢽَشَ ࢻِ یَیٜ جِرِ جُسّْࢽَࢽْ کِدَجِیَ، ࢽَشَ غَدٜیَ ثَکّٜ وُرَجَیْ؞ ࢽغَیْࢽِࢽْ تِیے سْرَمْدْ ࢽَࢽْلٜوَارُو وَلْجٜ وُرَجٜ کْرَوُوࢽْ ࢻُوُ جُوُیْ؞
[17] أَدْ ࢽَࢽْغَرُو ࢽغَیْ وُلّْکّٜ ثُ کْمَࢽْدٜىٰࢽْ جَوْرُو لُواْࢽْجَکِّ، بَرٜ غَدٜرُو کْرْدِیَ حَࢽْغَلْࢽْجَ ࢻَیْدَ بَوُووَلَࢽْ دَسَیِدْ غَیْرُو دْغَوِّ!
[18] حَࢽْغَلْࢽْجَ دُوُرُو وَلْجْࢽَ، ࢽَࢽْجَیِلْࢽْجَا کْلَکِبُّࢽْجَا ࢽَࢽْغَرُو رُو اللَّهیٜࢽْ ࢽُوَࢽْجَ ࢻَلْمَ بَوُو؞
[19] کَرْوُࢽْجَ غَیِرْجِوَوُورُو وَلْجٜ أَوُو دِوِ دِوِ مَࢽْغَرّٜ یٜ ثَدْࢽَ، کُورُو ثَیٜ کُوجْࢽَرُو أَوُو تَیِرْ غْࢽِ جِرِ جِرِرُو کْلَࢽْجَ ثَسَکّْࢽَ؞
[20] أَمَّ ࢽَیِدْ، أَوُو کْلَ أَلْمَسِیوُیٜࢽْ ࢽجَسَکّْرَࢽَدْ ࢽغَیْ غْࢽِ!
[21] تَبَّتُّو کْلَࢽْجُیٜࢽْ ࢻَࢽُّوَّ، کُورُو جِرٜ عِیسَلَࢽْ دْغَࢽَدْ غَیْ، تِیٜࢽْ ࢽجَسَکّْرَࢽَ؞
[22] دَجِ کْࢽْدْغَیْࢽْدُو ثَیٜدَ کُولُّواْ، ࢽَࢻْتُࢽْدُو ثَیٜ مْرَدُ جَمْبَیٜیَ سِدُوُرُو ثَدِدَ وَࢽُواْ،
[23] حَࢽْغَلْ کَرْوُࢽْدُویٜࢽْ بْرِࢽُّو وَلُّواْ،
[24] ࢽَࢻْتُ بْرِࢽْ ࢽَࢽْجِرٜیَ ࢽَࢽْتَیِرَّلَࢽْ اللَّهَ ثَمُࢽُّو أَلَکْتْࢽَدَ لُࢽُواْ؞
[25] أَدْمَ ࢽَࢽْغَرُو کَتُّوُ کَمْدُ وَࢽُواْ، کَمَࢽْدُورُو جِرٜ وُلْغْࢽُواْ، وُࢽْدُࢽْدٜ یَیٜ ࢽَشَ کَمَࢽْجُیٜ ࢽَࢽْغَرُو؞
[26] غْرْغَࢽُوِیَ، بَرٜ بِوُ دِوِّ؞ کُورُو غْرْغَدُࢽْدُودْ کَوُ کْࢽْغَلْ ثُکُّرِرُو ࢻَسُّو؞
[27] بَرٜ إِوُلِیسُّو دَمَ یِوِّ؞
[28] بَرْوُ أَدْࢽْ ࢻُوُࢽْ ࢽَمْبَرْوُ دِیُو کُولْجُو، ثُجُ أَدْیٜرُو مُکُّوࢽْجُࢽْ ࢽغْلَرُو ࢽغْࢽْࢻْتُو، أَوُو لَا کَمْ مْرَدُࢽْجُوَرُو ࢽجُویٜ ثْدَرُو؞
[29] بَرٜ مَࢽَکُتُّ ࢻِمَ ثِࢽْدُوࢽْ ثُلُوُࢽِّ، سَیْ أَوُو مْرَدُرُو ࢻَیْدَا أَمْبُو دُࢽُو ثَکِّدْ، تَیِ ࢻَࢽْجَیْدْرُو سٜرْ ثْدُّورُو؞
[30] بَرٜ رُحُ اللَّهیٜدَ کَرْوُ کُتُّوَرُو دِوِّ، تِمَ یِمْ مٜرُدُیٜرُو ࢽَیِرُو تَوَ غْࢽَࢽْجَا؞
[31] أَوُو کُتُّوَ حَࢽْغَلْسَࢽْغُووَ غْرْغَدُوَ کُواْ سَࢽْغُووَ رَدُوَ سَمَّ ࢽِیَدِوِ ࢽغَا رُوکُّو ࢽَیِࢽْ کُرُوُࢽُّو وَلْجُو؞
[32] کَتّٜࢽْدُوࢽْ أَمْ ࢽغْلَ یٜ، کَࢽْجِمَرِوُ یٜرُو وَلُّواْ، کَمَࢽْدُووَ غَوُرْࢽُواْ، اللَّه أَلْمَسِیوُ ࢽَࢽْغَرُو ࢽَیِیَ غَوُرْࢽْجَࢽَدْ غَیْ؞