[1] أَدْ ࢽَࢽْغَرُو ࢽَیِ تَدَوَ تْرَاࢽَدْ، حَلْ اللَّهیٜیَ ࢽغُوࢽُواْ؞
[2] کْࢽْدْغَیْ کْرَوُویٜ دٜوُو، جِرِ أَلْمَسِیوُ أَࢽْدِیَ سَرَیٜ سَدَآ بُ ࢻِدَا ࢽَ اللَّهیٜࢽْ کَوُدِ کَلَ کْجِیَرُو وَلْجٜ أَࢽْدِ ࢽَࢽْغَرُو کْلَࢽْجُ ثِࢽَدْ غَیْ؞
[3] أَمَّ بَرٜ کْࢽْجْࢽَ، بِ تَیِرْࢽَمْبُ ࢻِ یَیٜ، بِ مَࢽْغَرْ دِوِ ثُرُوࢽْدُوࢽْ وُلْدْࢽِّ، مُمِࢽَّرُو جُسّْࢽِّ؞
[4] کُورُو مَࢽَ کُتُّ، بِ مَࢽَ حَࢽْغَلْࢽَمْبُیٜ، بِ بَتِّ وُلْدُ ࢽَیِرُو جُسّْࢽِّ، ثُجُ أَدْیٜرُو اللَّهَ وُسٜࢽُواْ؞
[5] أَدَ ࢽغْلَرُو ࢽُوࢽُواْ: کْࢽْجْࢽَمَا تَیِرْࢽَمْبُمَا مَࢽْغَرْدُمَ وُوتّٜ سْࢽْمْ غَمَدَ سَمَّ ࢽُودُو بَرْغَا أَلْمَسِیوُوَ اللَّهَیٜࢽْ وَرَسَ ࢻِمَ ثَوَࢽْدِوَوُو؞
[6] بَرٜ وُࢽْدُمَ مَࢽَ بُووُیٜࢽْ جَمْبَࢽْجَࢽِّ، أَوُو أَࢽِ ࢽَࢽْغَرُو غْرْغَدُ اللَّهیٜ غَࢽَمْبُوُوَ ثُوَࢽْدِ؞
[7] أَدْ ࢽَࢽْغَرُو بَرٜ تَیِرُو کْلْدْغْوِّ؞
[8] ثَلَࢽْ ࢽَیِ ثُرُو دُوُیٜࢽْ، أَمَّ کْرْمَ کْمَࢽْدٜدْرُو ࢽَیِ ثُرُو ࢽُرّٜࢽْ؞ تَدَوَ ࢽُرّٜ غَیْرُو دْغَیْوُو،
[9] أَوُووَ ࢽٜمَ ࢽُرّٜدْ أَوُو ࢽغْلَا کَلْکَلَّ جِرٜیَ سَمَّلَࢽْ کْرْغَ؞
[10] رِجَمُّواْ، أَوُو کْمَࢽْدٜ أَرْدِجْࢽَدَ أَسُࢽُواْ؞
[11] بَرٜ کِدَ ࢻَیْدَ بَوُووَ دُوُیٜرُو مُکُّو یَکُّوِّ، ثُجُ أَدْیٜرُو ࢻِسَدُّواْ!
[12] أَوُو غْرَادَࢽْ ثَدِسُودَ مَࢽَدُمَرُو ࢽَࢽْغُوَ؞
[13] أَمَّ أَوُو ࢻِ یَیٜیَ ࢽُرْ ࢻْلٜجْغْࢽَدْ ࢻٜدٜرُو ثُلُوِ،
[14] کُورُو أَوُو ࢻِ یَیٜ ࢻٜدٜرُو ثُلُوُࢽَدْ ࢽُرُّو وَلْجِ؞ أَدْمَ ࢽَࢽْغَرُو ࢽغَیْ وُلْدِ: «ࢽِ کْࢽْمْ دِمِمَدْ، ࢻَࢽّٜ، کَرْمُولَࢽْ ثِࢽٜ، أَلْمَسِیوُ ࢽِیَ وَسْࢽْجِ؞»
[15] جِرِ دْغَوِرُو حَࢽْغَلْ غْࢽَࢽُواْ، أَمْ حَࢽْغَلْ بَوُووَ غْࢽِ، رَشِدُ غَیْرُو وَلُّواْ؞
[16] دَمَ ࢻَࢽْدُوَّ ࢻِࢽْ یَیٜ أَوُو ࢽغْلَ دٜوُو، جَمَࢽْ دِوِࢽْ دْغَیْیٜࢽَ ࢽَࢽْغَرُو؞
[17] بَرٜ حَࢽْغَلْ کُتُّوَرُو وَلُّوِّ، أَمَّ رَوُو کْمَࢽْدٜىٰدَ أَسُࢽُواْ؞
[18] بَرٜ دِبٜࢽْ یَوٜ سَغَرَࢽْدُوِّ، حَلْکُتَّرُو ثَدِ، أَمَّ رُحُ اللَّهیٜࢽْ تْمْبْرُوَّرُو وَلُّواْ؞
[19] کَتّٜࢽْدُوࢽْ جَوُرَ سُو، أَیْیَ سُو، ࢽجُࢽْغُورُو رُحُیٜ سُو دٜوُو، کْمَࢽْدٜ یٜرُو أَیْیَ ࢽجُࢽْغُورُویٜ کَرْوُࢽْدُو سَمَّࢽْ یٜغْࢽُواْ؞
[20] اللَّه بَوَا سَوِ یَیٜ أَوِࢽْ یَیٜ ثُ کْمَࢽْدٜ عِیسَى أَلْمَسِیوُیٜࢽْ وُسٜࢽُواْ؞
[21] وُࢽْدُ یَیٜ کَمَࢽْجُوَ رِدُ أَلْمَسِیوُیٜ ࢽَࢽْغَرُو جْغَ؞
[22] کَمُوَ، کوَوَࢽْدُووَ غَیْوُو، کْمَࢽْدٜیَ غَوَّدْ غَیْ؞
[23] کوَدْ تِمَ ࢻُوُمَ کَمُࢽْجُیٜ وُو، أَلْمَسِیوُ یٜ ࢻُوُمَ جَمَ اللَّهیٜدْ غَیْ، جَمَدْ تِیࢽْجُ، کُورُو تِمَ ࢽجْکَّیِمَࢽْجُ وُو؞
[24] جَمَ اللَّهیٜ أَلْمَسِیوُوَ جَغَیْدْ غَیْ، کَمُوَ یٜ أَوِࢽْ یَیٜ کوَوَࢽْجَا جَا؞
[25] کوَوَ، کَمُوَࢽْدُووَ رَوُواْ، أَلْمَسِیوُ جَمَ اللَّهیٜیَ ثْرَیٜ تَیِ ࢽَࢽْغَرُو کْلَࢽْجُ ثِࢽَدْ غَیْ،
[26] ࢽغَیْࢽِࢽْ جَمَدْرُو مَࢽَ اللَّهیٜࢽْ کَسَلَ ثْدّٜ تَیِرُّو وَلْیٜرَ؞
[27] أَدَ دِیُوࢽْجُدْ، جَمَدْ بَلُو سُو، مُرْجُوکْتُ سُو، أَوُو أَࢽِیٜ ثَمُࢽُوࢽْجُ سُووَ غْࢽِ، ࢽَࢽْتَیِرَّ أَوُو وَادَ بَوُووَارُو وَلْجُو، تِیَ دَرَجَالَࢽْ کْلَࢽْجُرُو سَدُوُرُو؞
[28] جِرِ أَدْغَیْࢽِࢽْ کوَسُو کَمُوَࢽْجَا ثَرَوُو، تِیࢽْجَا ثَرَاࢽَدْ غَیْ؞ کَمْ کَمُࢽْجُوَ ثْرَاࢽَمَدْ کْلَࢽْجُوَ ثْرَوُو؞
[29] أَوُووَ وُࢽْدُمَ ࢽغَلْتٜ تِیࢽْجُ وَجْࢽِّ، أَمَّ تِیَ أَمْبَجٜ کِسِّیے، أَلْمَسِیوُ جَمَ اللَّهیٜرُو ثْدِّدْ غَیْ،
[30] أَوُووَ أَࢽْدِ ࢽَشَوَ تِیے أَلْمَسِیوُیٜدْمَ؞
[31] «دَلِلْ أَدْیٜرُو کوَ بَوَࢽْجُوَ یَࢽْجُوَا کُولْجٜ کَمُࢽْجُرُو کْرْدِیٜ تَیِ یِࢽْدِسُو تِیے ࢻَلُّو وَلْجَیْ؞»
[32] تَبَّتُّو أَدْ أَسْرْ کُرَ، مَࢽَ أَدْ کْلَ أَلْمَسِیوُوَ جَمَࢽْجُوَیٜࢽْ ثْدِرُو وُلّْکِّ؞
[33] أَدْ یَیٜ وُࢽْدُࢽْدُو یَیٜ کَمُࢽْجُوَ کْلَࢽْجُ غَیْرُو ثْرَوُو، کُورُو کَمُدْ یٜ کوَࢽْجُرُو دَرَجَ ثُو؞