[1] أَدْمَ ࢽَࢽْغَرُو وُ بُلُسْدْ ࢽَیِ کْرْدِیَ ࢽَࢽْغَرُو کُوسُومَ عِیسَى أَلْمَسِیوُیٜرُو وَلّْکّْࢽَ؞
[2] تَبَّتُّو لَوَرْ کْلَ کِدَ سٜرّٜ اللَّه وُرُو ࢽَیِ ࢽَࢽْغَرُو سِࢽَدْیٜࢽْ ࢻَࢽُّوَّ،
[3] اللَّه أَسْرْ ࢻَسَلْࢽْجُیٜ وَحَیِ لَاࢽْ إِسَࢽُوسْغْࢽَ، کَلْمَوَ غَࢽَࢽْ وُوتِیَ أَدْࢽْ رُوُࢽْکّْࢽَدْ غَیْ؞
[4] کْرَࢽُوِیَ، ࢽُودُࢽِ أَسْرْ أَلْمَسِیوُیٜدَ أَسُࢽُوِ،
[5] أَسْرْ دُوُوࢽْ جَمَࢽْ کُرٜىٰࢽْ أَدَمْغْࢽَرُو إِسَࢽُودْغْࢽِّ، أَمَّ کْرْمَ رُحُ اللَّهیٜ کْࢽْغَیَمْبَࢽْجُ مُمِࢽَّ ࢽَوِیَࢽْجُوَرُو ࢻْلٜجْغْࢽَدْ؞
[6] أَسْرْدْ تِمَ کَوُرِ کْجِ ࢽَࢽْغَرُو کْرْدِیَ یَوْدِیَا رُوکُّو وَرَسَوُ، أَمْ تِیے تِلُویٜدْرُو وَلْجَࢽَ، کُورُو وَدُ عِیسَى أَلْمَسِیوُیٜلَࢽْ ࢽُوَࢽْجَ ثَوَࢽْدْࢽَ وُو؞
[7] کْلَ کْࢽْجُو سٜرْࢽْجُیٜ اللَّه وُرُو کْࢽْدُوُووَرُو سِࢽَدْیٜࢽْ کِدَمَ کَوُرِ کْجِ أَدْیٜرُو وَلْیٜکُّو؞
[8] مُمِࢽَّ سَمَّلَࢽْ وُمَ غَࢽَ وُو یَیٜ، اللَّه وُرُو سٜرْ أَدَ سْدُّو، کْرْدِیَرُو کَوُرِ کْجِ أَرْسِیے ثِ بَوُووَ أَلْمَسِیوُیٜدَ وُلْغْکُّورُو،
[9] کُورُو أَمْ سَمَّرُو جِرِ اللَّه أَوِسُو أَلَکْتُمَدْ أَسْرْ ࢻَسَلْࢽْجُیٜ تْࢽْ کُرٜࢽْ غْرَادَدَ إِسَࢽُوغْکُّورُو؞
[10] ࢽغَیْࢽِࢽْ کْرْمَ جَمَ عِیسَىٰ غَوُدْیٜࢽْ ࢽَࢽْرَشِدُ تْرْمْ اللَّهیٜدْ ࢻُوُوُ سُو، کْࢽْدُوُووُ سُو سَمٜىٰرُو إِسَࢽُودِیے؞
[11] أَدْمَ ࢽِیَࢽْجُ سَوِسُویٜ عِیسَى أَلْمَسِیوُ کْمَࢽْدٜىٰࢽْ ثْدْࢽَدْ وُو؞
[12] أَلْمَسِیوُلَࢽْ کُورُو تِیَ مْرْسَدُیٜࢽْ رِدُ بَوُووَرُو ࢽَ اللَّهیٜرُو ࢽغَوُو ࢻَࢽْدِیٜ؞
[13] أَدْ ࢽَࢽْغَرُو ࢽَیِیَ لُواْࢽْجَکِّ، بَرٜ کْلَ بُوࢽٜ ࢽَیِ ࢽَࢽْغَرُو یَکِّیٜࢽْ تْمَࢽْدُو کُولُّوِّ، أَوُو أَࢽِمَࢽْ دَرَجَ ࢻَࢽْدُوِ؞
[14] أَدْمَ ࢽَࢽْغَرُو ࢻُوُ بَوَدْیٜࢽْ تُࢽْغُرُمّْکِّ،
[15] تِ دُوُوࢽْ جِرِیَ سَمٜیَ ثِدِیَیٜ سَمَّرُو ثُ ثِࢽَدْ؞
[16] کْلَ أَرْسِیے دَرَجَࢽْجُیٜࢽْ کَرْوُࢽْدُووَ ثَکُّو رُحُࢽْجُیٜࢽْ کْࢽْدُوُووَرُو دُࢽُووَجُورُو اللَّهَ کُورْکِّ،
[17] کُورُو کَمْبْرْسٜىٰࢽْ أَلْمَسِیوُ کَرْوُࢽْدُوࢽْ دْغَ، کِبُّرُو کُوکْتْࢽُواْ ثُرُو کْرَوُویٜࢽْ ࢽَمُّواْرُو اللَّهَ کُورْکِّ،
[18] حَرْ مُمِࢽَّ سَمَّا رُوکُّو رَࢽْغُوٜ ࢽَࢽْࢻَرَکْ سُو، ࢽَࢽْکُرُوُ سُو، ࢽَࢽْکُرَ سُو، دَدُ سُو کْرَوُو أَلْمَسِیوُیٜدَ أَسُࢽُوِ،
[19] کُورُو کْرَوُو دُوُوࢽْ ࢽُودُ سَمَّا کُوجْࢽَ أَدَ ࢽُوࢽُوِ، ࢽغَیْࢽِࢽْ حَلْ اللَّهیٜࢽْ کٜکْ تْمْبْرُواْرُو تِیَ کُورْکِّ؞
[20] اللَّه دُوُوࢽْ کْلَ کْࢽْدُوُوࢽْجُ أَࢽْدِࢽْ دْغَࢽَدْیٜࢽْ أَوُو کُورِیٜ بِ تْمَࢽِیٜیَ کُوجْࢽَرُو ثْدِدْ،
[21] تِرُو ثُرُو جَمَ عِیسَىٰ غَوُوَ عِیسَى أَلْمَسِیوُ کْلَࢽْجُوَیٜࢽْ جَمَࢽْ ࢻِࢽْ یَیٜ حَرْ أَبَدَ أَبَدِࢽُّو دَرَجَ تِیُو! أَمِࢽْ؞