[1] کَرٜیَوَ سَمَّ کْمَوَࢽْجَا دَرَجَارُو ࢽغُوجَ، بَرٜ أَمْ ثُ اللَّهیٜیَ أَلَمْدُࢽْدٜدَ بَسَّࢽِّرُو؞
[2] کَرٜیَوَ دُوُوࢽْ کْمَوَࢽْجَ عِیسَىٰ غَوُدْ بَرٜ تَیِ کْرَمِیَ ࢽَࢽْغَرُو تَیِرُو دَرَجَ ࢽجُو کُولْجَࢽِّ، ثُجُ أَدْیٜرُو تَیِرُو کِدَ جَوْرُو ࢽغْلَرُو ثَدُّو، دَلِلْࢽْجُدْ أَمْ کِدَࢽْجَࢽْ رِوَ ثَوَࢽْدِدْ کْرَمِیَ کْرَوُووُ ࢽَࢽْغَرُو؞ أَوُو أَࢽِیَ أَلَمّٜ، جَمَدْیٜ کَرْوُࢽْجَرُو دُࢽُو یٜ!
[3] کَمْ مَࢽَ جِرٜىٰ کْمَࢽْدٜ عِیسَى أَلْمَسِیوُیٜیَ أَلَمْدُ ࢽَࢽْمُمِࢽّٜیَ وَجٜ أَلَمْدُ غَدٜ ثْدِمَدْ،
[4] تِدْ رُوکُرَمَ أَوِمَ أَسُجِوَوُو؞ مَࢽْغَرْ دِوِ غَسِࢻْتُوَ کَمْبِوُ کْلَ کَلْمَوَیٜࢽْ دِیُووَیٜ تِلَࢽْ کْرْغَ؞ أَوُو أَࢽِ یٜ ࢽَࢽْدْرِ سُو، لَوَلَ سُو، لَࢽَّ سُو، سَرِوُ ࢽَࢽْکْلَدُویٜ سُو،
[5] کُورُو کَمْبِوُ ثٜرِوَوُو دَوُ جِرٜࢽَمْبُوُ حَࢽْغَلْ یٜسْکَدَایٜرُو ثُوُدِ؞ أَمْ أَࢽِ اللَّهَ غَدَ جَوَلْ أَرْسِیے دِیُویٜرُو ࢽغُوجَࢽَ؞
[6] أَمَّ اللَّهَ غَا مَࢽْغَرْ بَوُووَࢽْ ࢽَࢻْتُوَدْ، تِمَ أَرْسِیے کُرَ وُو؞
[7] أَوُووَ أَوِمَ دُࢽِیَرُو کُدِیٜࢽْدٜ، کُورُو أَوِمَ ࢽغُوࢽِیٜ تُلُوِیٜوَوُو؞
[8] أَدْ یَیٜ کْمْبُووَ کَجْمُوَ تَیْیٜࢽَا، أَدْمَ أَࢽْدِیَ سَدْࢽَ؞
[9] أَمَّ أَمْ غَرِوُرُو وَلْدُ مَجَیْمَسُودْ جَرَࢻْتَ کٜلْ غَیْیَ مَࢽْغَرْ دِوِ کْلَ بَوُووَ غَدٜ کَدَارُو ثَسُکُّرِ؞ دَجِ أَوُو أَࢽِ یٜ تَیِیَ ثَدَࢽٜ تْغْمْبُو ࢻَثَّغَیْ؞
[10] أَدْغَیْمَ کُࢽْغُࢽَ رَوُودْ تِمَ ࢻْرْدُ أَوُو دِوِ دِوِ جِرِ ࢻِیٜ یَیٜ وُو؞ أَمْ لَاسُو مَࢽْغَرْ أَدْلَࢽْ جَوَلْ کَمْبْرْسٜىٰدَ کُولْجَࢽٜ کَرْوُࢽْجَا کُتُّ کَدَࢽْ جَیٜرَ؞
[11] أَمَّ ࢽِدْ، کَمْ اللَّهیٜ، أَوُو أَࢽِیَ وَࢽٜ، جِرٜیَ ࢽَࢽْمُمِࢽَّ کَمْبْرْسٜیَ کْرَوُووَ ࢽٜتُّوَ رُوکُرَࢽَمْبُوَ مَࢽٜ!
[12] مْلْدُ ࢽغْلَ کَمْبْرْسٜىٰدْلَࢽْ مْلْدْࢽٜ، رُو سَوِسُویٜ دُوُوࢽْ اللَّه تِرُو بُواْࢽْجْࢽَ یٜ، تِ ࢽَࢽْغَرُو ࢻُوُ شٜدَوُ ࢽغْوُیٜࢽْ شٜدَ ࢽغْلَ دِمَّ یٜدَ ࢽغْلَرُو تَیْ؞
[13] ࢻُوُ اللَّه أَوِ یَیٜرُو رُو ࢽجُومَا عِیسَى أَلْمَسِیوُ بُࢽْتُسْ بِلَتُسُّو ࢽغْلَرُو شٜدَ ثْدّْࢽَایٜࢽْ وَدَ ࢽجِکِّ،
[14] أَوِمَ وَادَ بَوُو بِ سَرِوُ بَوُووَرُو حَرْ یِمْ کْمَࢽْدٜ عِیسَى أَلْمَسِیوُ ࢻْلٜدِیدْرُو أَوُو أَدَ رُوࢽٜ؞
[15] ࢻْلٜدُوُࢽْجُدْ، اللَّه ثَکّٜ سَࢽْجُ کَلْکَلَّࢽْ وَکَّجِ؞ اللَّهدْ تِ رُࢽْجُ تُوکْ مَیْ کُرَ بَرْغَا وُو، مَیْ مَیْیَیٜ، کُورُو کْمَ کْمَوَیٜ؞
[16] تِ تِلُوࢽْجُمَ ࢽُیْوَوُو، ثُرُو ࢽُرْ لَا کَمْ ࢻِمَ رَکْثٜ کَرْࢽْجِوَوُویٜࢽْ کْرْغَ، وُࢽْدُمَ ࢽغَلْتٜ تِیَ ثُرُࢽِّ، کُورُو رَکْثٜ تِیَ ثُرُیْوَوُو؞ دَرَجَا کْࢽْدُوُو سَوِسُویٜیَ کَاࢽجُ! أَمِࢽْ؞
[17] غَرِوُوَ دُࢽِیَ أَدْیٜرُو وَدَ یٜ، بَرٜ رُوکُرَ ثَدْࢽِّ بِ أَرْسِیے دُࢽِیَیٜ تَبَّتْ بَوُووَرُو تْمَ ثَسَکّْࢽِّ، أَمَّ اللَّهرُو تْمَࢽْجَ ثَسَکُّو، تِ دُوُوࢽْ کْجِ کْلَࢽْدٜىٰرُو أَوِسُووَ أَࢽْدِرُو سَدِمَدْ؞
[18] وَدَ یٜ، أَوُو ࢽغْلَ ثَدُو، کْࢽْدُو ࢽغْلَࢽْ أَرْسِیوُرُو وَلْجَ، کُورُو جَیْجَا کْرٜیَرُو وَلْجَ؞
[19] أَدْغَیْࢽِࢽْ رُو جِرٜىٰدَ ثَوَࢽْدُورُو أَرْسِیے ࢽغْلَ کْلَࢽْجَرُو أَجَرَمْ کِبُّ دُࢽِیَ ࢻُوُیٜرُو ثَࢻْثَغَیْ؞
[20] تِمُوتِ، أَوُو اللَّه مُکُّوࢽْمْبُو ثَکّْࢽَدَ رُوࢽٜ، بَرٜ مَࢽَ ࢻَیْدَ بَوُووَ سُو، کَمْبِوُ کَتُّوُیٜ تِرُو إِلْمُ ثَࢽِ سُو دِمِّ،
[21] إِلْمُ کَتُّوُیٜ دُوُوࢽْ أَمْ لَاسُو جَاࢽٜ جَوَلْ کَمْبْرْسٜىٰیَ کُولْجَࢽَدْ؞ سٜرْ اللَّهیٜ ࢽَیِلَࢽْ دْغَ!