[1] بُرْوُو سَلَّمِّࢽْ جَمَ سَمَّ ࢽَࢽْغَرُو اللَّهَ ثَوُورُو، مُودُوَ ثَدُو، لُواْجَ، وُسٜجَرُو تَیِیَ لُواْکِّ،
[2] کُورُو مَیْیَا أَمْ کْࢽْدُوُووَ سَمَّا ࢽَࢽْغَرُو اللَّهَ ثَوُورُو، ࢽَࢻْتُ ࢽَࢽْلٜوَیٜ ࢻَࢽْدِیُو، ࢽَࢽْمُمِࢽَّ بْرْسْمْبَ سَمَّلَࢽْ دْغَیْیُورُو؞
[3] أَدْ ࢽغْلَ یٜ، ࢻُوُ اللَّه ࢽجْکَّیِمَࢽْدٜىٰࢽْ أَوُو أَرْدِدُیٜ یٜ،
[4] تِ دُوُوࢽْ أَمْ سَمَّ ࢽجْکَّوُو ثَوَࢽْدُو، جِرٜ یٜ ࢽُوجَرُو ثْرَاࢽَدْ؞
[5] أَوُووَ اللَّهدْ ࢻَلْ، کَتّٜ اللَّهَ أَمْبَیٜࢽْ سُولُومَدْ یٜ ࢻَلْ، کَمْدْ تِمَ عِیسَى أَلْمَسِیوُدْ وُو،
[6] تِ دُوُوࢽْ أَمْ سَمَّا مٜرُجُورُو کْلَࢽْجُ ثِࢽَدْ؞ أَدْمَ شٜدَ سَࢽْجُ کَلْکَلَّࢽْ إِسْࢽَدْ وُو،
[7] کُورُو أَدْمَ ࢽَࢽْغَرُو اللَّه وُوَ مَوُودُمَ یٜ، کْࢽْغَیَمْ یٜرُو غَلَسٜࢽُو، کَتُّوُ غْࢽِ، جِرٜ وُلّْکِّ، کُورُو کْلَ کَمْبْرْسٜیَ جِرٜیَیٜࢽْ مَلْمْ کْرْدِیَیٜ یٜرُو غَلَسٜࢽُو؞
[8] أَدْ ࢽَࢽْغَرُو ࢽدَرَࢽْ یَیٜ کُوࢽغوَوَ مُکُّو تَیِرْ سَࢻْکَدَا غْرْغَدُ بِ کَمْبِوُ بَوُووَرُو مُودُوَ ثَدِیَ، رَاکُّو؞
[9] جِرِ أَدْغَیْࢽِࢽْ کَمُوَ یٜ کَجْمُ ثَࢽْدْࢽَ بْرْسْمْغَدَا کْلَࢽْجَ ثَرِوِیَرُو لُجَ، جَوُ سُو، کَرٜ دِࢽَرّٜ سُو، مُرْسَمْ سُو، کَجْمُ جَوْرُو تَمَࢽَّ سُولَࢽْ غْࢽِ،
[10] أَمَّ کْࢽْدُو ࢽغْلَلَࢽْ، کَمُوَ تَیِ اللَّه رِدَوُرُو بَیِࢽْدَࢽَدْ غَیْ؞
[11] کَمُدْ ثُرُو کْࢽْغَ سَمَّیٜࢽْ کْدْکْ ࢽَࢻْثُو أَلَمْدُ کْرْࢽْجُو؞
[12] کَمُدْرُو أَلَمْدُ بِ کُوࢽغوَا ࢽُودُو أَمَرْغْکّْࢽِ، بِیَ غْمْ ࢽَࢻْثُو؞
[13] أَوُووَ اللَّه بُرْوُوࢽْ آدَمْبَ أَلَکّٜࢽُو، دَجِ أَوْوَ یٜیَ أَلَکّٜࢽُو؞
[14] کُورُو آدَمْبَ غْࢽِ، کَمُدْمَا إِوُلِیسْ جَمْبَجٜ بِوُمَرُو وَلْیٜࢽُو؞
[15] أَمَّ کَمْبْرْسٜیَ کْرَوُووَ ࢽَࢽْتَیِرَّلَࢽْ کْلَࢽْجُ ثْرِوِیَرُو ࢻُوُ جُوُیْیَ، کْࢽْجَمْبِیٜࢽْ ࢽجْکَّوُو ثُوَࢽْدِ؞