[1] بَرٜ کِیَرِرُو یِکَّدْمِّ، بَوَࢽْمْ غَیْ کَرْوُࢽْجُرُو دُࢽُو یَکّٜ، جَیْرُووَ یٜیَ یَࢽْمْغْࢽَسُو غَیْرُو تَیْ،
[2] کْمُرْجُووَ یٜیَ یَࢽْمْ غَیْرُو تَیْ، ࢻٜرُووَ یٜیَ ࢽَࢽْتَیِرْ سَمَّلَࢽْ یَࢽْمْغْࢽَسُو غَیْرُو تَیْ؞
[3] کَمُوَ کوَ ࢻَثَّاࢽَا جِرٜىٰرُو کِسْکْࢽٜ؞
[4] أَمَّ کَمُ کوَ ࢻَثّْغْࢽَا لَا تَدَوَ بِ دِوُوَ ثْدَࢽَا، بُرْوُو سَلَّمِّࢽْ کْلَ أَمْ ࢻَࢽّجَیٜࢽْ اللَّه رِدَ ثَرُو تَیِرُو کِسَّا، أَدْ ࢻُوُ اللَّهیٜࢽْ أَوُو أَرْدِدُیٜ؞
[5] کَمُ کوَ ࢻَثّْغْࢽَا جِرٜمَرُو بَࢽَمَ ثْدَࢽِّدْ تْمَࢽْجُ اللَّهرُو ثَکّْࢽَ، کُورُو بُࢽٜیَ کَوْسُوَ دَدُ بَوُورُو تِیَ مُودُوَا لُواْالَࢽْ ثُوُورِ؞
[6] أَمَّ کَمُ کوَ ࢻَثّْغْࢽَا دُوُوࢽْ ࢽَࢻْتُࢽْجُࢽْ کْجِ ࢻَࢽْدَ کْلَࢽْجُیٜ مَجِمَدْ، تِدْ رُوࢽْجُوَ یَیٜ، ࢽُࢽَ؞
[7] أَوُو أَࢽِیٜ کْلَࢽْ تَیِرُو وَدَ یٜ، بَرٜ أَوُو وَادَ تَیِلَࢽْ تُوَࢽْدْࢽِّرُو؞
[8] کَمْ لَا أَمْࢽْجُرُو مَسَمَّࢽُّو أَمْ ࢻَࢽّجُیٜرُو کِسِّیوَوُووَ، کَمْبْرْسٜدَ أَࢽْغْرْجٜ کَمْ اللَّهَ کَسَثّْࢽِّمَا ࢽَࢽْدِوِࢽْ کُوجْࢽَ؞
[9] کْلَ کَکَّدُ کَمُوَ کوَ ࢻَثَّاࢽَایٜدْࢽْ ثُ کَمُ حَلْ أَدْ غَیْیٜ رُࢽْجُ رُوُࢽٜ: تِ کَمُ کْرْوُࢽْجُ ࢻِرَکُّ ࢽَجْغْࢽَ یٜ، کوَࢽْجُ رُووَلَࢽْ أَمَࢽّجُ جُوُࢽِّ یٜ،
[10] کُورُو أَمْسُو ࢽغْلَࢽْجُ وُلْجَیْ، مَاࢽَࢽْجُدْ یَلَّࢽْجُوَ ࢽغْلَرُو إِسَوُرَجْغْࢽَ یٜ، کُسُوتُّووَا سُوسَجْࢽَ یٜ، سِ مُمِࢽَّیٜدَ تُلْجْࢽَ یٜ، أَمْسُورُو ثُرُو جْکْتُࢽْجَیٜࢽْ بَࢽَجْغْࢽَ یٜ، کُورُو کْࢽْدُو ࢽغْلَ جِرِ ࢻِ یَیٜیَ دِیُورُو کْلَࢽْجُ ثَکّْࢽَ؞
[11] أَمَّ بَرٜ کْلَ کَکَّدُ کَمُوَ کوَ ࢻَثَّاࢽَایٜدْࢽْ ثُ کَمُوَ دَوُ دُࢽُوࢽْجَیٜࢽْ دَسَاࢽَیٜدَ رُوُࢽْمِّ، دَلِلْࢽْجُدْ مَࢽْغَرْࢽْجَ دِوِ ثِجِیَ، أَلْمَسِیوُوَ کُولْجَࢽٜ ࢽِیَ دِیُو مَجَࢽٜ
[12] أَمَࢽّجَ بُرْوُوࢽْ ࢽدْࢻْثَࢽَدَ کَمْجَࢽَ ࢽَࢽْغَرُو وُواْمْ اللَّهیٜ تَیِیَ ثْدَیْ؞
[13] سَ أَدْ یٜࢽْ لَوُرُو وَلْجَیْ یٜ، ࢻَدُو ࢻَدُورُو لٜجَیْ یٜ؞ أَدْمَا کُوجْࢽَرُو کَلَلَ بُووُیٜ ثَدٜ أَوُو تَیِیَ ثَسَکّْࢽِّرُو ࢽغَسَیِ، کُورُو أَوُو تَیِرُو وُلْدُرُو ثَࢽْدْࢽِّدَ وُلْجَیْ؞
[14] أَدْمَ ࢽَࢽْغَرُو کَمُوَ دُوُوࢽْ کوَ ࢻَثَّاࢽَا دَوُ دُࢽُوࢽْجَیٜࢽْ دَسَاࢽَدْ ࢽِیَ ثَدٜ یَلَّ ثَسَمْبٜ ࢻَࢽّجَرُو ࢽغْلَرُو کِسَّغَیْیَ، رَاکُّو؞ ࢽغَیْࢽِࢽْ کْلَدُودْ دَمَ أَوُو لَا دِوِ وُلْدُیٜ ثُوَࢽْدِوَوُو؞
[15] ثُرُوࢽْجَࢽْ لَا جَوَلَّࢽْ ثَلُوٜ کْرْمَ إِوُلِیسَّ غَوُرُو وَلْجَࢽَ مبٜجِ؞
[16] کَمُ عِیسَىٰ غَمَ لَا ثُرُو کْرَمِیَࢽْجُیٜࢽْ کَمُوَ کوَ ࢻَثَّاࢽَا ثْدَࢽَا، تَیِیَ بَࢽَجُوُو؞ بَرٜ کُرْوُووُدَ جَمَ عِیسَىٰ غَوُرُو کُولْجْغْࢽِّ، أَمَّ جَمَ عِیسَىٰ غَوُدْ کَمُوَ کوَ ࢻَثَّاࢽَا جِرٜمَرُو بَࢽَمَ ثَدَࢽِّدَ بَࢽَجَا؞
[17] أَمْوُرَوَ جَمَدَ ࢽغْلَرُو ثَࢽُودِدْرُو دَرَجَ کَوَکْیِࢽْدِ تِیُو، مَسَمَّࢽُّو تَیِ دُوُوࢽْ جَوْرُو کِدَ مَوُودُوَ أَلَمْدُوَیٜرُو ࢽغْࢽْࢻْتَیْدْ؞
[18] أَوُووَ کِتَوُیٜ ࢽغَیْ وُلْجٜ: «بَرٜ دَلُو وَسْتُ ثْدِ دُوُوࢽْ ثِࢽْجُرُو ثَمْبُ یَکّْمِّ،» کُورُو: «کِدَمَرُو ࢽغْࢽْوُرَمْࢽْجُ وَجِࢻْثْغْࢽَ،» ثْࢽَّ؞
[19] شٜدَوُ یِࢽْدِ بِ یَکُّ أَوُو ࢻَلْ وُلْجَیْیٜࢽْ غْࢽِیَ، بَرٜ ࢽغَدَرْ کْلَ أَمْوُرَوَیٜࢽْ کَسَدّْمِّ؞
[20] تَیِ دُوُوࢽْ بِوُ ثَدِمَسُودْرُو ࢻُوُ جَمَ سَمَّیٜࢽْ یِکَّدٜ، تَیِ غَࢻْثَࢽَدْ رِجَرُو؞
[21] ࢻُوُ اللَّهَ عِیسَى أَلْمَسِیوُوَ مَلَیْیَوَ کْرٜجْࢽَدَیٜࢽْ ࢽِرُو وَدَ ࢽجِکِّ، غَیِرْدُ بَوُورُو أَوُو أَࢽِیَ غَیْ، بَرٜ أَوِمَ ثُرُو کَࢽْغُرْࢽُویٜࢽْ دِمِّ؞
[22] بَرٜ غَࢽّْمٜ مُکُّو کْلَ أَمْبٜرُو غْࢽَغْمٜ تَیِیَ أَمْوُرَوَرُو غَلَࢽْمِّ، بَرٜ أَمْبُو کْلْدْغْمٜ بِوُ دِمِّ، کْلَࢽْمْبَ ࢽَࢽْتَیِرْࢽِࢽْ رُوࢽٜ؞
[23] بَرٜ غَدٜرُو إِࢽْغِ رُࢽْجُ یَمِّ، دِبٜࢽْ یٜ غَࢽَ یَیْ، ثُرُوࢽْمْبَ مُورِمُورِࢽْمْبَ ࢽَࢽْغَرُو؞
[24] أَمْ لَاسُویٜ بِوُࢽْجَ ࢻٜدٜرُو ࢻْلٜدَࢽٜ تَیِیَ ࢽَ شَرَیٜرُو لٜدُرُو بُرْوُوجَیْ، أَمَّ أَمْ لَاسُویٜ بِوُࢽْجَ ࢽغَوُوࢽْجَ جَغَیْ؞
[25] جِرِ أَدْغَیْࢽِࢽْ کْࢽْدُو ࢽغْلَ ࢽغْلَ ࢻٜدٜرُو ࢻْلٜدَیْ، کُورُو تَیِ کْرْمَ ࢻْلٜدَیْوَوُودْمَ یٜ رَکْثَࢽٜ تُسّْࢽَرُو غْرَدَیْوَوُو؞