[1] رُحُ اللَّهیٜ ࢻَرَکُّو وُلْجْࢽَ، دُࢽِیَ دَرْیٜجِیَ، أَمْ لَا جَوَلْ کَمْبْرْسٜىٰدَ کُولْجَࢽٜ کَرُوَ جَمْبَمَسُووَ أَلَمْدُ سٜدَࢽَّسُویٜیَ جَغَیْ؞
[2] تَیِدْ مْࢽَࢻْکَّ یٜ، کَتُّوُ کَمْدَوُ یٜ، کُورُو کَرْوُࢽْجَ دَࢽْغْرْلَࢽْ بَلُودْࢽَ غَیْ؞
[3] ࢽِیَ دِیُووَ کْمْبُو لَا بُووَ أَمْبُو دَࢻْثَغَیْ، کْمْبُو دُوُوࢽْ اللَّه کَمْبْرْسٜوُ جِرٜ ࢽُوجَࢽَمَ وُسٜجَیْیَرُو ثَمُواْرُو أَلَکْثْࢽَدْ؞
[4] أَدْغَیْمَ أَوُو اللَّه أَلَکْثْࢽَ سَمَّ ࢽغْلَ، کُورُو أَوِمَ وَدُیٜ بَوُو، کَمْ اللَّهَ وُسٜجِیَلَࢽْ ثْمُویِیَ،
[5] مَࢽَ اللَّهیٜیَ مُودُوَایٜࢽْ أَوُو سَمَّ تَیِرُّو وَلْجِ ࢽَࢽْغَرُو؞
[6] أَوُو أَࢽِیَ کْرَمِیَدْرُو إِسَࢽُوغْمِیَ، کِدَمَ ࢽغْلَ عِیسَى أَلْمَسِیوُیٜرُو وَلّْمِ، کِدَمَ دُوُوࢽْ مَࢽَ کَمْبْرْسٜىٰیَ أَلَمْدُ جِرٜىٰ جْغَࢽَآ ࢽغْلَرُو کْرْࢽْجْࢽَدْ؞
[7] ࢽیَرِ بُووُیٜ ࢻَیْدَ بَوُووَ وَࢽٜ، کْلَࢽْمْبَ ࢽَࢽْمُمِࢽِّࢽْ أَلَمّٜ!
[8] تِیے سَࢽْغُودْ ࢻَیْدَࢽْجُ غَࢽَمَ، أَمَّ ࢽَࢽْمُمِࢽْدْ أَوِ یَیٜࢽْ جَوْرُو ࢻَیْدَا، دَلِلْࢽْجُدْ کْرْمَمَ یٜࢽْ کَلْ، رُو سَوِسُویٜ یٜࢽْ کَلْ، تَبَّتْ رِوَࢽْجُ ࢻَࢽْدْمِ ࢽَࢽْغَرُو؞
[9] مَࢽَ أَدْ أَوُو مْرْسَدُیٜ یٜ، کِبُّرُو کَسَتُّیٜ یٜ:
[10] دَلِلْ ࢽغْࢽْࢻْتُࢽْدٜىٰ یٜ، مْلْدُࢽْدٜىٰ یٜدْ، تِمَ اللَّه کْࢽْدْغَیْمَلَࢽْ تْمَࢽْدٜیَ، تِ دُوُوࢽْ ࢽجْکَّیِمَ أَمْ سَمَّیٜ، مَسَمَّࢽُّو أَمْ تِیَ کَسَثَّࢽَمَدْ؞
[11] أَوُو أَࢽِیٜ کْلَࢽْ وَدَ یٜ، أَلَمّٜ!
[12] بَرٜ وُࢽْدُمَ ࢽَࢽْجَیْرُوࢽْمْ ࢽَࢽْغَرُو رُدُ ࢻْلٜࢽْجْغْࢽِّ، أَمَّ أَمْ عِیسَىٰ کَسَتُّوُدْرُو مَࢽَلَࢽْ، حَلَّࢽْ، کْرَوُولَࢽْ، کَمْبْرْسٜلَࢽْ، ࢽَࢽْتَیِرْلَࢽْ مِسَلُّو وَلّٜ؞
[13] کَوُ وَلْدْکّٜ إِسْکِّرُو، جَمَرُو کِتَوُ اللَّهیٜ کْرَدُوُوَ کُواْرِ ࢽجُووَ أَلَمْدُوَرُو ࢽغْلَرُو کِسْکْࢽٜ؞
[14] بَرٜ کْࢽْجُو سٜرّٜ کَرْوُࢽْمْلَࢽْ دْغَࢽَدَ ࢽغٜسّْمِّ، کْࢽْجُو دُوُوࢽْ أَمْوُرَوَ ࢽَوِࢽَوِ ثَدٜ مُکُّوࢽْجَ کْلَࢽْمْبُو غْࢽَجَغَࢽٜ مُواْمَّدْ؞
[15] أَوُو أَࢽِیَ جَوْرُو دٜ ࢽغْࢽْࢻْتْࢽٜ، ࢽغَیْࢽِࢽْ أَمْ سَمَّ ࢻُوُ بُوࢽْمْدَ ࢻٜدٜرُو ثَرُیْ؞
[16] کْلَࢽْمْبَ أَلَمْدُࢽْمْبَرُو حَࢽْغَلْ غْࢽَࢽٜ، بَرٜ تَیِیَ کُولّْمِّ؞ أَوُو أَࢽِیَ دِمِیَ، کْلَࢽْمْبَ أَمْ ࢽِیَ کْرْࢽّجَیْسُووَا یِکَّغْمِ؞