[1] وُمَ بُلُسْ رَوُو اللَّهیٜࢽْ کْلَ وَدُ رُویٜ عِیسَى أَلْمَسِیوُلَࢽْ دْغَࢽَیٜࢽْ کْࢽْغَیَمْ عِیسَى أَلْمَسِیوُیٜرُو وَلّْکّْࢽَدْ
[2] تِمُوتِ تَدَࢽِ جَوْرُو رَاکّْࢽَدْرُو: اللَّه بَوَا کْمَࢽْدٜ عِیسَى أَلْمَسِیوُوَدْ ࢽِرُو سٜرَّ کَࢽْجِمَرِیَ ࢽَࢽْلٜوَا ࢽجَدُو!
[3] بُࢽٜیَ کَوْسُوَ دَدُ بَوُورُو ثُرُو مُودُوَࢽِیٜࢽْ ࢽِیَ تَࢽّجْکِّ دُوُوࢽْ، اللَّهَ وُسٜࢽْکِّ، اللَّه دُوُوࢽْ کِدَ کَرْوُࢽِࢽْ سَرِوُ بَوُووَلَࢽْ تِرُو یِدّْکِّدْ، جِرِ أَمْوُرَوَࢽِ یٜ ثَدْࢽَدْ غَیْ؞
[4] سِمَلُوࢽْمْبَ تَࢽْغْکِّیَ، کَرْوُࢽِ جَوْرُو کْجِجُورُو ࢽِیَ کُرُورُو جَوْمَرُو رَاکّْࢽَ؞
[5] کَمْبْرْسٜࢽْمْ ࢽَࢽْمْࢽَࢻْکْ بَوُووَ تَࢽْغْکِّ، کَمْبْرْسٜ دُوُوࢽْ کَکَࢽْمْ یَ لُوُسِیَ یَࢽْمْ أَࢻِࢽِکِیَلَࢽْ بُرْوُوࢽْ دْغَࢽَ، کُورُو کْرْمَ ࢽِ یٜࢽْ تَبَّتُّو دْغَࢽَدْ؞
[6] أَدْمَ ࢽَࢽْغَرُو ࢽِرُو إِسَتَࢽّجْغْکِّ، کْࢽْجُو اللَّهیٜ سَ کْلَࢽْمْبُو مُکُّو غْࢽَࢽْجْغْکّْࢽَدْࢽْ ࢽجِࢽَدَ ࢽغْلَرُو دُࢽُووَࢽٜ!
[7] أَوُووَ رُحُ دُوُوࢽْ اللَّه أَࢽْدِرُو سَدْࢽَدْ أَࢽْدِیَ سَسَکّٜ کُویْوُرُو غْࢽِ، کْࢽْدُوُووَ کْرَوُووَ کْلَرِوُووَارُو وَلِّیٜ؞
[8] أَدْ ࢽَࢽْغَرُو بَرٜ کْلَ شٜدَ کْمَࢽْدٜىٰ بِ وُ کُوسُومَࢽْجُیٜࢽْ ࢽَࢽْغُࢽْمِّ، أَمَّ وُرُو کْلْدْغْࢽٜ کْࢽْدُوُو اللَّهیٜࢽْ کَوُرِ کْجِ ࢽَࢽْغَرُو بُوࢽٜ یَیْ؞
[9] أَوُووَ اللَّه کْࢽْدُوࢽْدٜ ࢽَࢽْغَرُو غْࢽِ، ࢽِیَࢽْجُوَ سٜرْࢽْجُوَ ࢽَࢽْغَرُو أَࢽْدِیَ سَکَّیٜ ࢽَࢻْتُ ࢽَࢽْتَیِرّٜࢽْ دْغَیْیُورُو بُواْسَࢽَ؞ سٜرْࢽْجُدَ عِیسَى أَلْمَسِیوُیٜࢽْ کَوُ دُࢽِیَ أَلَکْتْࢽَمَࢽْ أَࢽْدِرُو سٜدُو،
[10] أَمَّ کْرْمَ کْࢽْدٜ ࢽجْکَّیِمَࢽْدٜ عِیسَى أَلْمَسِیوُیٜࢽْ ࢻْلٜجْࢽَ؞ تِمَ کَرْمُودَ بَوُورُو کَلَکْثٜ رُو سَوِسُویٜ ثٜرِوَوُووَ کَوُرِ کْجِدْیٜࢽْ بَیِࢽْجُو؞
[11] کَوُرِ کْجِ أَدْمَرُو اللَّه وُوَ مَوُودُمَ یٜ، کْࢽْغَیَمْ یٜ، مَلْمْ یٜرُو غَلَسٜࢽُو؞
[12] أَدْمَ ࢽَࢽْغَرُو، وُ یٜ کْرْمَ بُوࢽٜ أَدَ یَکِّدْ، أَمَّ ࢽَࢽْغُکّْࢽِ، دَلِلْࢽْجُدْ تِ کَسَدّْکّْࢽَدَ ࢽُوکّْࢽَ، کُورُو کَوُرِ کْجِ مُکُّوࢽِرُو ثَکّْࢽَدَ حَرْ یِمْدْرُو رُوجِرُو جَوْمَرُو ࢽُوکّْࢽَ ࢽَࢽْغَرُو؞
[13] مِسَلْ مَࢽَ جِرٜىٰ وُࢽْ ࢻَࢽّْمَّدَ ࢽغْلَرُو تَیْ، کَمْبْرْسٜیَ کْرَوُووَ دُوُوࢽْ عِیسَى أَلْمَسِیوُیٜࢽْ دَسَیِدْࢽْ؞
[14] بَࢽَ رُحُ اللَّهیٜ أَࢽْدِلَࢽْ دْغَࢽَدْیٜࢽْ أَوُو ࢽغْلَ مُکُّوࢽْمْبُو ثَکّْࢽَدَ رُوࢽٜ؞
[15] ࢽُوࢽْمَّ، تَیِ ثِدِ أَسِیَیٜࢽْ دَسَاࢽَ سَمَّ وُوَ کُولْسَࢽَ، ثُرُوࢽْجَࢽْ ࢻِبُولُسَّ حٜرْمَجِیَا یٜ مبٜجِ؞
[16] کْمَࢽْدٜ کَࢽْجِمَرِࢽْجُ أَمْ ࢻَدُو أُوࢽٜسِࢻَرُسّٜرُو ࢻْلٜجُوُو، کَرْوُࢽِ ࢽغْوُرُو إِسَبُوجْغْࢽَ، کُورُو وُ کُوسُوࢽْ دْغَکّْࢽَرُو ࢽَࢽْغُسْࢽِّ؞
[17] بْرْࢽِ رُومْبٜرُو کَدِࢽِّیَ، وُوَ تَیْ دَجٜ مَسٜ سِوَࢽْدُو؞
[18] کْمَࢽْدٜ تِیَ ثَکُّو یِمْ أَدْࢽْ کَࢽْجِمَرِࢽْجُ ثُوَࢽْدُو! جِرِ بَࢽَ ࢽغْوُ بْرْࢽِ أَࢻِسَیٜࢽْ سُکُّدْࢽَدَ ࢽِ کْلَࢽْمْ دَمْ ࢽُوࢽْمَّ؞