[1] مَࢽَ أَدْ جَوْرُو کِبُّ: کَمْ لَا ࢻُوُمَ جَمَ عِیسَىٰ غَوُیٜرُو وَلْدُرُو مَیٜࢽُووَ، کِدَ ࢽغْلَ ثْرَاࢽَ؞
[2] أَدْ ࢽَࢽْغَرُو ࢻُوُمَدْ دُولٜ تِلَࢽْ أَوُو وَادَ بَوُورُو وَلْجُو، کوَ کَمُ ࢻَلّٜ، کْلَ رِوُومَ، کَمْ حَࢽْغَلَّ، کْلَࢽْجُرُو کِسْتُوُمَ، کُسُوتُّو سُوسَدُمَ، کُورُو کَمْ رَکْثٜ أَمْبَ أَلَمْجِرُو وَلْجُو؞
[3] کْࢽْجَمَ بِ مُکُّو کَمْبُویْیَ غْࢽِ، کَمْ رُوکُرَ بَوُووَرُو وَلْجُو، ࢽَࢽْلٜوَࢽْ دْغَ؞ بَرٜ کُࢽْغُࢽَ رَوُومَرُو وَلْجْࢽِّ،
[4] أَمَّ کَمْ ࢻَࢽّجُ ࢽغْلَرُو ثُࢽُودِ یٜ، یَلَّࢽْجُ مَࢽَࢽْجُ ࢻَࢽْجَیْ یٜ، کُورُو تِرُو دَرَجَ ثَدِ یٜرُو وَلْجُو؞
[5] کَمْ ࢻَࢽّجُوَ ࢽُودُو ࢽُوجْࢽِّدْ، جِرِ ࢻِࢽْ غْلٜ جَمَ اللَّهیٜدْرُو کِسِّیے؟
[6] بَرٜ کَمْدْ عِیسَىٰ غَمَ بْرِࢽُّو وَلْجْࢽِّ؞ أَدْ غْࢽِیَ، رُوکُرَ تِیَ ثْدَࢽٜ وُواْمْ إِوُلِیسّٜرُو ࢽغَیِ؞
[7] کُورُو دُولٜ أَمْ عِیسَىٰ غَوُ غْࢽِسُویٜ ࢽغْلَࢽْجُ وُلْجَیْرُو وَلْجُو، بَرٜ دِوِࢽْجُ وُلْجَࢽٜ کٜلْ إِوُلِیسّٜرُو ثُکُّرْࢽِّ؞
[8] جِرِ أَدْغَیْࢽِࢽْ بَࢽَوُدْ یٜ دُولٜ دَرَجَارُو وَلْجَ، بَرٜ مَࢽَ یِࢽْدِیَرُو وَلْجَࢽِّ، بِ کْࢽْجَمَ، بِ رِوَ ثُکُّواْࢽَ بُومَرُو وَلْجَࢽِّ؞
[9] أَدْغَیْمَ أَسْرْ کَمْبْرْسٜىٰدَ کَرْوُ سَرِوُ بَوُووَلَࢽْ رُوجَ؞
[10] أَمَّ بُرْوُوࢽْ تَیِیَ رِجَࢻْثَ، أَوِمَ وَادَ تَیِلَࢽْ بَوُووَ، دَجِ کِدَࢽْجَ بَࢽَوُیٜ ثَدُو؞
[11] جِرِ أَدْغَیْࢽِࢽْ کَمُوَدْ یٜ دَرَجَارُو وَلْجَ، بَرٜ دِوِ أَمْ غَدٜىٰ وُلْجَࢽِّ، أَمَّ کْلَࢽْجَ ثَرِوُو، کُورُو أَوِ یَیٜࢽْ أَمَࢽَّرُو وَلْجَ؞
[12] تِ بَࢽَمَدْ کَمْ کَمُ ࢻَلَّرُو وَلْجُو، کُورُو یَلَّࢽْجُوَ ࢻَࢽّجُوَ ࢽغْلَرُو ثُࢽُودِرُو وَلْجُو؞
[13] أَدْغَیْمَ تَیِ دُوُوࢽْ کِدَࢽْجَ بَࢽَوُیٜ ࢽغْلَرُو ثَدِدْ دَرَجَ یٜ ثَوَࢽْدِ، کُورُو کَمْبْرْسٜࢽْجَ عِیسَى أَلْمَسِیوُیٜࢽْ جَوْرُو دُࢽُو یٜ ثُوَࢽْدِ؞
[14] تْمَࢽِ ࢽَࢽْمْبُو تُسّْࢽِّࢽْ کْࢽْدٜىٰ مبٜجِ، أَمَّ أَوُو أَࢽِیَ ࢽِرُو رُوُࢽْجْغْکِّدْ،
[15] دُوَࢽْ إِسْکّْࢽِرُو وَلْیٜࢽُووَ، جِرِ دُولٜ ࢽَࢻْتُ أَمْ اللَّهیٜ ࢻَࢽّجُیٜࢽْ ثَدِیٜدَ ࢽُوࢽْمِ؞ اللَّهیٜ ࢻَࢽّجُدْ، تِمَ جَمَ اللَّه کْࢽْدْغَیْمَیٜ، وَجِلَ جِرٜىٰدْ وُو؞
[16] تَبَّتْ أَسْرْ ࢽَࢽْمُمِࢽّٜدْ جَوْرُو کِبُّ: تِ أَلْمَسِیوُدْ تِیلَࢽْ بَیِࢽْدْࢽَ، رُحُ اللَّهیٜ یٜ تِ جِرٜمَرُو وُلْجْࢽَ، مَلَیْیَوَ یٜ تِیَ ثَرُࢽَ، دَوُ جَمَ کْرْدِیَیٜࢽْ تِیَ سَثَّࢽَ یٜ، دُࢽِیَ ࢽغَࢽْ تِیَ کَسَثَّࢽَ یٜ، کُورُو دَرَجَالَࢽْ تِیَ سَمٜرُو ثَمُواْࢽَ یٜ؞