[1] وُمَ بُلُسْ کَمْ دُوُوࢽْ وَدَ اللَّه ࢽجْکَّیِمَࢽْدٜیَ عِیسَى أَلْمَسِیوُ تْمَࢽْدٜیَیٜࢽْ کْࢽْغَیَمْبُو وَلّْکّْࢽَدْ
[2] تِمُوتِ ثُرُو کَمْبْرْسٜىٰࢽْ تَدَࢽِ جِرٜىٰدْرُو: اللَّه بَوَا کْمَࢽْدٜ عِیسَى أَلْمَسِیوُوَدْ ࢽِرُو سٜرَّ کَࢽْجِمَرِیَ ࢽَࢽْلٜوَا ࢽجَدُو!
[3] سَ لَرْدُ مَکِدُوࢽِیَیٜرُو لٜکِّدْࢽْ ࢽِیَ ࢽجُوُورْکّْࢽَدْ غَیْ، بْرْࢽِ أَࢻِسَیٜلَࢽْ ࢽَمّٜ أَمْ لَارُو وَدَ یٜ، بَرٜ أَلَمْدُ غَدٜ ثَدْࢽِّ،
[4] بِ ࢽیَرِ بُووُیٜ سُو، تَیٜ کَاࢽْ کَارِࢽّٜ دَدُ بَوُو سُو جَاࢽِّرُو؞ أَوُو أَࢽِ کِدَ اللَّهیٜ کَمْبْرْسٜلَࢽْ إِسِدْ یَیٜرُو کَمْبِوُ بُووُیٜ ثَوُدِ؞
[5] وَدَ أَدْیٜ لٜدُوُرَمْࢽْجُدْ تِمَ کْرَوُو دُوُوࢽْ کَرْوُ تَیِرَّ سَرِوُ بَوُووَا کَمْبْرْسٜ ࢽَࢽْمْࢽَࢻْکْ بَوُووَالَࢽْ إِسِدْ وُو؞
[6] أَمْ لَا جَوَلْ أَدَ کُولْجَࢽٜ مَࢽَ بُووُیٜرُو ࢽغَسَاࢽَ؞
[7] مَلْمْبَ أَتَّوْرَیٜرُو وَلْدُ مَجَیْسُوࢽْ، أَوُو مَࢽَجَیْ یٜ، تَبَّثَّغَیْ یٜدْمَا ࢽُوجَࢽِّ؞
[8] کَمْ وَدَوَ أَتَّوْرَیٜلَࢽْ ࢽغْلَرُو ࢻَیْدَدِیَ، أَتَّوْرَدْ أَوُو ࢽغْلَرُو ࢽُوࢽِیٜࢽَ؞
[9] أَدْغَیْمَ وَدَدَ جِرٜوُرُو غْࢽِ کٜدُو، أَمَّ أَمْ دِوِ دِیُووُ سُو، تُرُوُ سُو، اللَّهَ غَ وَدُوُ سُو، بِوُوُ سُو، تَیِرْࢽَمْبُوُ سُو، لُوَࢻْتُوُ سُو، أَمْ بَوَࢽْجَا یَࢽْجَآ ࢽجٜجُووُ سُو، کَمْثٜجِ سُو،
[10] کْࢽْجْࢽَوُ سُو، لُتُّوُ سُو، کَرٜیَا سَوُرْوُ سُو، کَتُّوُ سُو، أَمَࢽْ بُووُ سُو، أَمْ غَدٜ أَلَمْدُ جِرٜىٰ وَدُوُ سُو سَمَّرُو کٜدُورُو ࢽُوࢽِیٜࢽَ؞
[11] أَلَمْدُ جِرٜىٰ أَدْ ثُرُو کَوُرِ کْجِ دَرَجَا اللَّه بَرْغَایٜࢽْ کْرْغَ، کَوُرِ کْجِ دُوُوࢽْ اللَّه مُکُّوࢽِرُو ثَکّْࢽَدْ وُو؞
[12] کْمَࢽْدٜ عِیسَى أَلْمَسِیوُ تِ دُوُوࢽْ کَرْوُࢽِرُو دُࢽُو ثَکّْࢽَدَ وُسٜࢽْکِّ، دَلِلْࢽْجُدْ وُوَ أَمَࢽَّرُو ࢽغُوسٜ کِدَمَࢽْجُرُو غَلَسْࢽَ ࢽَࢽْغَرُو؞
[13] وُ ثَلَࢽْ عِیسَىٰ بَسْتُمَ یٜ، غَوُࢽْجُوَ بَسَرْدُمَ یٜ، کُورُو کَمْ جَوْ یَیٜ، ࢽُودُࢽَمْبُوَ کَمْبْرْسٜࢽَمْبُوَلَࢽْ ࢽغَیْ دِکّْࢽَ ࢽَࢽْغَرُو کَࢽْجِمَرِ اللَّهیٜ ࢻَࢽْدْکّٜ،
[14] کْمَࢽْدٜ سٜرْࢽْجُ تْرْمْ وُرُو ࢻْلٜسِیٜ، کَمْبْرْسٜیَ کْرَوُووَ عِیسَى أَلْمَسِیوُلَࢽْ دَسَاࢽَدْ یٜیَ کِوَࢽْدْکُّو؞
[15] مَࢽَ أَدْ أَوُو مْرْسَدُیٜ یٜ، کِبُّرُو کَسَتُّیٜ یٜ: عِیسَى أَلْمَسِیوُ دُࢽِیَرُو بِوُوُوَ ࢽجْکَّوُورُو کَدِیُو، کُورُو ثُرُوࢽْجَࢽْ وُمَ کُرَدْ وُو؞
[16] أَکُّو دَلِلْ کَࢽْجِمَرِࢽْجُ وُرُو ࢻْلٜسْغْࢽَدْ: عِیسَى أَلْمَسِیوُ وُ بِوُمَ کُرَدْلَࢽْ کَࢽَدِࢽْجُ ثِ بَوُودَ مِسَلْ غَیْرُو أَمْ دُوُوࢽْ تِیَ ࢻُوُࢽْ کَسَثَّࢽٜ رُو سَوِسُویٜ ثَوَࢽْدِدْرُو ࢻْلٜجِیے؞
[17] مَیْ سَوِسُومَ، تْمَّرُو ࢽُیْوَوُو یٜ، تُرُیْوَوُو یٜدْ، تِ دُوُوࢽْ اللَّه تِلُودْرُو بْرْسْمْبَ دَرَجَا حَرْ أَبَدَ أَبَدِࢽُّو تِیُو! أَمِࢽْ؞
[18] تِمُوتِ تَدَࢽِ، کْلَ مَࢽَ ࢽَوِࢽَوِیٜ ثَلَࢽْ کْلَࢽْمْلَࢽْ وُلْجَࢽَدْیٜࢽْ وَدَ أَدَ مُکُّوࢽْمْبُو یَکّْکّْࢽَ، مَࢽَدْلَࢽْ مْلْدُ ࢽغْلَࢽْ مْلْدْࢽٜ،
[19] کَرْوُࢽْمْدَ کَمْبْرْسٜیَ سَرِوُ بَوُووَالَࢽْ رُوࢽٜ؞ أَمْ لَا أَوُو أَࢽِیَ وَجَࢽٜ حَرْ کَمْبْرْسٜࢽْجَ سُلَتْ ࢻَیْدَ بَوُورُو وَلْیٜࢽُو؞
[20] ثُرُوࢽْجَࢽْ حِمٜࢽَیُسَّ أَلٜکْسَࢽْدَا مبٜجِ؞ ثَرُو بَرٜ غَدٜرُو اللَّهَ بَسَّࢽِّرُو تَیِیَ مُکُّو إِوُلِیسّٜرُو کٜکُّو؞