[1] دَرْیٜرَمْبُو، کْرَمِیَ، أَࢽْدِرُو اللَّهَ سَکُّورُواْ، مَࢽَ کْمَدْیٜ ࢽدَرَرُو یَیٜ تَتَرْدُوُو دَرَجَ ثُوَࢽْدُو، جِرِ دَوُࢽْدُو یٜࢽْ وَکَّجْࢽَدْ غَیْ،
[2] کُورُو اللَّه أَࢽْدِیَ مُکُّو کْلَدُووَ کَمْ دِوِیَسُویٜࢽْ سَمُواْ، أَمْ سَمَّ غْࢽِ کَمْبْرْسٜࢽْجَا وُو ࢽَࢽْغَرُو؞
[3] أَمَّ کْمَدْ أَمَࢽَّ، ࢽَیِرُو دُࢽُو ࢽجَدٜ ࢽَیِیَ کْلَدُودْࢽْ ࢽجَرِوِ؞
[4] وَدَ ࢽَیِرُو ࢽجَدِیٜࢽَدَ کْرْمَ یٜ، ࢻُوُࢽْ یٜ غَوِرُو کْمَ ࢽَࢽْغَرُو مْرْسَࢽِیٜࢽَ؞
[5] کْمَدْ کْرَوُو اللَّهیٜیَ ࢽٜتُّ أَلْمَسِیوُیٜیَرُو کَرْوُࢽْدُووَ سِمُوجُوُو!
[6] کْرَمِیَ، ثُ کْمَࢽْدٜ عِیسَى أَلْمَسِیوُیٜࢽْ وَدَ ࢽجَدِیٜ، کْرَمِ دُوُوࢽْ لُسُرُّو وَلْجٜ أَلَمْدُ أَࢽْدِلَࢽْ ࢻَࢽْدُوَّدَ غَ وَجِمَدْ، جَوَلْࢽْجُࢽْ لُوُواْ!
[7] ࢽَیِ کْلَࢽْدُو جِرِ مِسَلْࢽْدٜ غَ وَجِمْࢽْجَاࢽَدَ ࢽُوࢽُوَّ، دَلِلْࢽْجُدْ سَ دَوُࢽْدُوࢽْ دْغَیْیٜࢽَدْࢽْ، لُسُرُّو وَلِّیٜࢽْدٜ،
[8] بِ کْمْبُو وُࢽْدُمَیٜ دٜرُو بُیْیٜࢽْدٜ، أَمَّ بُࢽٜیَ کَوْسُوَرُو ࢽغْࢽْࢻْتِیٜ کِدَ دِیٜࢽَ، بَرٜ وُࢽْدُࢽْدُومَرُو کُرْوُووُرُو وَلِّیٜࢽْدٜرُو؞
[9] کْࢽْدُوُو أَدَ تَیْیٜࢽْدٜ ࢽَࢽْغَرُو غْࢽِ، أَمَّ ࢽَیِرُو مِسَلْ غَیٜ ࢽجُورُو أَوُو أَࢽِیَ کِدِیٜ؞
[10] سَ دَوُࢽْدُوࢽْ دْغَیْیٜࢽَدْمَࢽْ، وَدَ أَدَ ࢽَیِرُو ࢽغٜیْیٜ: «کَمْ کِدَ وَجْࢽَمَدْ بَرٜ کْمْبُو جُوُࢽِّ!»
[11] أَدْ یَیٜ دَوُࢽْدُوࢽْ أَمْ لَا لُسُرْ کِدَ ثَدِوَوُو، أَمَّ أَوُووَ بُووُیٜ جُرْ ثَدِ مبٜجِ ثَࢽِ ࢻَࢽِّیٜࢽَ؞
[12] أَمْ جِرِ أَࢽِرُو ثُ کْمَ عِیسَى أَلْمَسِیوُیٜࢽْ وَدَ یِیٜ، ࢽَࢻْتُ ࢽَࢽْلٜوَیٜࢽْ کِدَ ثَدُو کْمْبُو کْلَࢽْجَیٜ جَوُو!
[13] ࢽَیِدْ، کْرَمِیَ، بَرٜ ࢽغْلَ دِیُورُو یِمْبَرُوِّ؞
[14] کَمْ لَا أَوُو وُوتِیَ أَدْࢽْ وُلِّیٜࢽَدَ جْغَیْوَوُووَ، تِرُو حَࢽْغَلْدْࢽُواْ، ࢽَࢽْغُ ࢻَࢽْجُورُو جَوَلْࢽْجُࢽْ لُوُواْ!
[15] أَمَّ بَرٜ تِیَ وَدُمَࢽْدُورُو ࢽغُوࢽُوِّ، کْرَمِࢽْدُو غَیْ سْمُوࢽْجُ کَسُّواْ؞
[16] کْمَ ࢽَࢽْلٜوَمَ کْلَࢽْجُدْ ࢽَیِرُو سَوِ یَیٜ جِرِ ࢻِࢽْ یَیٜ ࢽَࢽْلٜوَ ࢽجَدُو! کْمَدْ ࢽَیِ سَمَّا رُوکُّو دْغَ!
[17] وُمَ بُلُسْ لٜوَ أَدَ مُکُّوࢽِلَࢽْ رُوُیٜکُّو؞ ثُرُو وُوتِیَوَࢽِ سَمَّیٜࢽْ أَدْمَ رُوُࢽِ وُو، ࢽغَیْمَࢽْ رُوُࢽْکِّ؞
[18] سٜرْ کْمَࢽْدٜ عِیسَى أَلْمَسِیوُیٜ ࢽَیِ سَمَّلَࢽْ دْغَ!