[1] Yaa obboleeyyan koo, namni tokko odoo itti hin yaadin dilii fedhetti illee yoo seene, isin warri Ruuhaan geggeeyfamaa jirtan, ruuhaa rahamata qabduun isa sirreeysaa! Ammaas isinummaanuu akka hin fitinamnees if eeggadhaa!
[2] Ba'aa walii baadhadhaa! Tana goonaan seera Kiristoosiis ni raawwattu.
[3] Namni humaa keeysa hin jirre tokko, ani abalu kan ifiin jedhu ifuma gowwoomsa.
[4] Namni hundinuu adduma addaan hojii ifii isaa xiinxalee haa laaluu! Hogguus nama biraatti odoo if hin qixxeeysin ifumatti boonuu ni dandaya.
[5] Namuu tuu adduma addaan ba'aa ifii isaa baadhachuu dha qaba.
[6] Namtichi Qoowlii Wangeelaa barachutti jiru, waan gaarii qabu hundumaa barsiisaa isaa wajjiin haa hirmaatuu!
[7] If hin gowwoomsinaa, bar Rabbitti hanjamuun hin dandayamuu! Namni ammoo waanuma facaase haammata.
[8] Namni akka fedha jasadaatti facaasu, fedha jasadaa irraa badiidha haammata; kan akka fedha Ruuhaatti facaasu ammoo, Ruuhaa irraa jireenya bara baraa ti haammata.
[9] Waan gaarii hojjachuuf if hifachuu haa dhabnuu; nuti yoo abdii irraa kutachuu baanne, wayta isaatitti oomisha irraa ni galfanna.
[10] Eegaa akkuma carraa arkannetti, koottaa nama hundumaa fuu, keeysumattuu warra amantii keeysa jiraniif, gaarii haa hojjannuu!
[11] Kunoo, amma qubee gurguddoo dhaan harkuma kiyyaan isiniif barreeysuu kiyya laalaa!
[12] Warri waan nama irratti alaan mullatu akka gaaritti agarsiisuu barbaadan, akka isin dheeyna qabattaniifi isin dirqu; sababa tokkichi isaan tana godhaniif, fannoo Kiristoosiif jecha akka isaan hin arihatamneefi.
[13] Warrummaan seera dheeyna-qabaa duukaa bu'an illeen, bar seera hin eeganii; haa tahu malee, isaan dheeyna qabamuu keeysan wanni barbaadaniif jasada keeysaniin if dhaadachuu qofaafi.
[14] Ani ammoo fannoo Gooftaa keenya Yesuus Kiristoos kan biiyti addunyaa anaaf irratti fannifamte, kaniin aniis addunyaaf irratti fannifame san malee, waan biraa tiin if dhaadachuu gonkumaa hin dandayu.
[15] Uumama haaraya tahuu tu lakkaawama malee, dheeyna qabachuun yookiin dheeyna qabachuu dhabuun, waa takka illee faaydaa hin qabu.
[16] Nagayninii fi araarri warra akkaataa karaa haaraya kanatti jiraataniif, Israa'el Rabbii tiifiis haa tahu!
[17] Eegasuu godaannisa madaa Yesuus ani waaniin qaama kiyya irra qabuuf jecha, asii achi namni tokko illeen ana hin dararin!
[18] Obboleeyyan koo, ni'imaan Gooftaa keenyaa Yesuus Kiristoos, Ruuhaa keeysaniin wajjiin haa taatu! Aammiin.