[1] Ani Phaawulos fedhii Rabbii tiin ergamaa Yesuus Kiristoos kaniin tahe, qulqulloota Rabbii, warra Yesuus Kiristoositti amananii, magaalaa Efesoon keeysa jiraataniifiin xalayaa tana barreeysa.
[2] Rabbi Abbaa keenyaa fi Gooftaa keenya Yesuus Kiristoos irraa ni'imaa fi nagayni niis isiniif haa tahu!
[3] Rabbi, Abbaa Gooftaa keenyaa Yesuus Kiristoos, kan karaa Kiristoos eeyba Ruuhaa samii irraa hundumaan, nu eeybiseef hamdiin haa taatu!
[4] Inni uumamuu biyya addunyaa dura, warra qulqullaawan, warra isa duratti humaa illaa takka illee hin qabne akka taanuuf, jaalatee Kiristoosiin nu filatee ti jira.
[5] Rabbi, akka fedha gaarii isaatitti Yesuus Kiristoosiin ilmaan akka isaaf taanuuf, nu herregee ti jira.
[6] Kuniis durrii ni'imaa isaa, kan inni Ilma isaa jaalatamaan bilaashitti nuuf kanne, nu galateeyfachiisa.
[7] Akka badhaadhummaa ni'imaa Rabbitti Kiristoos dhiiga isaa nuuf dhangalaasuu isaa tiin, najaataa fi oomfii dilii tiis nu arkachiise.
[8] Ni'imaan inni, hikmaa fi hubannaa isaa hundumaan nu irratti dhadhangalaase heddu.
[9] Rabbi akka fedhii gaarii isaatitti, sirriin inni Kiristoos keeysatti akeekee ture san, akka nu biratti beekamtu godhe.
[10] Akkaataa akeeka guutummaa waytaatti, waan bantii samii keeysa jiruu fi, waan lafa irra jiru hundumaa, Rabbi Kiristoos keeysatti walitti qabuu dhaafi.
[11] Rabbi inni waan hundumaa akka akeeka ifii isaa tii fi akkuma fedhii isaatitti akka tahu godha. Nutiis ammaas akkuma inni yaadee qopheeysee herregetti Kiristoos keeysaan filatamnee ti jirra.
[12] Nuti warri duraan dursinee Kiristoos irratti abdii godhanne, hamdii ulfina isaa tiif akka jiraannuuf herregamnee ramadamnee ti jirra.
[13] Isiniis ammaas warri qoowlii dhugaa, Wangeela najaata keeysanii dhageeysanii amantaniis, Ruuhal Qudus abdachiifameen sumudni isin irra kaayamee ti jira.
[14] Ruuhal Qudus, qabuulii waan nuti dhaaluuf teenyu hundumaa hamma harkaan gayannuu ti; Rabbiis najaata guutuu nuuf kannuufi taa'a; durriin ulfinaa tii fi hamdiiniis isaaf haa tahan.
[15] Ammaas ani Gooftaa Yesuusitti amanuu keeysanii fi warra kiristaanaa jaalachuu keeysaniis dhagayee tiin jira.
[16] Waa'ee keeysaniif Rabbi galateeyfachuu fi kadhata kiyya keeysattiis isin yaadachuu hin dhiifne.
[17] Rabbiin Gooftaa keenyaa Yesuus Kiristoos, Abbaan durrii ulfinaa, ruuhaa hikmaa tii fi ammaas mullata isa beekuu dhaa tiis, akka isiniif kannuufiin kadhadha.
[18] Abdiin inni itti isin yaame maal akka taate, ulfinni warri Kiristoositti amanan dhaaluuf deeman, badhaadhummaan isaa maal akka tahe akka beeytaniif, ija qalbii teeysanii akka isiniif ibsuufiin maganfadha.
[19] Kuniis nu warra amanneef, humniti isaa hizaaba malee guddoo akka taate, qiwwaan isaa jabduuniis nu jiddutti akka hojjattu haa beeytaniif jecha ture.
[20] Inni hojii qiwwaa isaa tanaan Kiristoos warra du'an keeysaa kaasee, samii irrattiis gara harka mirgaa ifii isaa ti teeysise.
[21] Gooftummaa, amrii, humna, mootummaa jiru hundumaa, bara addunyaa kanatti, bara aakiraa dhuftuttiis, waanuma maqaa dha'uun dandayamu hundaa ol isa kaaye.
[22] Rabbi waan hundumaa miillan Kiristoos jala kaaye; inni ammaas isa waan hundumaa olitti, waldaya kiristaanaa tiif mataa godhee ti kanne.
[23] Waldayan kiristaanaa qaama Kiristoosi; inni niis kan waan hundumaa huu karaa hundumaanuu guutuu dha.