[1] Wanniniin jechuu barbaade, namni dhaalu tokko umriin daa'ima hanga tahetti qabeenyi hundinuu kanuma isaa tahu illee, gabra irraa waan itti bahuun hin qabu.
[2] Hanga waytiin abbaan isaaf herrege san geeysutti, inni harkuma warra isa guddisuu fi warra imaanaan irra jirtu jala taha.
[3] Nutiis akkasumatti daa'imman wayta turre, humnoota ruuhaa addunyaa tana irraa keeysaa tiif oggollee ti turre.
[4] Barri guutummaa waytaa hogguu gahe ammoo, Rabbi Ilma isaa kan dubartii irraa dhalate, kan seera jala tahe erge.
[5] Inni niis gumaa warra seera jala jiranii baasee furuuf, akkasitti nutiis ilmaan guddifachaa Rabbii tahuu akka arkannuufi tana godhe.
[6] Irrattuu isin ilmaan isaa waan taataniif jecha, Ruuhaa Ilma isaa kan Rabbiin, “Abbaa, Abbiyyo” nu jechisiisuu dandayu garaa keenya keeysatti dhangalaasee bar!
[7] Eegasuu ammaan booda, ati ilma malee, gabrichaa miti; ilma taanaaniis, ammaas Rabbi keeysaan akka dhaaltuufi mirga si arkachiisa.
[8] Isin dur odoo Rabbi hin beekin, warra zaata Rabbummaa hin qabneef oggoltanii ti turtan.
[9] Amma ammoo eega Rabbi beeytan, caalatti inumaatuu eega Rabbiin beekamtan, irrattuu akkamitti deebitanii warra dadhaboo fi yartoota humnoota hawaa addunyaa mallakutti garagaltu ree? Jarreen kanneeniif dhugumaan ammaas deebitanii gabroomuu dha barbaaddanii?
[10] Isin kunoo guyyoota adda addaa, baatilees, manziilootaa fi baraas akka waan hukmii qabanii gootanii ti isaan kabajju.
[11] Hojiin ani isin jiddutti itti laffa'aa ture sun, bilaashuma akka hin taaneen isiniif sodaadha.
[12] Yaa obboleeyyan koo, akkumaan anuu isin fakkaadhetti, isiniis mee akkasumatti ana fakkaadhaa jedhee tiin isin kadhadha; waan natti balleeysitaniis hin qabdan.
[13] Ani waytaan dura Wangeela isinitti lallabe, qaamaan dhukkubsadhee yaraa akkaan ture ni beeytan.
[14] Dhukkubni kiyya fitinaa isinitti tahee turu illee, isin ammoo akka maleeykaa Rabbitti, akkaan anummaa nuu Yesuus Kiristoos tahetti na fudhattan malee, ana hin tuffanne, ana irraa hiis if hin qoorrifanne.
[15] Gammachuma teeysan san irra maalumaa tu gahe? Odoo waan isiniif dandayamu taatee, silaa ija teeysanuu if keeysaa fuutanii warra anaaf kannu akka turtan anuu isiniif ragaa dha.
[16] Amma ammoo dhugaa isinitti dubbachuu kiyyaafiin adawwii isinitti tahee ree?
[17] Jarreen kanneen hinaaffaan ifitti isin harkisuu barbaadan illee, ammoo warra waan gaarii isiniif yaadanii miti; wanni isaan barbaadan, nu irraa isin hayyifatanii isaaniin wajjiin akka hamileen dhaabbattani.
[18] Waan gaariif hanga tahetti mirqaanni cimaan illeen gaaruma; kuniis waytumaan ani isin bira jiru qofaaf odoo hin tahin hoggayyumaa fuu haa tahu.
[19] Yaa ilmaan koo kukummii! Hanga Kiristoos isin keeysa jiraachuun mullatutti, akka dubartii dahuuf cimiimfattuttiin aniis ammaas deebi'ee isiniif cimiimfachaatiin jira.
[20] Akkaataan teeysan waan na dura facateef jecha, silaa ammumaan tana isinii biratti arkamee, suuraan isiniif qabu tana jijjiirachuu dandayee, akkamittiin hawwaan ture.
[21] Mee natti himaa! Isin warri seera jalatti buluu barbaaddan, waan seerri dubbatu qubumaa hin qabdanii?
[22] Kitaaba keeysatti, Abrahaam ilmaan lama qaba ture; tokko dubartii gabrummaa jala jirtu irraa, kaan ammoo dubartii bilisa irraa dhale jedha.
[23] Ilmi isaa kan dubartii gabrittii irraa dhalate, haaluma namni itti dhalatutti dhalatee ture; ammoo ilmi isaa kan dubartii bilisa irraa dhalate, abdii Rabbi kanneen keeysaani arkame.
[24] Jechoota kanneen akka fakkiitti fudhadhaa! Dubartiin lamaan kanneen, irbuu lamaani agarsiisu; isiin takka irbuu gaara Siinaa gubba irraa ti, gabrummaafi ilmaan deeysi; isiiniis Aggaar jedhamti.
[25] Aggaar tun tan gaara Siinaa biyya Arabaa keeysaatti fakkeeyfamtu tan ammaas magaalaa Yerusaaleem kan amma jiru kanatti fakkeeyfamti; kuniis ammuma illee ilmaan isii tiin wajjiin gabrummaa keeysa waan jirtuuf jecha.
[26] Yerusaaleem samii irraa ammoo bilisa; isiiniis haadha teenya.
[27] Kitaaba keeysatti, “Ati yaa dubartii dhabduu, tan ilmaan hin dhalle gammadi; ati tan laalaa cimiimuu hin qabne gammachuun ililchi; sababa ilmaan dubartii moggatti darbamtee tan dubartii jaarsa qabduu irra hoddomaataniif guddisii gammachuu tee dhageeysisi!” kan jedhu barreeyfamee ti jira.
[28] Yaa obboleeyyan koo, amma isiniis akkuma Isihaaqitti bar ilmaan abdii dhaa tii.
[29] Haa tahu malee, wayta sanitti inni akka haaluma namni itti dhalatutti dhalate sun, isa kan akka fedhii Rabbitti dhalate san cunqursee ti ture; ammuma illee akkasumatti jira.
[30] Ammoo Kitaaba keeysatti maal jedha? “Dubartittii gabra ilmoo isii tiin wajjiin arihii baasi; ilmi gabrittii irraa dhalate yoomuu taanaan, ilma dubartii bilisa irraa dhalateen wajji miraaza hirmaachuuf mirga hin qabu” jedha.
[31] Eegaa yaa obboleeyyan koo, nuti ilmaan dubartii gabrittii odoo hin tahin, bar tan dubartii bilisaa tii!