[1] Yaa gowwoota warra Galaatiyaa! Eenyuu tu muusuu isin irra kaayee isin dhamaase? Yesuus Kiristoos fannifamuun ija teeysan duratti zaahir baafamee mullifamee hin turree?
[2] Ani waanuma takkaan isin irraa baruu barbaada; seera eeguu dhaan Ruuhal Qudus arkattan moo, yookiin waan dhageeysan san amanuu dhaani?
[3] Isin hammanuma gowwaa dha; Ruuhaan eega jalqabdan booda, amma ammoo yaada jasadaa tiin raawwachuu dha barbaaddanii?
[4] Muuxannoon amantii keeysatti qabaachaa turtan hundinuu gatii dha dhabee? Akkana natti hin fakkaatu.
[5] Rabbi Ruuhal Qudus isiniif kannee, humna baasaa jidduu teeysanitti dalaguun isaa, isin waan seera eeydaniifi moo, yookiin Wangeela dhageeysan amanuu teeysaniif jecha?
[6] Abrahaam haa ilaalluu mee, “Inni Rabbitti amane, amantiin isaa tiis qaceelummatti lakkaawamteefi” kan jedhu barreeyfamee ti jira.
[7] Eegasuu, warra amantii qabanii tu ilmaan Abrahaam tahuu isaanii hubadhaa!
[8] Rabbi saboota qomoo Israa'el hin tahin amantiin qaceelota godhuuf akka deemu Barreeyfamni Qulqulluun duraan dursee arkee ti, duruma irraa Abrahaamiin, “Saboonni hundinuu siini eeybifamu” jechuuni Oduu Gammachuu dhaa beeysise.
[9] Akkasitti warri amantii qaban Abrahaam namticha amanti-qabeeysa tahe saniin wajjiini eeybifamu.
[10] Seera eeguu irratti warri if abdatan hundinuu abaarsa jala jiru; Kitaaba keeysatti, “Namni waan Kitaaba Seeraa keeysatti katabame hundumaa hin eeyne hundinuu abaarama!” jedha.
[11] “Namni qaceelaan amantiin jiraata” waan jedhameef jecha, namni tokko illeen seera eeguu dhaan Rabbi duratti qaceelaa tahee akka hin lakkaawamne beekamaa dha.
[12] Seerri amantii irratti hin bu'uramne; tanaaf “Namuma waan seerri jedhu godhuu tu ittiin jiraata” jedhamee barreeyfamee ti jira.
[13] Kiristoos ammoo nuuf jecha abaaramaa tahuu dhaan, abaarsa seeraa jalaa najaa dha nu baase; akkuma Kitaaba keeysattuu barreeyfametti, “Namni muka irratti fannifame abaaramaa dha” jedha.
[14] Eeybiti Abrahaamiif kannamte, karaa Yesuus Kiristoosiin saboota qomoo Israa'el hin tahin akka geeysuuf jecha, Ruuhaa Rabbi abdachiise san amantiin akka fudhannuufiis, inni najaa nu baasee ti jira.
[15] Yaa obboleeyyan koo, fakkeenyumaaf waanuma nama biratti beekame takka mee haa fudhannuu; irbuu galamte keeysaa irrisuuniis, itti dabaluuniis hin dandayamu.
[16] Rabbi Abrahaamii fi shanyii isaa tiif abdii kannee ti jira; Kitaabni hedduu fakkeeysuuf “Shanyootaaf” hin jedhu, “Shanyii tee tiifi” jedhee ti nama tokko tahuu agarsiisa; inni niis Kiristoosi.
[17] Akana jechuun koo, seerrichi bara dhibba afurii fi soddoma booddee kanname sun, irbuu duraan Rabbiin dhaabamtee fi abdii Rabbi duraan kanne san balleeysuu akka hin dandeenye agarsiisuma barbaadee ti.
[18] Dhaalli seera irratti bu'uramnaan, abdii irratti hin irkatu jechuu dha; Rabbi ammoo ni'imaa isaa tiini abdii Abrahaamiif kanne.
[19] Eegasuu Seerri akeeka maaliif tumame? Hanga shanyiin abdiin kannamteef san dhuftutti, yakki maal akka tahe mullisuuf jecha kanname; seerri ammoo herregamee ti maleeykootaan, karaa namticha araar-qaboo tiin kanname.
[20] Wayta abdiin kannamte, araar-qaboon jidduu dhaa barbaachisaa hin turre; Rabbii tokkichaa tu ifumaa Abrahaamitti dubbate.
[21] Seerri abdii Rabbiin kanneen ni mormaa? Kun gonkumaa waan hin taane! Seerri nama jiraachisuu dandayu odoo kannamee jiraatee, Seeruma eeguu dhaan qaceelummaan ni arkama ture.
[22] Abdiin Yesuus Kiristoositti amanuu dhaan arkamtu, warra amananiif akka kannamtuuf jecha, Kitaabni addunyaan walumaa galatti dilii jalatti hidhamte jedha.
[23] Amantiin odoo hin dhufin dura, nuti seeraan ugguramnee hidhamnee, hanga amantiin mullifamtutti nutti cufamee ti ture.
[24] Amantii dhaan akka warra qaceelotti lakkaawamnu nu godhuuf jecha, hanga Kiristoos dhufutti seerri harka nu qabee Kiristoositti kan nu geeysu ture.
[25] Amma ammoo, eega amantiin dhufte booda, seeraan eegamuu jalaa baanee ti jirra.
[26] Isin hundinuu Yesuus Kiristoositti amanuu keeysaniin ilmaan Rabbii taatanii ti jirtu.
[27] Isin warri Kiristoositti amanuu dhaan cuuphamtan, Kiristoos uffattanii ti jirtu.
[28] Hundi keeysanuu Yesuus Kiristoos keeysatti tokko waan taataniif jecha, Yihudii yookiin Giriigii, gabra yookii bilisa, dhiira yookiin dhalaa tahuun keeysan addaan isin hin baaftu.
[29] Isin warra Kiristoos taanaan, eegasuu isin shanyii Abrahaami, warra waan abdiin kanname san dhaaluusi.