[1] Bilisummatti akka nuti jiraannuuf Kiristoos bilisa nu baase; kanaaf jabaadhaa dhaabbadhaa! Deebitanii lammaffaa harqoota gabrummaa jala galuu ifitti hin dhiisinaa!
[2] Waaniin ani Phaawulos isinitti himu dhagayaa; isin yoo dheeyna if qabsiiftan, Kiristoos humaa faaydaa isiniif hin qabu.
[3] Namuma dheeyna if qabsiisu hundumaanuu, hoggu takka irra deebi'ee wanniniin jechuu barbaadu, eegasuu waan seerri jedhu hundumaa ajajamuu tu si irra jiraa dha.
[4] Isin warri seera eeguu dhaan qaceeltota taatanii lakkaawamuu yaaltan, Kiristoos irraa if mogoltanii ti jirtu; ni'imaa Rabbii irraa hiis konkolaattanii ti jirtu.
[5] Nuti ammoo karaa Ruuhal Qudusiin amantii dhaan qaceelummaa argachuuf abdannu sani, fardeeyfannee eeggachaa ti jirra.
[6] Yesuus Kiristoos keeysatti amantii jaalala keeysaan hojjattuu tu faaydaa qaba malee, dheeyna qabachuu yookiin dheeyna qabachuu dhabuu miti.
[7] Isin haaluma gaaritti dhugaa duukaa fiigaa ti turtan; amma ammoo dhugaaf akka hin ajajamne eenyuu tu isin dhoorke?
[8] Dhugaaf akka hin ajajamne godhamuun Rabbuma isin yaame biraa tan dhuftuu miti.
[9] Rushuma waa xiqqoo tu qooshaa hunda akka baatu godha.
[10] Ani ammoo yaadaan ani isiniif kanne malee kan biraa akka hin fudhanne, Gooftaa irraa amantaan qaba; namni isin dhamaasaa jiru, abbuma fedhee huu yoo tahe, adaba isaa argachuun hin hafu.
[11] Ammoo yaa obboleeyyan koo, amma illee seerri dheeyna-qabaa akka eegamu waaniin lallabaa jiru odoo tahee, hanga ammaatti silaa maaliifiin reebama? Silaa akkas taatee fannoon Kiristoos namootatti gufuu tahuun ni hafa ture.
[12] Namoonni isin tuttuqanii kakaasan kun, silaa deemaniituma raawwatanii if kollaasanii niin hawwaan ture.
[13] Yaa obboleeyyan koo, isin kunoo bilisa tahuuf yaamamtanii ti jirtuu; jaalalaan wal tajaajilaa malee, bilisummaan teeysan, fedha jasadaa tiif karaa hin banin!
[14] Guutummaan seeraa jecha tokkicha, “Ollaa kee akka mataa keetiitti jaaladhu!” jedhuuni guduunfama.
[15] Isin ammoo wal ciniiuu fi wal nyaachuu dhaan akka wal hin fixne if eeggadhaa!
[16] Ani ammoo, “Ruuhaan geggeeyfamaa jiraadhaa malee, fedha jasadaa hin godhinaan!” isiniin jedha.
[17] Kajeellaan uumama jasadaa Ruuhaan ni morma; Ruuhaaniis jasadaan ni morma; isin waan feetan akka hin gooneef, isaan kun lamaan waliini mormu.
[18] Ruuhaan yoo geggeeyfamtan ammoo, isin seera jala hin jirtan.
[19] Hojiileen jasadaa beekamoo dha, isaaniis, zinaa fi ejjummaa, najisummaa, fadduulummaa,
[20] waaqayyolii tolfamoo ibaaduu, nama falfaluu, wal jibbuu, wal-dhabuu, hinaaffaa, loluu, ifittummaa, wal facaasuu, dametti gargar caphuu,
[21] haasidummaa, farshaanummaa, bololummaa fi waan kanneen fakkaataniisi. Akkumaan kanaan dura isinitti himee ture, warri waan kanneen akkasii hojjatan Mootummaa Rabbitti galuu akka hin dandeenye ammaas isinittiin hima.
[22] Firiin hojii Ruuhaa ammoo, jaalala, gammachuu, nagaya, obsa, gaarummaa, arjummaa, amanamummaa,
[23] rahamataa fi if qabuu dandayuu dhaasi; eegaa, seerri isaan kanneeniin mormu hin jiru.
[24] Warri kan Yesuus Kiristoos tahan ammoo si'oo jasada namoomaa, kajeellaa isaa tii fi fedhii isaa tiis fannisanii ti jiru.
[25] Nuti Ruuhaan eega jiraanne, Ruuhaa faana haa yaanuu.
[26] Eegaa koottaa mee, dhaytaa, wal tuttuquu fi walitti hinaafuus haa dhiifnuu!