[1] Eegas bara kudha afur booda, ammaas Baarnaabaas wajjiiniin, Tiitoosiis if duukaa fuudhee gara Yerusaaleemitti deebi'ee ol bahe.
[2] Akkaan ol bahuuf Rabbi mullata anaaf kanninaaniin, dhaqee Wangeelaan ani saboota qomoo Israa'el hin tahiniif lallabu ibseetiin, warra achi jiran dura kaaye; kanaas ammoo hojiin ammaan dura dalagee fi tan fuula duraa tiis akka faaydaa hin dhabneef jechaan, warruma hooggantoota jedhaman qofattiin kophatti itti hime.
[3] Tiitoos kan anaa wajjiin ture nama Giriigii tahu illee, ammoo akka dheeyna qabamu hin dirqamne ture.
[4] Haa tahu malee, amantoonni sobaa hulluuqanii nu keeysa galuu dhaan, bilisummaa Yesuus Kiristoos keeysatti qabnu basaasummaan keeysa isii baranii, gabrummatti nu deebisuuf tattaafachaa ti turan.
[5] Nuti ammoo dhugaan Wangeelaa akka isiniin wajjiin haftuuf jecha, hanga liphuu ijaa takkaaf illee jarreen kanaaf harka kanninee hin oggolleefi.
[6] Warri kabajaan addaa kannamteef sun waanuma fedhe illee yoo tahan, anaaf garaagarummaa takka illee hin qabu; Rabbi fuula namaa laalee waan firdii hin gooneef jecha, ergaa tiyya irrattiis waan ida'an takka illee hin qaban.
[7] Gara kaaniin ammoo akkuma Wangeelli warra dheeyna qabamaniif Phexiroositti kannameefitti, akkasumatti ammaas warra dheeyna hin qabaminiif Wangeelli hadaraa akka anatti kanname, isaan waytana arkuu dandayan.
[8] Rabbi kanuma tajaajila Phexiroos ergamaa warra Yihudootaa wajjiin turee tu, akkasumatti ammaas tajaajila kiyya ergamaa saboota qomoo Israa'el hin tahin wajjiiniis hojjachaa ti ture.
[9] Yaaqoob, Phexiroosii fi Yohannis, hooggantoonni warri akka utubatti ilaalaman, ni'imaa Rabbi anaaf kanne hogguu hubatan, Baarnaabaasii fi anaas harka mirgaa tiin tokkummaa keeysatti nu fudhatan; gara saboota qomoo Israa'el hin tahin akka nuti deemnuu fi, isaan ammoo gara saba Yihudaa akka deemani irratti walii galle.
[10] Wanni gadi jabeeysanii hadaraa nutti dhaaman, warra miskiinoota gargaaruu akka itti furruu dha; tun ammoo waanumaan anuu itti mirqaanu ture.
[11] Wayta Phexiroos gara Anxookiyaa dhufe waan dogongoreef jecha, fuuluma isaa dura dhaabbadhee tiin itti falame.
[12] Jarri tokko Yaaqoob biraa odoo hin dhufin dura, inni saba qomoo Israa'el hin tahin wajjiin nyaachaa ti ture. Jarri kun hogguu dhufan ammoo, warra seera dheeyna-qabaa eegan sodaa, warruma duraan wajjiin nyaachaa ture irraa duubatti deebi'ee ti zigaaleeysuuf ifii kophatti achi bahe.
[13] Yihudoonni warri kaaniis zigaaleeysaa isaatti dabalaman; akkasitti zigaaleeysuun isaanii Baarnaabaasuma illee dogongorsiifte.
[14] Haala karaa dhugaa Wangeelaatti deemuu dadhabuu isaanii hogguun arke, fuuluma isaan hundaa durattiin Phexiroosiin, “Ati nama Yihudaa taatee, akka nama Yihudaatti odoo hin tahin, akka nama saba qomoo Israa'el hin tahinitti eega jiraatte, eegasuu ati akkamitti warra saba qomoo Israa'el hin tahin akka aadaa warra Yihudaa fudhatanii jiraatan godhuuf dirquu dandeeysaan?” jedheeni.
[15] Nuti warri dhalootaan Yihudaa taane, akka dilaawoo saba qomoo Israa'el hin tahinii tii miti.
[16] Namni seera eeguu dhaan qaceelummatti akka hin lakkaawamne ni beeyna; ammoo namni Yesuus Kiristoositti amanuu dhaan qaceelaa dha taha. Kanaaf nutiis, seera eeguun odoo hin tahin, Kiristoositti amanuu dhaan akka qaceelummatti nuuf lakkaawamuuf amantii teenya Yesuus Kiristoos irra kaayanne; seera eeguu dhaan namni tokko illeenuu qaceelatti hin lakkaawamu.
[17] Nuti oduma Kiristoosiin qaceelotti lakkaawamuuf tattaafannuu, dilaawoota taanee yoo arkamne, Kiristoosii tu dilii akka hojjannu nu kakaasa jechuu dhaa ree? Kun gonkumaa waan tahuu miti!
[18] Waanumaan ifii diige deebisee kaniin ijaaru yoon tahe, ani nama seera caphse tahuu kiyyaan mullisa.
[19] Ani Rabbiif jiraachuuf jecha, karaa seeraa tiin seera jalaa hiin du'e; eegasuu seerri amrii ana irratti hin qabu; ani Kiristoosiin wajjiin fannifamee tiin jira.
[20] Asii achi anaa miti kan jiraatu, Kiristoosii tu na keeysa jiraata malee; jiruun amma jasadaan jiraadhu tun, taniin Ilma Rabbitti amanuu dhaan jiraadhuu dha; inni niis kan na jaalatee if dabarsee anaaf jecha kannee dha.
[21] Ani ni'imaa Rabbii bilaash hin godhu; namni qaceelaa tahee lakkaawamuun, seeraan odoo tahee, eegasuu Kiristoos bilaashumatti du'e gaa!