[1] Isin joolleen, haawwan keeysaniif ajajamaa! Kun waanuma Gooftaanuu fedhu.
[2] “Abbaa kee tii fi haadha tee tiif ulfina kanni!” kan jedhu eemara abdiis if keeysaa qabu kan duraa ti.
[3] Kitaabni itti furuu dhaan, “Akkana yoo goote wanni hundinuu siif qaceela, ammaas lafa irratti umrii dheertuus ni arkatta!” jedha.
[4] Isin abbootiin! Joollee teeysan akka aaraan garaan isaanii gubatu hin godhinaa, ammoo sirnaa fi naamusaan, ammaas barsiisa Gooftaa tiin isaan guddisaa.
[5] Isin kaadamtoonni! Warra biyya addunyaa tana irratti isin dalaysiifataniif sodaa fi kabajaan, amanamummaa dhugaa tiiniis, akkuma waan Kiristoosiif ajajamtanitti isaaniif ajajamaa!
[6] Waytuma ijaan isin arkan qofa isaan gammachiisuuf odoo hin tahin, ammoo akka kaadamtoota Kiristoos, kanneen fedhii Rabbii garaa fudhatanii dalagan sanitti isaaniif dalagaa!
[7] Namaaf odoo hin tahin, akkuma waan Gooftaa kaadamtanitti garumaa fudhadhaa tii isaan kaadamaa!
[8] Namni tokko gabra tahuus yookiin bilisa, waanuma gaarii tahe kan hojjate hundinuu, gaaruma akkasii san ujuraa Gooftaa irraa akka fudhatu beekaa!
[9] Isin gooftoliin! Akkuma kabajaa isaan irraa eeggattanitti, isiniis kaadamtoota keeysan haaluma kanaan qabaa! Isaaniis hin sossodaachisinaa! Gooftaa keeysanii fi Gooftaa isaanii tiis kan tahe, samii irra jiraachuu isaa ni beeytan; inni niis, kan fuula namaa laalee gara tokkootti jiguu miti.
[10] Xumura irratti, humna Gooytaa tii fi qiwwaa isaa tiin warra jabaattan tahaa!
[11] Tooftaa shaaxirummaa Sheeyxaanaa dura dhaabbachuu akka dandeeysaniif, meeshaa lolaa tan Rabbi biraa arkamtu hundumaa hidhadhaa!
[12] Qabsoon teenya namaa wajjiinii miti; warra ijatti hin mullanne kanneen hawaa adunyaa keeysatti mootummaa fi amrii qaban wajjiini, warra humna biyya addunyaa dukkanooytuu tana moohanii fi ruuhaa hamoo bantii samii keeysa jiran wajjiini qabsoo qabna.
[13] Kanaaf guyyaa hamaa isin mudatuun morkuu akka dandeeysaniif jecha, ammaas hanga xumuraatti kana hundumaa gootanii, akka bakkaa hin sossoone, meeshaa lolaa kanneen Rabbii, hundumaa hidhadhaa!
[14] Dhugaa dhaan akka waraansileetti mudhii hidhattanii, qaceelummaa akka uffata sibiilaatti qomatti kaayattanii dhaabbadhaa!
[15] Ammaas meeshaa Wangeela nagayaa, akka kophetti miilatti kaayatanii qophaawaa!
[16] Kana hundumaa irratti dabaltanii, akka xiyya Sheeyxaanaa kanneen belbela ibiddaa qaban ittiin dhaamsuu dandeeysaniif, gaacheena amantii dhaa fudhadhaa!
[17] Ammaas gonfoo najaataa tii fi ammaas habalee ruuhaa, isiiniis qoowlii Rabbii tan taate fudhadhaa!
[18] Wayta hundumaa Ruuhaa dhaan kadhadhaa, waan isin barbaachise kadhannaa hundaan gaafadhaa! Dammaqaa tii kadhadhaa, warra Rabbitti qulqullaawan hundumaafiis maganfachuu itti furaa!
[19] Barsiisuuf waytaan ka'u hundumaa, qoowliin anaaf kannamtee sodaa takkaan maleetti, hiccitii Wangeelaa akkaan beeysisuu dandayu anaafiis kadhadhaa!
[20] Wangeela kanaaf jechaan ergamee amma shanshalataan hidhamee jira; sodaan maleetti, akkuma na irraa eegamutti akkaan dubbachuu dandayuuf, Rabbi naaf kadhadhaa!
[21] Haalaan ani amma keeysa jiruu fi waaniin dalagutti jiru hundumaa akka beeytaniif, Xikiqoos obboleeysi keenya jaalatamaanii fi hojii Gooftattiis amanamaa kan tahe isinittuu ni hima.
[22] Nuti maal keeysa akka jirru akka isin beeysisuuf, ammaas akka isin jajjabeeysuuf jechaan, isa gama keeysan erge.
[23] Rabbi Abbaa, ammaas Yesuus Kiristoos Gooftaa irraa, nagayni nii fi jaalalti, amantiin wajjii, amantoota hundumaa fuu haa tahan!
[24] Ni'imaan, warra Gooftaa keenya Yesuus Kiristoos jaalala sinsinnii hin qabneen jaalatan hundumaa wajjiin haa taatu.