[1] Sababa kanaaf ani Phaawulos, isin saba qomoo Israa'el hin tahiniif jecha, waa'ee Kiristoos Yesuusiif hidhamaa tahee tiin jira.
[2] Waa'ee ni'imaa Rabbii, tan isiniif jecha imaanaa anatti kannamtee san, akka dhageeysanittiin fudhadha.
[3] Akkaataa hiccitiin san mullataan itti anatti beeysifamte, durumaanuu gabaabsee isiniif barreeyse.
[4] Wayta xalayaa tana dubbiftan, isinuu hubannaan ani hiccitii Kiristoos tanaaf qabu, bira gahuu ni dandeeysan.
[5] Dhaloota dabran keeysatti hiccitiin tun, ilmaan Banii Aadamitti hin agarsiifamne turte; amma ammoo, Rabbi Ruuhaa isaa tiin, ergamoota qulqullootaa fi nabiyyootattiis mullisee ti jira.
[6] Hiccitiin tuniis, tan akkaataa sabni qomoo Israa'el hin tahin dhaala saba Yihudaa wajjiin qaban, miseensa dhagna qaama tokkoo tiis akka tahan, ammaas abdii Rabbi Yesuus Kiristoos keeysaan kanne keeysaa hiis Wangeela keeysaan warra hirmaatan akka tahaniis tan agarsiiftu turte.
[7] Akkaataa kannaa ni'imaa Rabbitti, ani Wangeela kanaaf kaadamaa godhamee tiin jira; kuniis humna isaa tan hojjachaa jirtuuni anaaf kannamte.
[8] Ani warra qulqulloota hundumaa irra xiqqaa irraa gadi aantii tahu illee, badhaadhummaa Kiristoos tan namaan xiinxalamtee bira gahuun hin dandayamne, saba qomoo Israa'el hin tahinitti ni'imaan Oduu Gammachuu lallabuu dhaa, anaaf kannamtee ti jirti.
[9] Ammaas akeekni hiccitii bara dheeraaf dhooyfamtee turte sanii tiis maal akka tahe, namni hundinuu akka arku godhuun anaaf kannamee ti jira; akeekni dhokataan kun bara durii jalqabee, Rabbuma waan hundumaa uume keeysatti dhooyfamee ti ture.
[10] Kuniis wanni taheef, hikmaan Rabbii tan dachaa hedduu qabdu, amma waldaya kiristaanaa keeysaan, humnoota hawaa addunyaa keeysatti amrii qaban warra jedhamanitti akka beeysifamtuufi.
[11] Rabbi waan tana akkaatuma akeeka isaa kan inni abadiif herregee qopheeysetti, Yesuus Kiristoos Gooftaa keenya keeysaan fiinxaan baasee ti jira.
[12] Nutiis Kiristoositti amanuu keenyaan, ammaas isuma keeysaan, ija jabinaa fi amantaan, karaa Rabbitti dhihaannuun arkanne.
[13] Kanaaf jechaan hiraaramuun tiyya, isiniif ulfina waan taateef, hiraar na irra gahuuf jettanii abdii hin kutatinaa jedheetiin isin gaafadha.
[14] Ani kunoo, sababa kanaaf jechaan jilban kiyyaan Rabbi Abbaa duratti kufee kadhadha.
[15] Haaskaan uumamaa hundinuu, warri samii keeysaa tii fi warri lafa irraa tiis isumaani moggaafamu.
[16] Keeysi namummaa keeysanii, qiwwaa dhaan akka jajjabeeyfamuuf, Rabbummaan akkuma badhaadhummaa ulfina isaatitti, Ruuhaa isaatiin isiniif haa kannu.
[17] Kiristoos, amantiin qalbii teeysan keeysa akka jiraatuuf, warra jaalala keeysatti gadi fagaatee bu'uramee dagaage akka taataniifiin isiniif maganfadha.
[18] Amantoota hundumaa wajjiin hiccitiin hikmaa Rabbii hammam akka ballattu, hammam akka dheerattu, hammam akka ol fagaattu, hammam akka gadi fagaattuus hubachuu akka dandeeysaniifi.
[19] Jaalala Kiristoos, tan hizaaba beekumsa namaa bira dabartuus beeytanii, ammaas guutummaa zaata Rabbii hundumaan akka guutamtaniin isiniif kadhadha.
[20] Amma isuma kan humnuma nu keeysatti hojjachaa jirtuun, waan nuti gaafannuu fi waan nuti yaadnu hundumaa irra caalchisee godhuu dandayu.
[21] Rabbiif durriin ulfinaa, waldaya kiristaanaa keeysatti, ammaas Kiristoos Yesuus keeysattiis, dhaloota hundumaa biratti, bara baraaf haa taatu! Aammiin.