[1] Kunoo, ani namni Gooftaaf jecha hidhamee jiru, eegasuu jiruu waamicha fudhattan san qiimu akka jiraattaniin, gadi jabeeysee isinitti hima.
[2] Damboobummaa fi nassabummaa hundumaan jiraadhaa, obsaas qabaadhaa, jaalalaaniis wal baadhadhaa!
[3] Tokkummaa Ruuhal Qudus kan nagayaan nama walitti agaadu san fardeeyfadhaa eegaa!
[4] Akkuma waamicha keeysan tan abdii takkaaf itti yaamamtan sanitti, qaama tokkoo tu jira; ammaas ruuhaaniis tokkuma.
[5] Gooftaan keenyaas tokko, amantiiniis takka, cuuphaaniis takka.
[6] Rabbii Tokkicha Abbaa nu hundaa, inni hundaa oli, hunda keeysaan hojjata, hunda keeysa jiraataasi.
[7] Hunduma keenyaa fuu ammoo matuma matatti, akka qoqqooduu kannaa Kiristoositti ni'imaan nuuf kannamtee ti jirti.
[8] Kanaaf Kitaaba keeysatti, “Inni gara samiitti hogguu ol bahe, boojihamtoota heddu if duukaa geeyse, namootaafiis kannaale kanne” jedha.
[9] Ammoo, “Inni ol bahe” jechuun maal jechuu dha? Inni duraan dursee biyya addunyaa dhaa keeysaa bakka hundaa gadi taatetti gadi bu'ee ti ture jechuu mitii?
[10] Isuma kan gadi bu'ee tu, ammaas uumama hundumaa guutuuf bantiiwwan samii hunduma gararraatti ol bahe.
[11] Ammaas kannaaleen inni namootaaf kannees, hangi tokko ergamoota, hangi tokkoos nabiyyoota, kaan warra Wangeela lallaban, kaan tiysitoota, warra kaaniis barsiisota akka tahaniif ture.
[12] Tanaas wanni godheef, amantoota hojii tajaajila waldaya tiif qopheeysee, qaama Kiristoos jaaruufi.
[13] Kuniis hanga hundi keenyaa huu, tokkummaa amantii tii fi Ilma Rabbii qaceellotti beeknutti, ammaas namummaan bilchaannee, qiyaasa guutummaa Kiristoos bira wayta geenyutti taha.
[14] Eegasuu nuti asii achi akka daa'imman bishaaniin gamaa gamana daddarbamanii, kanneen buufaa barsiisa shaaxirummaa namaa tiiniis gowwoomfamanii, asii fi achi rooraafamanii tahuun nu irra hin jiru.
[15] Akkanaa mannaa, dhugaa, jaalalaan dubbachaa, koottaa mee karaa hundumaanuu gara isa mataa tahe Kiristoos keeysatti haa guddannuu!
[16] Kiristoosiini, dhagni qaamaa hundinuu moorgayaan, birkii adduma addaan arkataniin walitti hodhamanii ti jiru; hogguu dhagni qaamaa adduma addaan hojii isaa tartiibaan hojjatuus, qaamni ni guddata, jaalalaaniis if ni ijaara.
[17] Eegasuu asii achi, akka saboonni qomoo Israa'el hin tahin, yaada maalaa yaanii faaydaa hin qabne duukaa bu'anitti, asii achi hin jiraatinaa jechaa tiin, maqaa Gooftaa tiin gadi jabeeysee isin gorsa.
[18] Isaan hangullaan isaanii dukkaneeyfamtee ti jirti; wallaalummaa fi mata-jabina isaan qabanif jecha, jireenya Rabbi kannu keeysaa hayyifamanii ti jiru.
[19] Isaan safuu yookiin qaanyii dhabuu dhaan jireenya mufallisatti if gadi dhiisanii, aybii hundumaa hojjachaa jiraachuu irratti bololaan bobbahanii ti jiru.
[20] Isin ammoo Kiristoos haala sanitti hin barranne.
[21] Waa'ee isaa akka dhageeysanii fi, ammaas dhugaa Yesuus keeysatti arkamtuus akka barsiifamtanittiin fudhadha.
[22] Namummaa keeysan moofaa, ammaas kan akkaataa jireenya duraan dabarsitanii calaqqisiisu san, if irraa baasaatii darbaa!
[23] Ammaas Ruuhaan, yaada qalbii teeysanii haa haarayoomsu!
[24] Nama haaraya kan qaceelummaa fi qulqullummaa dhugaatti, akka fakkii Rabbitti uumame san uffadhaa!
[25] Kanaaf jecha namni hundinuu adduma addaan kijiba if keeysaa baasee, dhugaa namatti haa dubbatuu! Nuti dhagna miseensa qaama tokkoo ti.
[26] Yoo aartan illee aarri keeysan dilitti isin hin naqin! Oduma aartanii aduun isinitti hin dhihin!
[27] Sheeyxaanaaf hulaa hin baninaa!
[28] Namni kanaan dura hataa ture hatuu dhiisee, harka isaa tiin, dalagaa faaydaa qabdu dalagee, warra waa dhaban illee haa gargaaruu.
[29] Dubbii gaarii nama ijaartu, tan akka haala isaanittiis gargaartu, tan warra dhagayaniis fayyaddu malee, dubbiin hamtuun nama balleeysitu afaan keeysanii hin bahin!
[30] Ruuhal Qudus Rabbii tiis hin naasisinaa, isaani bar guyyaa najaa tiif sumudan isin irratti mallateeyfamee!
[31] Hadhaa hundumaa, kanneen akka lolaa, aaraa, iyyansa, arrabsoo fi ammaas hammeenyi hundinuu isin irraa haa fagaatanii!
[32] Rahamata waliif qabaadhaa, gara-laafoos waliif tahaa; akkuma Rabbi karaa Kiristoosiin dilii teeysan isiniif oomfii godhetti, isiniis akkasumatti oomfii waliif godhaa!