[1] Nuti Phaawulosii fi Ximotewoos kaadamtoonni Yesuus Kiristoos gara warra Yesuus Kiristoositti amananii magaalaa Filiphisiiyus keeysa jiraatan hundumaaf, ammaas warra toohatootaa fi tajaajiltoota waldaya kiristaanaatti xalayaa tana katabuu keenya.
[2] Rabbi Abbaan keenyaa fi Gooftaa keenya Yesuus Kiristoos irraa ni'imaa fi nagayni isiniif haa tahan!
[3] Waytumaan isin yaadadhu hundumaa, Rabbii kiyya niin galateeyfadha.
[4] Kadhannaan ani isiniif godhu hunduma keeysatti hoggayyuu gammachuuniin hunduma keeysaniif kadhadha.
[5] Kuniis, guyyaa duraa irraa eegaltanii hanga arraatti, hojii Wangeelaa keeysatti sababa shariikummaa qabdaniifi.
[6] Rabbi kan hojii gaarii kana isin keeysatti jalqabe, hanga guyyaa Yesuus Kiristoos deebi'ee dhufutti, akka raawwatu niin amana.
[7] Garaa kiyya keeysaa waaniin isin qabuuf jecha, hunduma keeysan laalchisuu dhaan, haalli akkanaa kun anatti dhagayamuun sirrii dha; ani shanshalataan hidhamee, Wangeelaaf falamuu yookiin isa cimsee dhaabuu irratti, hundi keeysanuu anaan wajjiin ni'imaa Rabbitti hirmaattu.
[8] Jaalala Yesuus Kiristoosiin akkaan hunduma keeysaniif dharra'u Rabbii tu anaaf ragaa dha.
[9] Jaalalti teeysan, beekumsa hundumaa fi hubannaa gadi-fageenya qabduus caalaatti akka qabaattaniifiin isiniif kadhadha.
[10] Kuniis, isin waan gaarii fi waan hamaa adda baafattanii, ammaas isin hanga guyyaa dhufa Kiristoositti xaliila aslii illaa hin qabne akka taataniifi.
[11] Firii qaceelummaa tan Yesuus Kiristoos keeysaan dhuftuun badhaatanii, hamdii durrii ulfina Rabbii tiif gahuufi deemtu.
[12] Yaa obboleeyyan koo! Wanni na irra gahe kun, Wangeela ballisuuf akka oole akka beeytaniin barbaada.
[13] Kunoo, ani Kiristoosiif jecha akkaan shanshalataan hidhame, warra waardiyyoota mana mootummaa Roomaa keeysaa hundumaaf, ammaas warra hafan hundumaafiis zaahir bahee ti jira.
[14] Ammaas, sababa shanshalata kiyya kana irraa kan ka'e amantoonni hedduun jajjabaatanii sodaan maleetti ija-jabinaan Qoowlii Rabbii dubbachuu irratti bobbaahanii ti jiru.
[15] Namoonni hangi tokko anatti qotuuf, hinaaffaan Kiristoos lallabuun isaanii dhuga. Warri kaan ammoo fedha gaarii qabaniif jecha isa lallabu.
[16] Warri fedhii isaanii tiin tana hojjatan akkaan ani Wangeelaaf falamuuf jecha asitti ramadame ni beeku.
[17] Warri kaan kanneen ifittummaa isaanii irraa kan ka'een Kiristoos lallaban, hidhamuu tiyya irratti rakkina anatti dabaluuf lallaban malee, dhugumaan garaan jaalatanii hin turre.
[18] Tahu illee maal qaba? Fakkeeysumaaf tahuus, yookiin dhugumaan godhaniis, wanni barbaachisu Kiristoosuma lallabuu dha! Aniis tanumattiin gammada, eeyye gammachuun tiyyaas itti furti.
[19] Kadhannaa keeysan irraa kan ka'e, ammaas gargaarsa Ruuhaa Yesuus Kiristoos irraa arkameen, wanni ana irra gahe, eewalama kiyyaaf akka oolu niin beeka.
[20] Waanuma fedhettuu, hojii tiyya irratti, if qaanfachuun akka ana irra hin geenye, abdachaa jabeeyseetiin hawwa; akkuma wayta hundumattuu Kiristoos amma illee jasada kiyyaan, jireenyaaniis tahu, du'aan, ulfina akka argatu, amantaa cimtuun qaba.
[21] Anaaf, jiraachuu jechuun Kiristoosi, du'uun ammoo faaydaa dha.
[22] Lubbuun kaniin jiraadhu yooniin tahe, hojii firii qabdu akkaan hojjadhuufi taha; haa tahu malee, tam akkaan filadhu, na dhibee ti jira.
[23] Yaada lama jiddutti muddameetiin jira; gar-tokkoon kan anaaf irra caalu ani aakirameetuma Kiristoos wajjiin tahuu dhaan hawwa.
[24] Haa tahu malee, lubbuun jiraachuun tiyya isiniif caalatti faaydaa dha qabdi.
[25] Ani hafee, hunduma keeysaniin wajji jiraadhee, amantiitti cimtanii guddattanii, ammaas akka gammaddan, gargaaruun kiyya barbaachisaa tahuu beekee tiin jira.
[26] Eegasuu waytaan deebi'ee isin bira dhufu, waan Yesuus Kiristoos anaan isin jiddutti hojjateef hamdii guddaa galchuuf carraa isiniifi kanna.
[27] Wanni feetee huu haa taatuu, jireenyuma keeysan haala Wangeela Kiristoosiin kan male godhaatii jiraadhaa! Eegasuu ani dhufee isin arkuus, yookiin isin bira hanqadhuus, gurruma qofaan waa'ee keeysan dhagayu illee, isinummaan Ruuhaa tokkoon jabaattanii jaaramtanii, akka nama tokkoo taatanii, amantii Wangeelaa tiif dhaabbadhaa!
[28] Karuma tokko illeenuu warra isiniin morman sodaachuu baddinaa! Sodaachuu dhabuun keeysan dhabamuu isaanii tiif milikkita taha; isiniif ammoo Rabbiin akka najaa baatani agarsiisa.
[29] Isin Kiristoositti amanuu qofa odoo hin tahin, maqaa isaa tiif jecha dararamuuniis isiniif kannamee ti jiraa bar!
[30] Qabsoodhaan ani keeysa dabre agartan, taniin ammaan tana keeysa jiruus dhageeysan; isiniis ammaas kunoo qabsuma akkasii keeysa dabraa ti jirtu.