[1] Isin kanaan dura balleeysaa teeysanii fi dilii teeysaniin [Ruuhaan] duutanii ti turtan.
[2] Wayta san isin haala biyya addunyaa tanaa duukaa buutanii, Sheeyxaanaaf ajajamtanii ti turtan; Sheeyxaanni hawaa addunyaa tana ajaja, ruuhaan isaa tiis namoota Rabbiif hin ajajamne hundumaa irratti amrii dha qaba.
[3] Hundi keenyaas hawwii jasada keenyaa duukaa buunee, akka fedha namummaa keenyaa tii fi yaada keenyaatti warra akkasii jidduu wayta jiraanne qabna; kana irraa kan ka'ees akkuma warra kaanii nutiis uumamaan lola Rabbii jalatti galfamnee ti turre.
[4] Rahamatni Rabbii ammoo hedduu waan taheef, jaalala isaa guddoo saniin nu jaalate.
[5] Nuti balleeysaa teenyaan Ruuhaan warra du'an turre; haa tahu malee, Rabbi warra Kiristoosiin wajji jiraatu nu godhe. Isiniis ni'imaa Rabbii tiin najaa bahuu keeysan beekaa!
[6] Isaa tu Yesuus Kiristoos wajjiin du'aa keeysaa nu kaase, ammaas Kiristoosumaan wajjiin bantii samii keeysatti bakka nuuf godhee nu teeysise.
[7] Inni arjummaa karaa Yesuus Kiristoos nu badhaaseen bara dhufu hundumaattuu hoddomina ni'imaa isaa, tan hammana hin jedhamne agarsiisuuf jecha tana godhe.
[8] Isin ni'imaa Rabbii tiini amantiin najaa baatan; kun ammoo kannaa Rabbii ti malee, waan isin irraa arkamee miti.
[9] Dalagaanii sii miti, akka namni tokko illeen ittiin if hin dhaadanne.
[10] Nuti hojii harka isaa ti, hojii gaarii tan Rabbi duraan dursee nuuf qopheeyse san akka hojjannuuf, Yesuus Kiristoosiini haarayatti nu uume.
[11] Isin warri saba Israa'el hin tahin, warra dheeyna qabatan, jechuun warra waan harkaan qaama namaa irratti hojjatamuun if yaaman biratti, warra dheeyna hin qabatin jedhamtanii akka yaamamaa turtan yaadadhaa!
[12] Wayta san isin Kiristoosii wajjiin humaa walittii hin qabdan turtan; jinsii ummata Israa'el irraa ala turtan, irbuu abdii isaanii tiifiis amba turtan; isin abdiin maleetti biyya addunyaattiis Rabbi-dhablee taatanii akka turtan yaadadhaa!
[13] Amma ammoo isin warri dur fagaattanii turtan, Yesuus Kiristoos keeysaan, jechuun dhiiga Kiristoosiin dhiheeyfamtanii ti jirtu.
[14] Kiristoos nagaya keenya; isa kan lamaanuu, ummata Yihudaa tii fi saba qomoo Israa'el hin tahiniis amantiin tokko godhee, gidaara diinummaa kan isaan jidduu tahee gargar isaan baasees, jasada isaa tiin diige.
[15] Inni nagaya buusuu dhaan jarreen gosa lamaan irraahuu nama haaraya tokko ifiin arkamsiisuuf seeraa fi ammaas qaceelfama seeraa tiis bakkaahi isaan darbe.
[16] Fannoo irratti du'uu isaa tiin, gosa lamaanuu akka qaama tokkotti, Rabbitti araarsuufi, diinummaa isaanii tiis ni dhabamsiise.
[17] Inni dhufee ti, isin warra fagoo turtanii fi isaan warra dhihoo turaniifiis nagaya labse.
[18] Nu lamaanuu Ruuhaa tokkoon karaa Kiristoosiin akka itti Abbaa bira geenyu ni qabna.
[19] Amma ummata Rabbitti lakkaawamtanii miseensota haaskaa Rabbii ti taatan malee, isin asii achi alagaa fi ambaa miti.
[20] Isin bu'ura ergamootaa tii fi nabiyyootaa irratti jaaramtanii ti jirtu, Yesuus Kiristoos ifumaa fuu dhagaa utubaa qaceelchu.
[21] Guutummaan mana sanii tiis isumaani walitti qabamee, Beeytal Maqdas Rabbii tahuuf Gooftaan guddifama.
[22] Isiniis ammaas isumaani, mana Rabbiin Ruuhaa isaa tiin keeysa jiraatu, godhamtanii ijaaramtan.