[1] Isin joollee jaalatamoo waan taataniif, warra jireenya Rabbii fedhu faana dhawaa jiraa tu tahaa.
[2] Akkuma Kiristoos nu jaalatee, ammaas aarsaa urgaa tolu, wareega Rabbiif dhihaatu godhee abarsee nuuf jecha if kannee sanitti, isiniis ammaas akkasumatti jaalalaan jiraadhaa!
[3] Isin ummata Rabbii qulqulluu dha; eegasuu akka ummata Rabbii qulqullutti jiraadhaa malee, zinaa fi najisummaan hundinuu, bololummaaniis isin jiddutti dhagayamuu dhiisii, gonkumaa maqaan isaanii tuu hin dhawamin!
[4] Jecha shukriif tahu malee, jecha nama qaanfachiisu, jecha arrabaa, ammaas qoosaan nama madeeysituus waan bakka hin qabneef jecha, afaan keeysanii hin bahin!
[5] Namni zinaa godhu, yookiin najisni, yookiin namni horiif bololu jechuun, nama waaqayyolii tolfamoo ibaadu waan taheef jecha, Mootummaa Kiristoosii fi Mootummaa Rabbittiis galuu akka hin dandeenye tun mirkana isiniif haa taatuu!
[6] Sababa kanneen hundumaaf jecha, lolli Rabbii joollee kordiida irratti waan dhufuuf, nam tokko illeenuu dubbii maalaa yaaniin isin hin gowwoomsin!
[7] Eegasuu warra akkasii wajjiin walitti hin hidhatinaa!
[8] Isin warra dur dukkana keeysa ture, amma ammoo Gooftaa keeysatti ifaa taatanii ti jirtu; eegasuu akka joollee ifaatti jiraadhaa!
[9] Firiin ifaa, waan gaarii fi qaceelaa, ammaas waan dhugaa tahe hunda keeysatti arkamti.
[10] Ammaas, waan Gooftaa gammachiisu barachuuf yaalii godhaa!
[11] Hojii dukkanaa kanneen faaydaa hin qabne, saaxil baasaa malee, itti hin dhihaatinaa!
[12] Wanni isaan dhooysatti dalagan, maquma isaanii dhawuu illee tu if nama qaanfachiisa.
[13] Ammoo wayta wanni takka illee nuu ifaan saaxil baatu ni mullatti, wanni mullataa hundi niis iftiina qaba.
[14] Akkana waan taheef jecha, “Ati yaa nama hirriibatti jirtu, dammaqii! Warra du'an keeysaa hiis ka'i, Kiristoosiis ifa siifi kanna” jedhame.
[15] Eegasuu akkamitti akka jiraattan qaceellotti if eeggadhaa! Akka warra aylii hin qabnetti odoo hin tahin, akka warra aylii qabanitti jiraadhaa!
[16] Guyyoonni kun hamoo waan tahaniif jecha, wayta isiniif kannamte tana hin qisaasinaa faaydaa irra oolchaa!
[17] Kanaaf jecha fedhiin Gooftaa maal akka taate, adda baafadhaa hubadhaa malee, gowwoota hin tahinaa!
[18] Dhugaatiin hin farshaaninaa, isiin faagaa nama baafti! Akkasii mannaa warra Ruuhal Qudusiin guutamtan tahaa!
[19] Faarfannaa fi faaruu sagalee gaarii qabduun, ammaas faarfannaa ruuhaa tiis wal jalaa qabaa shubbisaa! Garaa guutuun faarfachuun galata Gooyftaaf dhageeysisaa!
[20] Wayta hundumaa waan hundumaa fuu maqaa Gooftaa keenya Yesuus Kiristoosiin, Rabbi Abbaa dhaaf hamdii galchaa!
[21] Kabajaa Kiristoosiif jecha waliif ajajamaa!
[22] Isin beerran, akkuma Gooftaa Yesuusiif ajajamtanitti, abbaa warraa keeysaniifiis akkasumatti ajajamaafi!
[23] Akkuma Kiristoos mataa waldaya kiristaanaa tahetti, jaarsi niis mataa jaartii ti; Kiristoos naja-baasoo waldaya kiristaanaa ti; waldayaniis qaama Kiristoosi.
[24] Eegaa, akkuma waldayan kiristaanaa Kiristoosiif oggoltutti, niitiiniis waanuma hundumattuu jaarsa isii tiif tan oggolte haa taatuu.
[25] Akkuma Kiristoos waldaya kiristaanaa jaalatee, isiif jecha dabarsee if kannetti, jaarsi niis haaluma sanitti jaartii isaa haa jaalatuu!
[26] Inni waldaya kiristaanaa qulqulleeysuufi, bishaanii fi Qoowlii isaa tiin dhiqee ti isii naziifeeyse.
[27] Waldaya aybii fi suntuurraas, yookiin waanuma akkasii takka illee huu tan hin qabne godhee illaan maletti, durrii ulfina isii tiin ifitti dhiheeysuu dhaafi deema.
[28] Haaluma kanatti jaarsi niitii isaa akkuma qaama isaatitti haa jaalatuu. Namtichi jaartii isaa jaalatu, ifuma isaa ti jaalata jechuu dha.
[29] Namni qaama ifii jibbu gonkumaa hin jiru, namni qaama isaa sooraati kashkaasha malee, Kiristoosiis waldaya isaa tiif akkasuma godhe.
[30] Nutiis bar dhagna qaama Kiristoosi.
[31] Kitaaba keeysatti, “Sababa kanaaf jecha dhiirti abbaa isaatii fi haadha isaa tiis dhiiftee, niitii isaatitti maxxanti; akkasitti isaan lamaanuu qaama tokko tahu” jedha.
[32] Dubbiin tun hiccitii gadi fagoo taate if keeysaa qabdi; ani ammoo wanniniin irraa haasawaa jiru, waa'ee Kiristoosii fi waa'ee waldaya kiristaanaa ti.
[33] Haa tahu malee, dhiirti hundinuu jaarti isaa akkuma mataa ifiitti haa jaalattuu, ammaas niitiiniis akkuma kanatti jaarsa isii dhaa kabajuu haa ifi irratti eeyduu!