[1] Warri harqoota gabrummaa jala jiran, akka maqaan Rabbii tii fi barsiisni keenyaas hin sakkabamnetti, gooftolii isaanii tiif kabajaa guutuu qabaachuu tu isaan irraa eegama!
[2] Gabroonni warri gooftoliin isaanii kiristaana tahaniis, isaan obboleeyyan amantii waan tahaniif, hin tuffatin! Irrattuu isaan obboleeyyan jaalatamoo waan tahanii fi, amantootaas gargaaruu irratti waan bobbaahaniif jecha, caalatti akka isaan kaadamuun irraa eegamu barsiisii hubachiisi!
[3] Namni barsiisa faallaa tahe, kan qoowlii dhugaa Gooftaa keenyaa Yesuus Kiristoosiin wajji wal hin taane, tan barsiisa bu'ura amantii teenyaa tiin wajjiin walii hin gallees barsiisu yoo jiraate,
[4] namni akkasii kun dhaytaan bokokuu malee, waa takka illee nama beekuu miti; inni fedha morkii tii fi lolatti nama tuqamee dha; kana irraa kan ka'e hinaaffaa, wal dhabbii, maqaa balleeysuu fi ammaas mamii hamtuu irra bu'a.
[5] Namoonni hanggullaa dhabanii fi kanneen dhugaan jalaa badde, falamaa adda hin cinne oofu; isaan biratti nama Rabbii tahuun faayduma addunyaa ittiin arkachuuf akka tahetti fudhatama.
[6] Nama Rabbii tahuun ammoo, nama waan ifii qabu irratti imaana qabuuf faaydaa guddaa dha qabdi.
[7] Nuti, waanuma takka illee gara biyya addunyaa fidnee hin dhufne, waa takka illees fuunee keeysaa bahuu hin dandeeynu.
[8] Eegasuu, waanuma nyaannuu fi waanuma uffannu argannaan, nu gaha.
[9] Warri taajirummaa barbaadan ammoo fitina seenu, ammaas hillima kajeellaa gowwummaa tan hedduu isaan miitu keeysatti kufu; kuniis diigamuu fi baditti isaan geeysa.
[10] Jaalalti maallaqaa, madda hammeenya hundumaa ti; namoonni hangi tokko maallaqatti shakaruu dhaan, amantii irraa badanii gadda hedduun if galaafatanii ti jiru.
[11] Ammoo ati yaa nama Rabbii, waan kanneen hundumaa irraa fagaadhu! Qaceelinaaf, nama Rabbii tahuuf, amantii dhaaf, jaalalaaf, obsaaf, ammaas gara-laafummaaf tattaafadhu!
[12] Qabsoo gaarii amantii dhaa jabeeysii qabi! Jireenya abad kan Rabbi si yaameef, kan atuu namoota hedduu duratti akka gaaritti ragaa baateef san qabadhu!
[13] Fuula Rabbii waa hundumaa akka jiraatu godhu duratti, fuula Yesuus Kiristoos kan Phonxos Philaaxos duratti amantiif akka gaaritti ragaa bahe durattiin, kanneen dabarsee sitti kanna.
[14] Hanga Gooftaan keenya Yesuus Kiristoos deebi'ee zaahir bahee dhufutti, ajaja kanneen illaa yookiin asxaa takkaan maleetti guutii eegi!
[15] Rabbii eeybifamaa, kan kophaa isaa waan hundumaa ajaju, mootii mootootaa, Gooftaa gooftolii tu, waytuma ifii fedhetti dhufa Kiristoos zaahir godhee ti mullisa.
[16] Rabbi qofa kan hin duune, inni ifa waa takka illeen itti dhihaachuu hin dandeenye keeysa jiraata; namni takkaa isa arke hin jiru, isa arkuus hin dandayu. Durriin ulfinaa tii fi qiwwaan abadiis isumaaf haa tahu! Aammiin.
[17] Warra amma biyya addunyaa tana irratti taajiroota tahan, akka hin dhaytooyne isaan ajaji! Abdii isaanii tiis addunya nama hin amansiifne tana irra akka hin keenye hubachiisi! Abdii isaanii ammoo Rabbi kan waa hundumaa haa ittiin gammannuuf jecha arjummaan nu badhaase irra akka kaayan gorsi!
[18] Waan gaarii akka hojjatan isaan ajaji; gaarii hojjachutti haa badhaadhan; waan qaban irraahiis fedhii isaanii tiin warra kaaniif haa arjoomanii!
[19] Haala kanatti badhaadhummaa hundee jabaa qabdu hegereef ol kaayyatu; akkasitti jireenya, dhugumaan jireenya dhugaa tahees ni arkatu.
[20] Ati yaa Ximotewoos, waan imaanaa sitti kanname jabeeysii eegi! Jette-jettee Rabbi hin beeynee fi falamaa gowwaa kanneen namoonni hangi tokko dogongoraan beekumsa jedhaniin san irraa fagaadhu!
[21] Namoonni hangi tokko beekumsa isa jedhame kana “Arkannee ti jirra” jedhanii odeeysuu isaanii tiin amantii irraa fagaatanii ti jiru. Ni'imaan Rabbii siin wajjiin haa taatu.